2021 ވަނަ އަހަރު އެމެރިކާގެ ނިއުޔޯކަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ކުރެއްވި ދަތުރުފުޅުތަކަށް ކުރެއްވި ޚަރަދުގެ ތަފްސީލުތައް ނުވަތަ ރަސީދުތައް ހާމަކޮށްފިކަމަށް ވާނަމަ އެމަނިކުފާނަށް ނުރައްކާވެދާނެ ކަމަށް ދައުލަތުން ބުނެފި އެވެ. 

ސެޕްޓެމްބަރު 2021 ގެ 18 އިން 26 ގެ ނިޔަލަށް ރައީސް އެމެރިކާއަށް ކުރެއްވި ދަތުރުފުޅުގެ ހަރަދު ހޯދަން "ދިޔަރެސް" ނޫހުން އެދުމުން ރައީސް އޮފީހުން ބުނީ އެ ދަތުރުފުޅަށް ޖުމްލަ ހަރަދުވީ 5،354،709.08 ރުފިޔާ ކަމަށެވެ.

އެހެން ނަމަވެސް އެ އަދަދުގެ ޞައްހަކަމާމެދު ސުވާލު އުފެދޭތީ އެ ނޫހުން ވަނީ ދަތުރުފުޅުތަކަށް ކުރި ޚަރަދުގެ ރަސީދު ހިއްސާކުރުމަށް އެދިފައެވެ. 

Advertisement

އެހެން ނަމަވެސް ރައީސް އޮފީހުން ވަނީ އެ ރަސީދުތައް ސިއްރުކުރުމަށް ނިންމާފަ އެވެ. އަދި ބުނެފައިވަނީ އެ ރަސީދުތައް ހާމަކުރުމަކީ އޭގެ ސަބަބުން ރައީސް ޞާލިހުއަށް ނުރައްކަލެއް ކުރިމަތިވެދާނެ ކަމަކަށް ވާނެތީ ރަސީދުތއް ހާމަކުރެވެން ނެތް ކަމަށެވެ. 

ރައީސް އޮފީހުން ރަސީދުތައް ހާމަނުކުރި މައްސަލަ ދިޔަރެސް ނޫހުގެ ފަރާތުން އިންފޮމޭޝަން ކޮމިޝަނަރުގެ އޮފީހަށް ހުށައަޅާފައިވާއިރު، އެ އޮފީހުން ވަނީ އުނިކުރަން ހުރި މައުލޫމާތު އުނިކޮށްފައި ނަމަވެސް ރަސީދުތައް ހިއްސާކުރުމަށް ރައީސް އޮފީހަށް އަންގާފަ އެވެ. ނަމަވެސް އެ ނިންމުމާ މެދު ހިތްހަމަނުޖެހޭތީ އިންފޮމޭޝަން ކޮމިޝަނަރުގެ ނިންމުން ދައުލަތުގެ ފަރާތުން ހައިކޯޓުގައި އިސްތިއުނާފުކުރި އެވެ.

މިއަދު އެ މައްސަލައިގެ އަޑުއެހުމެއް ހައިކޯޓުގައި ކުރިއަށް ގެންގޮސްފައިވާއިރު، ދައުލަތުން ބުނީ ރަސީދުތަކުގައި ޒާތީ މައުލޫމާތުތައް ހިމެނޭތީ ސަލާމަތީ ކަންކަމަށްޓަކައި އެ ރަސީދުތައް ހިއްސާކުރެވެން ނެތްކަމަށެވެ. 

ދައުލަތުން ބުނި ގޮތުގައި ރަސީދުތައް ހޯދަން ހުށަހެޅި ފަރާތުން ބޭނުންވަނީ ރައީސް ޓްރާންސިޓް ކުރެއްވި ތަންތަނާއި ހަރަދުކުރެއްވި ތަންތަން ހޯދާށެވެ.

ރައީސަކީ ދައުލަތުގެ އެންމެ އިސް ފަރާތް ކަމަށް ވާއިރު އެފަރާތް ދަތުރުކުރާ ރޫޓްތަކާއި ހިދުމަތް ހޯދާ ތަންތަނާއި ފަރިއްކުޅުއްވާ ތަކެއްޗާއި އެތަންތަނަކީ އާންމު ހާލަތުގައި އެ މައުލޫމާތު ބޭނުންކޮށްގެން އެފަރާތަށް ނުރައްކަލެއް ކުރިމަތިކުރުމުގެ ފުރުސަތު އޮތް ކަމެއް ކަމަށް ދައުލަތުން ވަނީ ބުނެފައެވެ. 

އަދި ތިންވަނަ ފަރާތެއްގެ ޒާތީ މައުލޫމާތު ހިމެނޭ ނަމަ އެ ފަރާތުގެ ރުހުމާއެކު މެނުވީ އެ މައުލޫމާތު ދޫކޮށްގެން ނުވާނެ ކަމަށް ގާނޫނުގެ 23 ވަނަ މާއްދާގައި އޮންނަ ކަމަށާއި އެހެންކަމުން 23 ވަނަ މާއްދާއާއި 26 ވަނަ މާއްދާއަށް ރިއާޔަތްކޮށް މައުލޫމާތު ހިފެހެއްޓުމުގެ ބާރު ރައީސް އޮފީހަށް އޮތްކަންވެސް ދައުލަތުން ވަނީ ފާހަގަކޮށްފަ އެވެ. 

އެ މައްސަލައާއި ގުޅިގެން އިންފޮމޭޝަން ކޮމިޝަނަރުގެ އޮފީހުން ބުނީ ރަސީދުތައް ހާމަކުރުމަށް އެދިފައިވަނީ ޒާތީ މައުލޫމާތުތައް އުނިކުރުމަށްފަހުގައި ކަމަށެވެ. އަދި އެފަދައިން ރަސީދުތައް ހާމަކުރުމަކީ ރައީސަށް ނުރައްކަލެއް ކުރިމަތިވާނެ ސަބަބެއް ނޫންކަން ފާހަގަކޮށްފައި ވެއެވެ. 

ނިއުޔޯކު ދަތުރުފުޅުގެ ރަސީދުތައް ހާމަކުރުމާއި ގުޅޭގޮތުން ހައިކޯޓުގައި ކުރިއަށް ގެންދިޔަ އަޑުއެހުންތައް މިއަދު ވަނީ ނިންމާލާފައެވެ. ދެން އަންނަ މަޖިލީހެއްގައި ރަސީދުތައް ހާމަކުރުމާއި ނުކުރުމުގެ މައްޗަށް ހައިކޯޓުން ގޮތެއް ކަނޑައަޅާނެ އެވެ.