ވ. އާރަށުގެ މުއާމަލާތާއި ގުޅުވާ ޕީޕީއެމްގެ ރައީސް އަދި އެ ޕާޓީގެ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް ދައުލަތުން އުފުލި ރިޝަވަތު ޤަބޫލުކުރުމާއި މަނީލޯންޑަރިންގެ ކުށް ސާބިތުވާކަމަށް ކަނޑައަޅާ ކްރިމިނަލް ކޯޓުން ހުކުން އިއްވިތާ 63 ދުވަސް ފަހުން އެ މައްސަލައިގެ ޖޫރިމާނާއަކީ 53 މިލިއަންކަމަށް ދައުލަތުން ކަނޑައެޅިގޮތް ސާފުކޮށްދޭން ޖެހޭކަމަށް ރައީސް ޔާމީން ވިދާޅުވެއްޖެ އެވެ. 

ވ. އާރަށު މައްސަލައިގެ ހުކުމް ކުރިތާ ދެ މަސްފަހުން ދައުލަތުން ވަނީ އެ މައްސަލައާއި ގުޅިގެން ޖޫރިމަނާގެ ގޮތުގައި 53 މިލިއަން ރުފިޔާ ހަމަސް ދުވަސްތެރޭ ދައުލަތަށް ދެއްކުމަށް ކްރިމިނަލް ކޯޓު މެދުވެރިކޮަށް އަމުރެއް ނެރެފައެވެ. އެމަނިކުފާނުގެ ފަރާތްޕުޅުން އެ މައްސަލަ ހައިކޯޓުގައި އިސްތިއުނާފުކޮށްފައިވާއިރު، މިއަދު ވަނީ އެ މައްސަލައިގެ އިތުރު އަޑުއެހުމެއް އެ ކޯޓުގައި ކުރިއަސް ގެންގޮސްފައެވެ. 

މިއަދުގެ އަޑުއެހުމުގައި ދައުލަތުގެ ވާހަކަތަކަށްފަހު ރައީސް ޔާމީން ފުރުސަތެއް ހޯއްދަވާ ވިދާޅުވީ އެ މައްސަލައާއި ގުޅިގެން 53 މިލިއަން ރުފިޔާ ދެއްކުމަށް ދައުވާފޯމުގައި ހިމަނާފައި ވީ ނަމަވެސް އެއީ ތަހުގީގު މަރުހަލާގައި އަދި ޝަރީއަތުގެ މަރުހަލާގައިވެސް އެއްވެސް ގޮތަަކަށް ވާހަކަދެކެވި އަދަދެއް ނޫން ކަމަށެވެ. 

Advertisement

ރައީސް ޔާމީން ވިދާޅުވީ އާރަށު މުއާމަލާތާއި ގުޅިގެން އެމަނިކުފާނުގެ މައްޗަށް ރިޝްވަތުގެ ގޮތުގައި ހިމެނޭ ފައިސާކަމަށް ދައުލަތުން ފާހަގަކޮށްފައިވަނީ 1 މިލިއަން ޑޮލަރު ކަމަށާއި، މިހާރުވެސް އެ ފައިސާ މޯލްޑިވިއަން އިސްލާމިކް ބޭންކުގައި ޖަމާކޮށްފައި ހުރިގޮތަށް ހުންނާނެކަމަށެވެ. 

އެހެންކަމުން އެ ފައިސާއިން ނަފާ ހޯއްދެވުމަށް އެއްވެސް މަސައްކަތެއް ކޮށްފައި ނުވާނެކަމަށާއި، އިތުރުވެފައި ހުންނާނީ އިންޓްރެސްޓަށް އަރާ އަދުދަން ރައީސް ޔާމީން ފާހަގަކުރެއްވި އެވެ. އަދި ވިދާޅުވީ ދައުލަތުން އަމުރު ނެރެފައިވާ ގޮތަށް 53 މިލިއަން އެއަށް އަރާނެ ގޮތެއް އެމަނިކުފާނަށް ވިސްނިވަޑައިނުގަންނަވާ ކަމަށެވެ. 

ވ. އާރަށު މައްސަލައާއި ގުޅިގެން 52.95 މިލިއަން ރުފިޔާ ދެއްކުމަށް ކްރިމިނަލް ކޯޓުން އަމުރުކޮށްފައިވަނީ ރައީސް ޔާމީންގެ ޣައިރު ހާޒިރުގައެވެ. އެހެންކަމުން އެ މައްސަލައާއި ގުޅިގެން ބަހުސްކުރުމުގެ ފުރުސަތު ލިބިވަޑައިނުގަންނަވާކަމަށް ރައީސް ޔާމީން ވިދާޅުވިއެވެ. އަދި އެ އަދަދު ކަނޑައެޅި ގޮތް ސާފުކޮށްދޭން ޖެހޭކަމަށް އެމަނިކުފާނު ވިދާޅުވި އެވެ. 

އޭގެ އިތުރުން ރައީސް ޔާމީންގެ މައްޗަށް އާރަށު މައްސަލައިގައި ހުކުމް އިއްވިތާ 63 ދުވަސްފަހުން އަނެއްކާ އެމަނިކުފާނުގެ މައްޗަށް 53 މިލިއަން ރުފިޔާ ދައުލަތަށް ދެއްކުމަށް ކުރިމިނަލް ކޯޓުން އަމުރުކުރީ މަޤުބޫލު ސަބަބެއް އޮވެގެންކަން ދައުލަތަށް ކިޔާދެވިފައެއް ވެސް ނުވެއެވެ. 

ވ. އާރަށު މައްސަލައާއި ގުޅިގެން 52.95 މިލިއަން ދެއްކުމަށް ރައީސް ޔާމިނަށް ކުރި އަމުރުގެ އިސްތިއުނާފީ އަޑުއެހުންތައް މިއަދު ވަނީ ނިންމާލާފަ އެވެ. ދެން އެންމެ އަވަހަށް ބާއްވާ އަޑުއެހުމެއްގައި އެ މައްސަލައާއި މެދު ގޮތެއް ނިންމާނެކަމަށް ހައިކޯޓުން ވަނީ ބުނެފައެވެ.