ކުރު މުއްދަތެއްގެ ތެރޭގައި ރައްޔިތުންނަށް ބޮޑެތި ޚިދުމަތްތަކެއް ކޮށްދެއްވި ކުރީގެ ރައީސް އަބްދުﷲ ޔާމީން އަބްދުލްގައްޔޫމު މި ރޯދަމަހު ވެސް ޖަލުގެ ކުޑަގޮޅީގައި ބޭއްވުމަކީ އިންސާފެއް ނޫންކަމަށް މާލޭ ސިޓީ ކައުންސިލްގެ މައްޗަންގޯޅި މެދު ދާއިރާގެ ކައުންސިލަރު އަހުމަދު ޒަމީރު ވިދާޅުވެއްޖެ އެވެ. 

ޒަމީރު މިފަދައިން ވިދާޅުވެފައިވަނީ ޖަލު ހުކުމެއް ތަންފީޒުކުރައްވަމުންދާ ކުރީގެ ރައީސް ޔާމިނަށް ރޯދަމަހަށް ވެސް ސަރުކާރުން އެމަނިކުފާނަށް ލުޔެއް ދެއްވާފައި ނުވާތީ އެމަނިކުފާނުގެ ސަޕޯޓަރުން ކަންބޮޑުވުން ފާޅުކުރަމުންދާ ދަނޑިވަޅެއްގައި ކުރެއްވި ޓްވީޓެއްގަ އެވެ. 

ރައީސް ޔާމީނުގެ އެންމެ ކާމިޔާބު އެއް މަސައްކަތް ކަމަށްވާ ހުޅުމާލެ ބްރިޖު ފެނިގެންދާ ފޮޓޯއެއް ހިއްސާކުރައްވާ ޒަމީރު ކުރެއްވި އެ ޓްވީޓުގައި ވިދާޅުވީ ރައީސް ޔާމީނުގެ ވެރިކަމުގައި ހުޅުމާލޭ ދެވަނަ ދިޔަވަހި ހިއްކަވާ ރައްޔިތުންނަށް ބޭނުންޖެހިފައިވާ ބޯހިޔާވަހިކަމުގެ މައްސަލައަށް ޙައްލު ހޯއްދަވާދެއްވުމަށް 16 ޓަވަރު އަޅުއްވާ ދެއްވާފައިވާ ކަމަށެވެ. 

Advertisement

ފަސް އަހަރުގެ ކުރު މުއްދަތެއްގެ ތެރޭގައި ހުޅުމާލޭގެ ދެވަނަ ދިޔަވަހި ހިއްކާ ފްލެޓުތައް އެޅުއްވުމަށްފަހު މާލެއާއި ހުޅުމާލެ ގުޅާލުމަށް ބްރިޖެއް އަޅުއްވާދެއްވާފައި ވާއިރު، އެ ޚިދުމަތްތައް މިހާރުވެސް ރައްޔިތުން ހޯދަމުންދާކަން އޭނާ ފާހަގަކުރެއްވި އެވެ.

އަދި ރައީސް ޔާމިން ކޮށްދެއްވި އެ ޚިދުމަތްތަކުގެ ސަބަބުން ރައްޔިތުންނަށް ބޮޑެތި ލުއި ފަސޭހަތަކެއް ލިބެމުންދާކަންވެސް ފާހަގަކުރެއްވި އެވެ. 

އެކަންކަން ފާހަގަކުރައްވާ ޒަމީރު ވިދާޅުވީ ރައްޔިތުންނަށް އެފަދަ އަގުރުހި ޚިދުމަތްތަކެއް ކޮށްދެއްވި ލީޑަރަކި މި ރޯދަމަހުވެސް އޮންނަވަން ޖެހިވަޑައިގަންނަވަނީ ޖަލުގެ ކުޑަ ގޮޅީގައި ކަމަށެވެ. 

އެހެންކަމުން އެއީ އިންސާފުވެރި ގޮތެއްކަމަށް ދެކެވަޑައި ނުގަންނަވާކަމަށް ޒަމީރު ވިދާޅުވި އެވެ. 

ރޯދަމާހައި ދިމާކޮށްވެސް ރައީސް ޔާމިނަށް ސަރުކާރުން ކުޑަވެސް ލިޔެއް ދެއްވާފައިނުވާތީ އެމަނިކުފާނުގެ ސަޕޯޓަރުން ގެންދަނީ ބޮޑެތި ކަންބޮޑުވުންތަކެއް ފާޅުކުރަމުންނެވެ. އަދި އެމަނިކުފާނު މިނިވަންކުރުމަށް ގޮވާލާ ސިލްސިލާގޮތެއްގައި އެމަނިކުފާނުގެ ސަޕޯޓަރުން ގެންދަނީ މުޒާހަރާކުރަމުން ނެވެ.