ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑުގެ ކޮންމެ ނިންމުމަކީ ޤާނޫނާއި ޤަވައިދާއި އެއްގޮތްވާ ގޮތުގެ މަތިން މިނިވަންކަމާއި މުސްތަގިއްލު ކަމާއެކު ނިންމާ ނިންމުންތަކެއްކަމަށް އެ ބޯޑުން ބުނެފި އެވެ.
އެ ބޯޑުން މިފަދައިން ބުނެފައިވަނީ ސަރުކާރު ޙިއްސާވާ ކުންފުނިތަކުގެ ބޯޑުތަކަށް ސަރުކާރުން ޢައްޔަންކުރާ ފަރާތްތައް ޢައްޔަންކުރުމާއި ވަކިކުރުމުގައި ސަރުކާރުން ނުފޫޒު ފޯރުވަމުންދާކަން ފާހަގަކޮށް ބައެއް މީޑިއާތަކުގައި ފަތުރަމުންދާ ޚަބަރުތައް ދޮގުކޮށް އެ ބޯޑުން އަމަލުކުރާ ގޮތް ހާމަކޮށް ނެރެފައިވާ ބަޔާނެއްގަ އެވެ.
އެގޮތުން ޕީސީބީގެ އެ ބަޔާނުގައި ބުނެފައިވަނީ ބޯޑުން ކޮންމެ ނިންމުމެއްވެސް ނިންމަނީ، ސަރުކާރު ޙިއްސާވާ ކުންފުނިތަކުގެ އެންމެހާ ޙިއްސާދާރުންނާ ދައުލަތާއި ރައްޔިތުންގެ މަޞްލަޙަތު ހިމާޔަތް ކުރެވޭނެކަން ކަށަވަރުވާނެހެން މިނިވަންކަމާއެކުކަމަށެވެ.
ޤާނޫނުން ބޯޑަށް މަތިކޮށްފައިވާ އެންމެހާ މަސައްކަތްތައް އަބަދުވެސް ކުރަމުންދާނީ ޤާނޫނުތަކާއި ޤަވައިދުތަކާއި އުޞޫލުތަކާއި އެއްގޮތަށްކަމަށާއި، ކުރިއަށް އޮތްތާންގަވެސް ބޯޑުން ޢަމަލުކުރަމުން ދާނީ ޤާނޫނާއި ގަވާއިދުތަކާއި އެއްގޮތަށްކަމުގެ ޔަގީންކަން ދިވެހި ރައްޔިތުންނަށް ދޭ ކަމަށް އެ ބޯޑުން ވަނީ ބުނެފައެވެ.
އޭގެ އިތުރުން ޕީސީބީއިން ބުނީ ސަރުކާރު ނުވަތަ ސަރުކާރު ޙިއްސާވާ ކުންފުނިތަކުގެ ބޯޑުތަކަށް މެންބަރުން އައްޔަންކުރުމާއި ވަކިކުރުމުގެ ކަންކަން އިތުރަށް ހަރުދަނާކުރުމަށް ގަވައިދާއި އުޞޫލުތަކަށް ގެންނަންޖެހޭ ބަދަލުތައް ގެންނަމުންދާކަމަށެވެ.
އެހެންކަމުން ވަކި މައްސަލައެއް ހިމެނޭ ކަންކަމުގައި ބޯޑުން އަމަލުކުރަމުންދާ ނުވަތަ ކޮށްފައިވާ ގޮތާއި ގުޅިގެން ދޮގު މައުލޫމާތު ނުފެތުރުމަށް ޕީސީބީން ވަނީ ނޫސްތަކަށް އިލްތިމާސްކޮށްފަ އެވެ. އަދި ބުނެފައިވަނީ ސަރުކާރު ޙިއްސާވާ ކުންފުނިތަކުގެ ބޯޑަށް މެންބަރުން އައްޔަންކޮށް ވަކިކުރަނީ ދަޢުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި ކޯޕްރަޓައިޒްކުރުމާއި އަދި މޮނިޓަރކޮށް އިވަލުއޭޓްކުރުމުގެ ޤާނޫނުގެ ދަށުން ކަމަށެވެ.
އެ ޤާނޫނުގައި ބުނާގޮތުން ސަރުކާރު ޙިއްޞާވާ ކުންފުނިތަކުގެ ބޯޑުތަަކަށް ސަރުކާރުން ޢައްޔަންކުރާ ފަރާތްތައް އައްޔަންކޮށް ވަކިކުރަނީ އެ ޤާނޫނުގެ ދަށުން އެކުލަވާލާ، ބޯޑުން ފާސްކޮށްފައިވާ އުސޫލާއި އެއްގޮތްވާ ގޮތުގެ މަތިންނެވެ.
އެ އުސޫލަކީ 2018 ވަނަ އަހަރު، ބޯޑު ފުރަތަމަ އެކުލަވާލިއިރު ޢަމަލުކުރަމުން ދިޔަ މައިގަނޑު އުސޫލުގެ އަސާސްތަަކަށް ބިނާކޮށް، އިތުރަށް ހަރުދަނާކުރުމަށްފަހު ބޯޑުން މިހާރު ޢަމަލުކުރަމުންދާ އުސޫލުކަމަށް ޕީސީބީން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
