ރައީސް އިބްރާހިމް މުޙައްމަދު ޞާލިޙްގެ މަންދޫބަކު އަނެއްކާވެސް މާމިގިލީ ދާއިރާގެ މެމްބަރު އަދި ޖުމްހޫރީ ޕާޓީގެ ލީޑަރު ޤާސިމް އިބްރާހިމް އާއި ބައްދަލުކޮށްފިއެވެ.
ރައީސް ޞާލިޙް ގެ ފަރާތުން މިފަހަރު ޤާސިމް އާއި ބައްދަލު ކުރީ އަލިފުށީ ދާއިރާގެ މެމްބަރު އަދި ރައީސް ޞާލިޙްގެ ޅިޔަނު މުހައްމަދު ރަޝީދު ހުސެއިން (ބިގޭ) އެވެ. އަދި މިބައްދަލުވުމުގައި ޤާސިމްގެ ސްޕެޝަލް އެންވޯއީ އިލްހާމް އަޙްމަދާއި ޖޭޕީގެ ޑެޕިޔުޓީ ލީޑަރު އަމީން އިބްރާހިމްވެސް ވަނީ ބައިވެރިވެފައެވެ.
ސަން އައިލެންޑްގައި ބޭއްވުނު މިބައްދަލުވުމާއި ގުޅޭ ތަފްސީލެއް ދެ ޕާޓީއިން ކުރެ އެއްވެސް ޕާޓީއަކުން ހާމަކޮށްފައެއް ނުވެއެވެ.
މިއަހަރުގެ ސެޕްޓެމްބަރ 9ގައި ރިޔާސީ އިންތިޚާބު ބޭއްވުމަށް ހަމަޖެހިފައި ވާއިރު 2018 ގައި ބޭއްވުނު ރިޔާސީ އިންތިޚާބުގައި ރައީސް ޞާލިޙް އާއި އެކު ކޯލިޝަން ހެދި ޖުމްހޫރީ ޕާޓީ އިން ނިންމާފައިވަނީ މި އިންތިޚާބުގައި އެޕާޓީގެ ކެނޑިޑޭޓަކު ނެރެ ވާދަކުރުމަށެވެ.
ރައީސް ޞާލިޙް އާއިއެކު މިއަހަރުގެ އިންތިޚާބަށް ކޯލިޝަން ހަދައިފައިވަނީ ޢަދާލަތު ޕާޓީ އާއި ސަން ސިޔާމުގެ އެމްޑީއޭ އެވެ.
ކޯލިޝަން ގައި ހިމެނޭ އެމްއާރްއެމް އިންވެސް ރައީސް ޞާލިހާއި ބައްދަލު ކޮށްފައި ވާއިރު، އެ ޕާޓީން ނިންމާފައިވާނީ މަޝްވަރާތައް އިތުރަށް ކުރިއަށް ގެންދިޔުމަށެވެ. އެއަށްފަހު އެ ޕާޓީންވަނީ ޤާސިމާއި ވެސް ބައްދަލުކޮށްފައެވެ.
Advertisement
This content is created and paid for by advertisers and does not involve Voice Journalists
