ރ ފުއްގިރި މައްސަލައިގެ ހެކި ބަލައިގަތުމާއި ގުޅޭގޮތުން ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ހުށައަޅާފައިވާ އިސްތިއުނާފު ނިމެންދެން ދަށު ކޯޓުގައި ހިނގަމުންދާ ފުއްގިރި މައްސަލައިގެ ޝަރީއަތް މަޑުޖައްސާލުމުގެ ވަގުތީ އަމުރެއް ނެރެދިނުމަށް ރައީސް ޔާމީންގެ ފަރާތްޕުޅުން ހައިކޯޓުގައި އެދިވަޑައިގެންފި އެވެ.
ރައީސް ޔާމީންގެ ފަރާތުން ހައި ކޯޓުގައި އިސްތިއުނާފު ކޮށްފައިވާ މައްސަލައަކީ، ކްރިމިނަލް ކޯޓަށް ޝަރީއަތުގެ ކުރިން ހުށަހަޅާ ހުށަހެޅުންތަކުގެ ގޮތުގައި ޔާމީން ހުށަހެޅުއްވި ގިނަ ހުށަހެޅުންތަކެއް ބަލައިނުގަތުމަށް އެ ކޯޓުގައި މައްސަލަ ބައްލަވާ ގާޒީ އަލީ ނަދީމް ނިންމެވި ނިންމުން ބަދަލުކޮށްދިނުމަށް އެދި ހުށަހެޅި މައްސަލައެކެވެ.
އެ މައްސަލައިގެ އަޑުއެހުމެއް މިއަދު ހައިކޯޓުގައި ބާއްވާފައިވާއިރު ރައީސް ޔާމީންގެ ފަރާތްޕުޅުން ގާނޫނީ ވަކީލު އަބްދުالله ޝިޔާޒު ވިދާޅުވީ އެ މައްސަލަ ހައިކޯޓުގައި އިސްތިއުނާފުކޮށްފައިވާކަމުގެ ނޯޓިސް ކްރިމިނަލް ކޯޓަށް ފޮނުވާފައިވާ ކަމަށެވެ. އަދި ފުއްގިރި މައްސަލައިގެ އަޑުއެހުމެއް މިހާރުވެސް ކްރިމިނަލް ކޯޓުގައި ތާވަލުކޮށްފައިވާ ކަމަށާއި، ހައިކޯޓަށް ހުށައެޅި މައްސަލަ ނިމެންދެން ފުއްގިރި މައްސަލަ އިތުރަށް ކުރިއަށް ނުގެންގޮސް މަޑުޖައްސާލުމުގެ އަމުރެއް ނެރެދިނުމަށް އެދިވަޑައިގަންނަވާ ކަމަށެވެ.
ރައީސް ޔާމީންގެ ފަރާތްޕުޅުން އެފަދައިން ހުށައެޅުއްވުމާއި ގުޅިގެން ދައުލަތުގެ ފަރާތުން ޕަބްލިކް ޕްރޮސެކިއުޓާ އައިޝަތު ޝާމާ ވިދާޅުވީ ހައިކޯޓުގައި އޮތް އިސްތިއުނާފު މައްސަލަ ނިމެންދެން ފުއްގިރި މައްސަލަ މަޑުޖައްސާލުމަށް ދައުލަތުންވެސް އިއުތިރާޒު ނުކުރައްވާކަމަށެވެ.
އެފަދަ މައްސަލަތައް ބެލުމަށް ހައި ކޯޓަށް ދީފައި އޮންނަ ކުރު މުއްދަތުގައި ކްރިމިނަލް ކޯޓުން އާންމުކޮށް ވެސް ޝަރީއަތް މަޑުޖައްސާލާކަމަށާއި، އެހެންކަމުން ފުއްގިރި މައްސަލައިގެ ޝަރީއަތް މަޑުޖައްސާލުމަށް ދައުލަތުން އިއުތިރާޒު ނުކުރާކަމަށް ޝާމާ ވިދާޅުވި އެވެ.
އެހެން ނަމަވެސް މިއަދުގެ އަޑުއެހުމުގައި ހައިކޯޓުން ވަކި ގޮތެއް ނިންމާފައެއް ނުވެއެވެ. މިއަދުގެ އަޑުއެހުމުގައި އޮތީ ރައީސް ޔާމީންގެ ފަރާތްޕުޅުން އިސްތިއުނާފު ކުރި ކަންކަން ޚުލާސާކޮށް ކޯޓަށް ހުށައެޅުމެވެ.
މިއަދުގެ އަޑުއެހުން ކުރުކޮށްލައްވަމުން މައްސަލަ ބައްލަވާ އިސް ފަނޑިޔާރު ހަސަން ޝަފީއު ވިދާޅުވީ ދެން އަންނަ އަޑުއެހުމެއްގައި އޮންނާނީ ރައީސް ޔާމީންގެ ފަރާތްޕުޅުން ހުށައެޅުއްވި ކަންކަމަށް ދައުލަތުން ޖަވާބުދާރީވުމަށް ފުރުސަތު ދިނުން ކަމަށެވެ. އަދި ފުއްގިރި މައްސަލަ މަޑުޖައްސާލުމުގެ ވަގުތީ އަމުރެއް ނެރުމާމެދު ގޮތެއް ނިންމަވާނެކަމަށް ގާޒީ ހަސަން ޝަފީއު ވިދާޅުވިއެވެ.
ރައީސް ޔާމީންގެ ފަރާތްޕުޅުން ހައިކޯޓަށް ހުށައަޅާފައިވާ އިތުރު މައްސަލައެއްގެ އިސްތިއުނާފުވެސް މި ހަފްތާ ކުރިއަށް ގެންދިއުމަށް ވަނީ ނިންމާފައެވެ. އެހެން ނަމަވެސް އެމަނިކުފާނު ފަރާތްޕުޅުން އިސްތިއުނާފުކޮށްފައިވާ ވ އާރަށު މައްސަލަ ބަލައިގަތުމާމެދު ކޯޓުން އަދި ވަކިގޮތެއް ކަނޑައަޅާފައެއް ނުވެއެވެ.
Advertisement
This content is created and paid for by advertisers and does not involve Voice Journalists
