ދެ ބިލިއަނަށްވުރެ ގިނަ ރުފިޔާއަށް ފެނަކަ، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އަށް ދަރާފައިވާ ކަމަށް ރައްޔިތުންގެ މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ.
އެސްޓީއޯގެ މެނޭޖިން ޑިރެކްޓަރު، ހުސައިން އަމްރު ރަޝާދު، އެ މަގާމުން ވަކި ކުރިމާއި ގުޅިގެން ގިނަ ވާހަކަތަކެއް ދެކެވެމުންދާ މި ދަނޑިވަޅުގައި ސައީދު ކުރެއްވި ޓްވީޓެއްގައި ވަނީ، ސަރުކާރުގެ ކުންފުންޏެއް ކަމަށްވާ ފެނަކަ ކޯޕަރޭޝަނުން އެސްޓީއޯ އަށް ބިލިއަނުން ދަރާފައިވާ ކަމަށެވެ.
އަދި އޭގެ ސަބަބުން، ދަރަނި ދޫކުރުން ހުއްޓާލުމަށް އެސްޓީއޯ އަށް މަޖުބޫރުވެގެން ދިޔަ ކަމަށާ، އެ ކުންފުނީގެ އެ ނިންމުމާއި ގުޅިގެން ފިނޭންސް މިނިސްޓަރު އިބްރާހިމް އަމީރު އެސްޓީއޯ އަށް ބިރު ދައްކައި، އަމްރު މަގާމުން ވަކިކުރައްވާނެ ކަމުގެ އިންޒާރު ދީފައިވާ ކަމަށް ވެސް ސަޢީދު ވިދާޅުވިއެެވެ.
ސައީދު އިތުރަށް ވިދާޅުވީސަރުކާރު ކުންފުނިތަކާއި އެކު އެތެރޭގެދަރަނި 73 ބިލިއަނަށް މިހާރުވެސް އަރާފައިވާ ކަމަށެވެ. އަދި އެކަންކަން އެހެން ހުރި އިރުވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ދެވަނަ ދައުރެއް ދޭންވީތޯ ސައީދު ވަނީ ސުވާލު ކުރައްވާފަ އެވެ.
އަމްރު މަގާމުން ވަކި ކުރުމާއި ގުޅިގެން އެކި ފަރާތްތަކުން އަންނަނީ އެކި ގޮތަށް ވާހަކަ ދައްކަވަމުންނެވެ. އެގޮތުން، ސަރުކާރަށް ތާއީދު ކުރާ މެންބަރުން އަންނަނީ އެ ނިންމުން ދިފާއުކޮށް އަމްރު އަށް ސަރުކާރުގެ ސިޔާސަތުތައް ކަމުނުދާ ކަމަށާ އެހެންކަމުން އެ މަގާމުގައި އޭނާ ބެހެއްޓުން ރަނގަޅު ނޫން ކަމަށް ބުނަމުންނެވެ.
އެހެނީ، އަމްރުއަކީ އެމްޑީޕީގެ ރައީސް މުޙައްމަދު ނަޝީދުގެ "ފިކުރެއްގެ ދިރުން" ގޮފި އުފައްދާ ފުޅާކުރުމުގައި އިސް ރޯލެއް އަދާކުރައްވަމުން ގެންދަވާ ބޭފުޅެކެވެ. އަދި އެ ގޮތްޕަށް ނިސްބަތްވާ ބައެއް އެމްޑީޕީގެ މެންބަރުން އަންނަނީ ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.
Advertisement
This content is created and paid for by advertisers and does not involve Voice Journalists
