ސަރުކާރު ކޯލިޝަނުގައި 2 ރިޔާސީ ކެންޑިޑޭޓުން ތިބުމަކީ ސަރުކާރު ހިންގުމަށް ދަތިވާނެ ކަމެއްކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.
މިއުވާން މިފަދައިން ވިދާޅުވެފައިވަނީ ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ.
މިއަދުގެ ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ޖުމްހޫރީ ޕާޓީން ކުރިއަށް އޮތް ރިޔާސީ އިންތިޚާބުގައި ވާދަކުރަން ނިންމުމުން، ދެން ޖޭޕީގެ މަގާމުތަކުގައި ތިއްބަވާ ފަރާތްތައް ވަޒީފާއިން ވަކިކުރައްވާނެތޯ ސުވާލުކޮށްފަ އެވެ.
އެ ސުވާލަށް ޖަވާބުދެއްވަމުން މިއުވާން ވިދާޅުވީ ސަރުކާރު ކޯލިޝަންގައި 2 ރިޔާސީ ކެންޑިޑޭޓުން ތިބުމަކީ ސަރުކާރު ހިންގަން ދަތިވާނެ ކަމެއްކަމަށެވެ. އެވާހަކަ ކުރިންވެސް ދެކެވިފައިވާކަމަށް އޭނާ ވިދާޅުވިއެވެ.
"ކުރިންވެސް ދެންނެވި ގޮތަށް ޖުމްހޫރީ ޕާޓީން ރިޔާސީ އިންތިޚާބަށް ނިކުމެއްޖެނަމަ ޖޭޕީއާއެކު މަޝްވަރާކޮށް މަޤާމުތަކުގައި ތިއްބެވި ބޭފުޅުންގެ ކަންކަމާއި ގުޅޭގޮތުން މަޝްވަރާ ކުރުމަށްފަހު ގޮތެއް ނިންމަވާނެކަމަށް. އެއާއެކު އަދިވެސް ދަންނަވާފާނަން. ތަކުރާރު ވެސް ކޮށްލާނަން. އެއް ސަރުކާރެއްގައި ރިޔާސީ އިންތިޚާބުގައި ވާދަކުރައްވާ ދެ ކެންޑިޑޭޓުން ތިބެގެން ސަރުކާރު ހިންގަން ދަތިވާނެ"
ރައީސް އޮފީހުގެ ތަރުޖަމާނު މުއިވާން މުޙައްމަދު
އެކަން ފާހަގަކުރައްވާ މިއުވާން ވިދާޅުވީ ޖުމްހޫރީ ޕާޓީގެ ސްލޮޓުތަކުގައި ތިއްބެވި ފަރާތްތައް މަޤާމުތަކުން ވަކިކުރުމާއި މެދު ޖޭޕީއާއި މަޝްވަރާ ކުރާނެކަމަށެވެ. އަދި ކަނޑައެޅިގެން އެ ފަރާތްތައް ވަޒީފާއިން ވަކިކުރުމާމެދު ގޮތެއް ނިންމާނީ މަޝްވަރާ ކުރުމަށްފަހު ކަމަށް މިއުވާން ވިދާޅުވި އެވެ.
ޖުމްޙޫރީ ޕާޓީގެ ލީޑަރު ޤާސިމް އިބްރާހިމް ރިޔާސީ އިންތިޚާބުގައި ވާދަކުރައްވަން ނިންމަވާ އެކަން ރަސްމީކޮށް ޢިއުލާނު ކުރެއްވުމާއެކު ޖޭޕީގެ ބައެއް ވަޒީރުންނާއި ސަރުކާރުގެ އިސް މަގާމުތަކުގައި ތިއްބެވި ބައެއް ފަރާތްތައް ވަނީ ޖޭޕީން ވަކިވެވަޑައިގެން ރައީސް ޞާލިހަށް ތާއީދުކުރަން ނިންމަވާފައިވާކަން އިއުލާނުކުރައްވާފަ އެވެ.
ޖޭޕީގެ ސްލޮޓުތަކުގައި ސަރުކާރުގައި ތިއްބެވި ފަރާތްތައް މަޤާމުން އިސްތިއުފާދެމުންދާ މައްސަލައިގައި ޖޭޕީގެ ލީޑަރު ޤާސިމް އިބްރާހިމް ވަނީ ނުރުހުން ފާޅުކުރައްވާފަ އެވެ. އެގޮތުން ޤާސިމް ސަރުކާރުގެ މަޤާމުތަކުގައި ތިއްބެވި ފަރާތްތައް ޖޭޕީން އިސްތިއުފާދެއްވަމުން ދަނީ މަޤާމު ދިފާއުކުރެއްވުމަށް ކަމަށެވެ.
ސަރުކާރު ކޯލިޝަނާއި ގުޅޭގޮތުން މިއުވާން އިތުރަށް ވިދާޅުވީ އިޚްލާސްތެރިކަމާއެކު ސަރުކާރަށް ޚިދުމަތް ކުރުމަށް ބެނުންވާ ސިޔާސީ ޕާޓީތަކަށް އެފުރުސަތު އޮތް ކަމަށެވެ. އަދި އެފަދަ ފަރާތްތަކާއެކު ކޯލިޝަން ދެމެހެއްޓުމަށް ރައީސް ޞާލިހު މަސައްކަތްޕުޅު ކުރައްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
