ރައީސުލްޖުމްހޫރިއްޔާގެ އޮފީހުގެ މިނިސްޓަރުކަމުގައި ހުންނެވި ވެރިކަންކުރާ އެމްޑީޕީގެ ނައިބުރައީސް މުޙައްމަދު ޝިފާޒު އެމަޤާމުން ވަކިކޮށް އެ މަގާމް އެމްޑީޕީގެ ޗެއާޕާސަން ގެ ނާއިބު އިބްރާޙީމް ވަހީދު (އިބުރޭ)އަށް ދޭން ސަރުކާރުން ނިންމައިފިއެވެ. 

ޝިފާޒު ރައީސް އޮފީހުގެ މިނިސްޓަރުކަމަށް އައްޔަންކުރެއްވީ ރައީސް ޞާލިހުގެ ވެރިކަމަށް އިންތިޚާބު ވެވަޑައިގެންނެވުމަށްފަހުގައެވެ. 

ޝިފާޒަކީ އަބަދުވެސް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް ރައީސް މުޙައްމަދު ނަޝީދާ އަރިސް ބޭފުޅެކެވެ. އެެގޮތުން ޖަނަވަރީ މަހުގައި އޮތް އެމްޑީޕީގެ ރިޔާސީ ޕްރައިމަރީގައި ރައީސް ނަޝީދުގެ ކެމްޕެއިނުގައި އެންމެ އިސްކޮށް މަސައްކަތްކުރެއްވި އެއް ބޭފުޅަކީ ޝިފާޒެވެ.

Advertisement

އަދި އެ ޕްރައިމަރީން ނަޝީދަށް ނާކާމިޔާބުވެވަޑައިގަތުމަށްފަހު، އެމަނިކުފާނު އެމްޑީޕީ ތެރޭގައި ހިންގަވަން ފެއްޓަވާފައިވާ ފިކުރެއްގެ ދިރުން ހަރަކާތުގައިވެސް ޝިފާޒު އަންނަނީ އިސްކޮށް ހަރަކާތްތެރިވަމުންނެވެ. 

ޝިފާޒުގެ ބަދަލުގައި އެ މަގާމަށް އައްޔަނުކުރާ އިބުރޭ އަކީ އެމްޑީޕީގެ މި ސަރުކާރުގެ ފަޅީގެ މެންބަރެކެވެ. އެމްޑީޕީގެ ޗެއަރޕާސަން އިންތިޚާބުގައި މިނިސްޓަރު ފައްޔާޟް އިސްމާއިލް ގެ ކެންޕެއިން މެނޭޖަރުކަންވެސް ކުރެއްވީ އިބުރޭ އެވެ. އޭގެ އިތުރުން ވެސް އިބުރޭ އަކީ ރައީސް ޞާލިހަށް ވަފާދާރު، އެމަނިކުފާނާއި ވަރަށް އަރިސް ބޭފުޅެކެވެ. 

ރައީސް ނަޝީދުގެ ފަޅީގެ ޝިފާޒުގެ އިތުރުން، އެސްޓީއޯގެ އެމްޑީގެ މަގާމުގައި ހުންނެވި ހުސައިން އަމްރު ވެސް ވަނީ މި ހޯމަ ދުވަހު އެ މަގާމުން ވަކިކޮށްފައެވެ.