ރ ފުއްގިރި މައްސަލައިގެ ހެކި ބަލައިގަތުމާއި ގުޅޭގޮތުން ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ހުށައަޅާފައިވާ އިސްތިއުނާފު ނިމެންދެން ދަށު ކޯޓުގައި ހިނގަމުންދާ ފުއްގިރި މައްސަލައިގެ ޝަރީއަތް މަޑުޖައްސާލުމަށް ހައިކޯޓުން އަމުރުކޮށްފި އެވެ. 

ރައީސް ޔާމީންގެ ފަރާތުން ހައި ކޯޓުގައި އިސްތިއުނާފު ކޮށްފައިވާ މައްސަލައަކީ، ކްރިމިނަލް ކޯޓަށް ޝަރީއަތުގެ ކުރިން ހުށަހަޅާ ހުށަހެޅުންތަކުގެ ގޮތުގައި ރައީސް ޔާމީން ހުށަހެޅުއްވި ގިނަ ހުށަހެޅުންތަކެއް ބަލައިނުގަތުމަށް އެ ކޯޓުގައި މައްސަލަ ބައްލަވާ ގާޒީ އަލީ ނަދީމް ނިންމެވި ނިންމުން ބަދަލުކޮށްދިނުމަށް އެދި ހުށަހެޅި މައްސަލައެކެވެ.

އެމަނިކުފާނުގެ ފަރާތްޕުޅުން ވަނީ ހައިކޯޓުން އެކަމާއި މެދު ގޮތެއް ނިންމަންދެން ދަށު ކޯޓުގައި އޮތް ފުއްގިރި މައްސަލަ މަޑުޖައްސާލުމަށް އެދިވަޑައިގެންފަ އެވެ. ރައީސް ޔާމީންގެ ފަރާތްޕުޅުން އެދިވަޑައިގެންނެވި ގޮތަށް ޝަރީއަތްތައް މަޑުޖައްސާލުމަށް އިއުތިރާޒު ނުކުރާކަމަށް ދައުލަތުން ވެސް ވަނީ ބުނެފައެވެ. 

އެހެން ނަމަވެސް އެ މައްސަލަ ހައިކޯޓަށް ހުށަހަޅުއްވާފައިވަނިކޮށް، އިސްތިއުނާފީ މައްސަލައެއް ހުށަހެޅުމުން ކުރިމިނަލް ކޯޓުން އާންމުކޮށް އަމަލުކުރާ އުސޫލާ ޚިލާފަށް އޭޕްރީލް މަހުގެ 4 ވަނަ ދުވަހަށް ކުރިމިނަލް ކޯޓުން ފުއްގިރި މައްސަލައިގެ އަޑުއެހުމެއް ވަނީ ތާވަލުކޮށްފަ އެވެ. 

އެ މައްސަލައާއި ގުޅިގެން މިއަދު ހައިކޯޓުގައި އޮތް އަޑުއެހުމުގައި އެ މައްސަލަ ބައްލަވާ ތިން ފަނޑިޔާރުންގެ ބެންޗުގެ އިއްތިފާގުން ވަނީ ހައިކޯޓުގައި މިހާރު އޮތް އިސްތިއުނާފު ނިމެންދެން ދަށު ކޯޓުގައި ކުރިއަށްދާ ރ ފުއްގިރި މައްސަލަ މަޑުޖައްސާލުމުގެ އަމުރެއް ނެރުއްވާފައެވެ. 

އެ މައްސަލަ ބައްލަވާ އިސް ފަނޑިޔާރު ހަސަން ޝިފާއު ވިދާޅުވީ ފުއްގިރި މައްސަލައާއި ގުޅިގެން ކްރިމިނަލް ކޯޓުގައި މިހާރު ކުރިއަށްދާ ޝަރީއަތް މަޑުޖައްސާލުމަށް ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ހުށައަޅުއްވާފައިވާ ހުށައެޅުއްވުމަށް ބަލާ ހައިކޯޓުގެ ގަވައިދުގެ 69 ވަނަ މާއްދާއަށް ރިއާޔަތްކޮށް އެ ކޯޓުން (ހައިކޯޓުން) ވަކި ގޮތެއް އަންގަންދެން ނުވަތަ އެ މައްސަލައިގައި އެ ކޯޓުން ވަކި ހުކުމެއް ނެރެންދެން ކްރިމިނަލް ކޯޓުގައި އޮތް ފުއްގިރި މައްސަލައިގެ ޝަރީއަތްތައް ކުރިއަށް ނުގެންގޮސް މަޑުޖައްސާލުމަށް އަންގާ އަމުރުކުރާ ކަމަށެވެ. 

ހައިކޯޓުގައި ފުއްގިރި މައްސަލައިގެ އިސްތިއުނާފުގެ އިތުރުންވެސް ރައީސް ޔާމިންގެ ފަރާތްޕުޅުން އިތުރު ދެ މައްސަލައެއްވެސް ވަނީ އިސްތިއުނާފުކޮށްފަ އެވެ. އެއީ ވ އާރަށުގެ މައްސަލައިގައި ހުކުމުގައި ހިމެނޭ ޖޫރިމަނާ 53 މިލިއަން ރުފިޔާ ހަ މަސް ދުވަސްތެރޭ ދެއްކުމަށް ކުރި އަމުރާއި ވ އާރަށުގެ މައްސަލައިގެ ހުކުމް ބާތިލްކޮށްދިނުމަށް އެދި ހުށައެޅި މައްސަލައެވެ. 

މިއަދު ހައިކޯޓުން ވަނީ 53 މިލިއަން ރުފިޔާ ދައްކަން ހުކުން ކުރި މައްސަލައިގެ އިސްތިއުނާފު އަޑުއެހުންތައް ނިންމާލާފައެވެ. އަދި ދެން އަންނަ އަޑުއެހުމެއްގައި އެ މައްސަލައާއި މެދު ހައިކޯޓުން ގޮތެއް ނިންމަވާނެކަމަށް އިސް ގާޒީ ވަނީ ވިދާޅުވެފަ އެވެ.