ކުޅިވަރު ސާމާނު އުފައްދާ ކުންފުންޏެއް ކަމުގައިވާ "ޕޫމާ" އާ ދެކޮޅަށް ދުނިޔޭގެ އެކި ކަންކޮޅުތަކުގައި ފަށާފައިވާ ކެމްޕޭން ވަރުގަދަ ކޮށްފިއެވެ.
"ބޮއިކޮޓް ޕޫމާ" ގެ ނަމުގައި މި ކެމްޕޭން ކުރިއަށްގެންދާ އެކްޓިވިސްޓުން ބުނާ ގޮތުގައި، ފަލަސްތީނުގެ ބިން އިސްރާއީލުން ފޭރިގަތުމަށް ޕޫމާއިން ވާގިވެރިވެ އެއްބާރުލުން ދެއެވެ. އަދި އެއީ އިންސާނީ ހައްގުތަކާއި ބައިނަލްއަގުވާމީ ގާނޫނު މުގުރާލުން ކަމުގައި އެކްޓިވިސްޓުން ބުނެއެވެ.
ޕޫމާ އަކީ އިސްރާއީލް ފުޓްބޯލް އެސޯސިއޭޝަން (އައިއެފްއޭ) އެ އެއް ސްޕޮންސަރެވެ. އެ ސްޕޮންސަރޝިޕްގައި، ގާނޫނާ ހިލާފަށް ފަލަސްތީނުގެ ބިމުގައި ވަޒަންވެރިވެފައިވާ އިސްރާއީލުގެ ފުޓްބޯޅަ ޓީމު ހިމެނެއެވެ.
އިސްރާއީލު ފަދަ، އެހެން ގައުމެއްގެ ބިން ހިފައި، އެ ތަންތަނުގައި އުޅޭ ފުޓްބޯޅަ ޓީމާމެދު ފިޔަވަޅު އެޅުމަށް ހިއުމަން ރައިޓްސް ވޮޗް (އެޗްއާރްޑަބްލިޔު)އިން ވަނީ ފީފާގައި އެދިފައެވެ.
ހިއުމަން ރައިޓްސް ބޮޑީއިން ބުނެފައިވާ ގޮތުގައި އިސްރާއީލް ފުޓްބޯޅަ ޓީމުން އެމީހުންގެ 'ހޯމް ގޭމް' ކުޅެނީ ގާނޫނާ ހިލާފަށް ހިފާފައިވާ ފަލަސްތީނުގެ ބިމުގައި ކަމަށާއި އެތަނަކީ ފަލަސްތީނު މީހުންނަށް ކުޅުން މަނާ، ކޯޗު ކޮށްދިނުން މަނާ، އަދި ބަލައިލުމަށް ދިއުން ވެސް މަނާ ތަނެއް ކަމަށެވެ.
އިސްރާއީލް ފުޓްބޯޅަ ޓީމާއެކު ޕޫމާއިން އެއްބަސްވުމުގައި ސޮއިކުރީ 2018 ވަނަ އަހަރުއެވެ. ހަތަރު އަހަރުގެ، މިލިއަން ޑޮލަރުގެ މި އެއްބަސްވުމުގެ ދަށުން އިސްރާއީލް ފުޓްބޯޅަ ޓީމުތަކުގެ އޮފިޝަލް ކިޓް ޕާޓްނަރަކީ ޕިއުމާއެވެ.
އެކްޓިވިސްޓުން ބުނާ ގޮތުގައި، އިސްރާއީލުން ފޭރިގަނެފައިވާ ފަލަސްތީނު ބިންތަކުގައި ޕިއުމާގެ އެހީތެރިކަމާއި ސްޕޮންސަޝިޕްގެ ދަށުން ފަލަސްތީނު ޓީމުމަތަށް ފުޓުބޯޅަ ދަނޑުތައް ހަދާފައިވެއެވެ.
Advertisement
This content is created and paid for by advertisers and does not involve Voice Journalists
