ރައްޔިތުންގެ މަޖިލީހުގެ އިސްދޫ ދާއިރާގެ މެންބަރު އަލީ ހަމީދު، ޖުމްހޫރީ ޕާޓީ (ޖޭޕީ)ން ވަކިވެ، ވެރިކަން ކުރާ މައި ޕާޓީ އެމްޑީޕީއަށް މިއަދު ސޮއިކުރައްވައިފި އެވެ.

މުލިއާގޭގައި އަލީ ހަމީދު އެމްޑީޕީއަށް ސޮއިކުރައްވާފައިވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި އެމްޑީޕީގެ ޗެއާޕާސަން ފައްޔާޟް އިސްމާއިލް އާއި، ޑެޕިއުޓީ ޗެއާޕާސަން އިބްރާޙީމް ވަހީދާއި ފިނޭންސް މިނިސްޓަރު އިބްރާހިމް އަމީރުގެ އިތުރުން އެ ޕާޓީގެ މަޖިލީހުގެ މެންބަރުންގެ ތެރެއިން ރައީސް ޞާލިހުގެ ފެކްޝަނުގެ މެންބަރުންގެ ހާޒިރުގައެވެ. 

އަލީ ހަމީދު އެމްޑީޕީ އަށް ސޮއިކުރެއްވުމުން މަޖިލީހުގައި ހިމެނޭ 87 މެންބަރުންގެ ތެރެއިން އެމްޑީޕީ އަށް ނިސްބަތްވާ މެމްބަރުންގެ އަދަދު 67 އަށް އަރާނެއެވެ. 

Advertisement

ނަމަވެސް މިހާރު އެތަނުން އެއްބައި މެންބަރުންނަކީ ސަރުކާރާއި ދެކޮޅު، "ފިކުރެއްގެ ދިރުން" ފެކްޝަނުގެ މެންބަރުންނެވެ. 

އަލީ ހަމީދު ޖުމްހޫރީ ޕާޓީ ދޫކޮށްލާފައި މިވަނީ އެޕާޓީގެ ލީޑަރު ގާސިމް އިބްރާހިމް ރިޔާސީ އިންތިހާބުގައި ވާދަކުރައްވަން ނިންމެވުމުން ޕާޓީގެ ބައެއް މެންބަރުން ޕާޓީ ދޫކޮށްލަމުންދާ ދަނޑިވަޅެއްގައެވެ.