ފިޔަވަޅު އެޅުމަކީ ފޮނިކަމާއި ހިތިކަން އެކުލެވޭ ކަމެއްކަން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް އެނގިވަޑައިގަންނަވާ ކަމަށް ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާން އަބްދުالله ވިދާޅުވެއްޖެ އެވެ.

ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ މެނޭޖިންގ ޑިރެކްޓަރ ގެ މަގާމްގައި ހުންނެވި ހުސައިން އަމްރު ރަޝާދު، އެ މަގާމުން ވަކިކުރުމަށް ސަރުކާރުން ޕްރައިވެޓައިޒޭޝަން އެންޑް ކޯޕަރައިޒޭޝަން ބޯޑް (ޕީސީބީ) އަށް މިއަދު ހެނދުނު ވަނީ ފޮނުވާފައެވެ. އެއާއެކު ޕީސީބީން މިހާރު ވަނީ އަމްރު އެ މަގާމުން ވަކިކޮށް އެސްޓީއޯގެ ހިންގުން ވަގުތީ ގޮތުން އެ ކުންފުނީގެ ސީއެފްއޯގެ މަގާމުގައި ހުންނެވި މުހައްމަދު ނިޒާމްއާ ހަވާލުކޮށްފައެވެ.

އެކަމާއި ގުޅިގެން ސަރުކާރަށް އަމާޒުވަމުންދާ ފާޑުކިޔުންތައް ދިފާއުކުރައްވާ ކުރެއްވި ޓްވީޓެއްގައި ޢިމްރާން ވިދާޅުވީ، ފިޔަވަޅު އެޅުމަކީ ފޮނިކަމާއި ހިތިކަން އެކުލެވޭ ކަމެއްކަން ރައީސް ޞާލިހަށް ވަރަށް ރަނގަޅަށް އެނގިވަޑައިގަންނަވާ ކަމަށެވެ. 

އަދި އެމަނިކުފާނަކީ ކޮންމެހެން އަޅުއްވަން ޖެހޭ ފިޔަވަޅުތައް އަޅުއްވާނޭ ބޭފުޅެއް ކަން އެމަނިކުފާނު ދަންނަ އެންމެހައި ފަރާތްތަކަށް އެނގޭނެކަން ފާހަގަކުރައްވައި ޢިމްރާން އިތުރަށް ވިދާޅުވީ، ކޮންމެ ކަމެއްގައިވެސް ހިކުމަތްތެރި ކަމާއި ކެތްތެރިކަން އިސްކުރުން މުހިންމު ކަމަށެވެ.

އަމްރު މަގާމުން ވަކިކުރަން ނިންމީ ސަރުކާރު ކުންފުނިތަކުގެ ހިންގުމަށް އަބަދުވެސް ބަދަލުތައް ގެންނަ އުސޫލުން ކަމަށް ރައީސް އޮފީހުން ވަނީ ބުނެފައެވެ.

އެހެން ނަމަވެސް އަމްރު މަޤާމުން ވަކިކުުރުމާއި ގުޅިގެން ނަޝީދަށް ތާއީދު ކުރައްވާ މެމްބަރުން ވިދާޅުވަމުން ދަނީ އެއީ ސިޔާސީ ގޮތުން ޚިޔާލު ފަތާތުވުމުން އެކަން ހަޖަމު ނުކުރެވިގެން އެޅުއްވި ފިޔަވަޅެއް ކަމަށެވެ. އެހެނީ އަމްރުއަކީ އެމްޑީޕީގެ ރައީސް މުޙައްމަދު ނަޝީދުގެ "ފިކުރެއްގެ ދިރުން" ގޮފި އުފައްދާ ފުޅާކުރުމުގައި އިސް ރޯލެއް އަދާކުރައްވަމުން ގެންދަވާ ބޭފުޅެކެވެ.

އެހެން ނަމަވެސް ރައީސް ޞާލިހަށް ތާއީދު ކުރައްވާ މެމްބަރުން ސަރުކާރުގެ ދިފާއުގައި ވިދާޅުވަމުން ގެންދަވަނީ އެކަން އެގޮތަށް ކުރެއްވީ ރައީސުލްޖުމްޙޫރިއްޔާގެ ސިޔާސަތު ޤަބޫލު ނުކުރައްވާ ބޭފުޅަކަށް އެ ސިޔާސަތު ތަންފީޒުކުރަން އުނދަގޫވާނެތީ ކަމަށެވެ. އަދި އެކަމުގެ ސަބަބުން ރައްޔިތުންނަށް ޚިދުމަތް ފޯރުކޮށްދޭން ދަތިވާނެތީ ކަމަށެވެ.