ރައީސުލުޖުމްހޫރިއްޔާގެ އިބްރާޙީމް މުހައްމަދު ޞާލިހު ގެ  މޮޓޯކޭޑަށް އިދިކޮޅު ޕީޕީއެމް/ޕީއެންސީން ހުރަސްއެޅު މައްސަލާގައި ޒިންމާ ނުނަންގަވައި ރައީސުލްޖުމްހޫރިއްޔާ ވަޑައިގަންނަވާނެ ރޫޓު ކަނޑައެޅުއްވުމަކީ ދިފާއީ ވަޒީރެއް ކުރައްވާކަމެއް ނޫން ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ. 

ބައިނަލްއަޤްވާމީ އަންހެނުންގެ ދުވަސް ފާހަގަކުރުމަށް މިދިޔަ މަހު ހުޅުމާލޭގައި ހުންނަ ޢުމަރު ޒާހިރު އޮފީސް އިމާރާތުގައި ބޭއްވެވި ޖަލްސާގައި ބައިވެރިވެ ވަޑައިގެންނެވުމަށްފަހު ރައީސުލްޖުމްހޫރިއްޔާ ގެކޮޅަށް ވަޑައިގެންނެވި މަގުމަތިން އިދިކޮޅު މުޒާހަރާގެ ބައިވެރިން ވަނީ ޕީޕީއެމް އޮފީސް ސަރަހައްދުން ރައީސްގެ މޮޓޯކޭޑަށް ހުރަސް އަޅާފައެވެ.

އިދިކޮޅު ސަޕޯޓަރުން މޮޓޯކޭޑަށް ހުރަސްއަޅާފައިވަނީ ފުލުހުންނާއި ސިފައިންގެ ހާޒިރުގައެވެ. 

އެ މައްސަލާގައި ގިނަ ބައެއްގެ ފާޑުކިޔުންތައް މާރިޔާއަށް އަމާޒު ވެފައިވާއިރު، އެކަމާއި ގުޅިގެން މާރިޔާ މަޖިލީހަށް ހާޒިރުކޮށް، މަގާމުން ވަކިކުރުމަށް ގޮވާލައި ކުއްލި މައްސަލަ އެއްވެސް އިދިކޮޅުން މަޖިލީހަށް ހުށަހެޅިއެވެ. 

އެ މައްސަލަ މަޖިލީހުން ބޭރުކޮށްލާފައިވާއިރު މިއަދުގެ މަޖިލީހުގެ ޖަލްސާގައި މާވަށު ދާއިރާގެ މެންބަރު މުހައްމަދު ސައީދު ވަނީ އެކަމާއި ގުޅިގެން މާރިޔާ އާއި ސުވާލު ކުރައްވާފައެވެ. 

އެގޮތުން، ރައީސްގެ މޮޓޯކޭޑަށް ދިމާވި ހާލަތަކީ ދުރާލައި ރާވައިގެން ހިނގިކަމެއްގެ ގޮތުގައި ބެލެވޭތޯ އާއި ސިލްސިލާކޮށް މުޒާހަރާތައް ކުރިޔަށް ގެންދާ ތަނެއްގެ ކައިރިން މޮޓޯކޭޑު ދިއުމަށް ނިންމާފައިވާ ނިންމުމަކީ އެއީ ގަސްތުގައި ކުރެއްވި ކަމެއްތޯ ސައީދު ސުވާލު ކުރެއްވި އެވެ.

ސައީދުގެ ސުވާލަށް ސީދާ ޖަވާބެއް ދެއްވުމަށް ދެކޮޅު ހައްދަވައި މާރިޔާ ވަނީ އޭނާ އާއި ސުވާލު ކުރެވޭނީ އޭނާގެ ރަސްމީ މަސްއޫލިއްޔަތާއި މަސައްކަތްތަކާއި ގުޅޭގޮތުން ކަމަށް ވިދާޅުވެފައެވެ.

ރައީސުލްޖުމްހޫރިއްޔާގެ ސެކިއުރިޓީ ފެއިލްވިގޮތް ބެލުމަށް 241 ކޮމެޓީއިންވެސް ވަނީ މަސައްކަތް ފަށައިފައެވެ. އަދި ރައީސުލްޖުމްހޫރިއްޔާގެ ސެކިއުރިޓީ ކަންކަން ބެލެހެއްޓުމުގައި އިސްކޮށް ހުންނެވި ކާނަލް އަބްދުالله އިބްރާހިމް ވެސް ވަނީ މަގާމުން ސަސްޕެންޑުކޮށްފަ އެވެ.