މައިދާން ތައްޔާރު ވެއްޖެ ކަމަށާއި އެކުގައި ކުރިއަށް ނުދެވުނީތީ ހިތާމަ ކުރައްވާ ކަމަށް އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒް އިސްމާއިލް މިއަދު ވިދާޅުވެއްޖެ އެވެ.
ސަރުކާރުގެ ކޯލިޝަނުގެ މެމްބަރެއް ކަމަށްވާ ޖުމްހޫރީ ޕާޓީގެ ލީޑަރު، ރިޔާސީ އިންތިހާބުގައި ވާދަކުރައްވަން މިއަދު އިއުލާން ކުރެއްވުމާއި ގުޅިގެން ކުރެއްވި ޓުވީޓެއްގައި ފައްޔާޒު ވިދާޅުވީ ސިޔާސީ މައިދާނުގެ އަސްލު މަންޒަރު މަޑުމަޑުން ސާފުވަމުންދާ ކަމަށެވެ.
އަދި ހަނގުރާމައިގެ މައިދާން އޮތީ ތައްޔާރުވެފައި ކަން ފާހަގަކުރައްވައި ވިދާޅުވީ ކުރިންވެސް އެނގިތިބި ކަންކަން އިތުރަށް ސާފުވެއްޖެ ކަމަށެވެ.
މިއާއެކު އޭނާ ވިދާޅުވީ ކުރިއަށް އޮތީ ޝައުގުވެރި ދުވަސްތަކެއް ކަމަށާއި މި ދަތުރުގައި އެކުގައި ކުރިއަށް ނުދެވުމުން ހިތާމަކުރައްވާ ކަމަށެވެ.
"އިންޝާ الله 2023 އަދި ކާމިޔާބު އޮތީ އަހަރުމެންނަށް" ފައްޔާޒު ވިދާޅުވިއެވެ.
ރައީސް އިބްރާހިމް މުހައްމަދު ޞާލިހު ރިޔާސީ އިންތިހާބުގައި ވާދަކުރައްވަން ނިންމަވާފައި ވަނިކޮށް، ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީގެ ފަރާތުން އެ ޕާޓީގެ ލީޑަރު ގާސިމް އިބްރާހިމް އިންތިހާބުގައި ވާދަކުރައްވަން ވަނީ ނިންމަވައިފަ އެވެ.
އަދި ސަރުކާރު ކޯލިޝަންގައި އޮތް އެމްއާރުއެމް ވަކި ގޮތެއް އަދި ނުނިންމަ އެވެ.
މީގެ އިތުރުން ރިޔާސީ ޕްރައިމަރީއަށްފަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ ރައީސް ޞާލިހަށް ތާއީދު ނުކުރައްވަން ނިންމަވައި، "ފިކުރެއްގެ ދިރުން"ގެ ނަމުގައި ވަކި ހަރަކާތެއް ފަށްޓަވައިފަ އެވެ. އެ ގޮފީގެ މެންބަރުން އަންނަނީ ޖުމްހޫރީ ޕާޓީއާ އެކު ގިނަ މަޝްވަރާތައް ބާއްވަމުންނެވެ.
ރައީސް ޞާލިހަށް މިވަގުތު ތާއީދު ކުރަނީ އަދާލަތު ޕާޓީ އަދި އެމްޑީއޭއެވެ.
Advertisement
This content is created and paid for by advertisers and does not involve Voice Journalists
