ރ ފުއްގިރި މައްސަލައިގެ ޝަރީއަތުގެ ކުރިން ހުށައަޅާ ހެކި ބަލައިގަތުމާއި ގުޅޭގޮތުން ރައީސް އަބްދުالله ޔާމީން އަބްދުލްގައްޔޫމުގެ ފަރާތްޕުޅުން ހުށައަޅާފައިވާ މައްސަލައިގެ އިސްތިއުނާފީ އަޑުއެހުމަށް މާދަމާއަށް ތާވަލުކޮށްފި އެވެ.
ރައީސް ޔާމީންގެ ފަރާތުން ހައި ކޯޓުގައި އިސްތިއުނާފު ކޮށްފައިވާ މައްސަލައަކީ، ކްރިމިނަލް ކޯޓަށް ޝަރީއަތުގެ ކުރިން ހުށަހަޅާ ހުށަހެޅުންތަކުގެ ގޮތުގައި ޔާމީން ހުށަހެޅުއްވި ގިނަ ހުށަހެޅުންތަކެއް ބަލައިނުގަތުމަށް އެ ކޯޓުގައި މައްސަލަ ބައްލަވާ ގާޒީ އަލީ ނަދީމް ނިންމެވި ނިންމުން ބަދަލުކޮށްދިނުމަށް އެދި ހުށަހެޅި މައްސަލައެކެވެ.
އެ މައްސަލައިގައި ހައިކޯޓުން ވަކި ގޮތެއް ނިންމަންދެން ދަށު ކޯޓުގައި އޮތް ފުއްގިރި މައްސަލަ މަޑުޖައްސާލުމަށް ހައިކޯޓުން ވަނީ ކްރިމިނަލް ކޯޓަށް އަންގާފައެވެ.
އެ މައްސަލައިގައި މާދަމާ އޮންނަ އަޑުއެހުމުގައި ރައީސް ޔާމީންގެ ފަރާތްޕުޅުން ފުއްގިރި މައްސަލައިގެ ޝަރީއަތުގެ ކުރިން ހުށައަޅަން ޖެހޭ ލިޔެކިޔުންތައް ބަލައިގަތުމާމެދު ގޮތެއް ނިންމާނެއެވެ.
އެ މައްސަލައިގެ އިތުރުންވެސް ހައިކޯޓުގައި ރައީސް ޔާމިނުގެ ދެ މައްސަލައެއް އެބައޮތެވެ.
އެއް މައްސަލައަކީ ވ. އާރަށުގެ މުއާމަލާތާއި ގުޅުވާ ރައީސް ޔާމިންގެ މައްޗަށް އުފުލާފައިވާ ދައުވާތައް ސާބިތުވާކަމަށް ކަނޑައަޅާ އިއްވި ހުކުމާއި ގުޅޭ މައްސަލައެވެ.
ދެން އޮތީ އެ ހުކުމް ކުރިތާ 62 ދުވަސް ފަހުން އެމަނިކުފާނުގެ މައްޗަށް 53 މިލިއަން ރުފިޔާ ޖޫރިމަނާގެ ގޮތުގައި 6 މަސްތެރޭ ދެއްކުމަށް ކްރިމިނަލް ކޯޓުން ކުރި އަމުރާއި ގުޅިގެން އިސްތިއުނާފުކުރި މައްސަލައެވެ.
މި ދެ މައްސަލައިގައިވެސް ކޯޓުން ވަރަށް އަވަހަށް ގޮތެއް ކަނޑައަޅާނެއެވެ.
ރައީސް ޔާމިނުގެ ޤާނޫނީ ވަކީލުން ވިދާޅުވަނީ އާރަށުގެ މައްސަލައާއި ގުޅިގެން ރައީސް ޔާމިނުގެ މައްޗަށް ކޮށްފައިވާ ހުކުމުގައި ބޮޑެތި ގޯސްތަކެއް ހުރިކަމަށެވެ. އެ މައްސަލަ އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާއިރު ހައިކޯޓު މަރުހަލާއިން ރައީސް ޔާމިން މިނިވަންވެ ވަޑައިގަންނަވާނެކަމުގެ ފުރިހަމަ ޔަގީންކަން އޮތްކަމަށް ޤާނޫނީ ޓީމުން ދަނީ ވިދާޅުވަމުންނެވެ.
Advertisement
This content is created and paid for by advertisers and does not involve Voice Journalists
