ހުޅުމާލޭ ދެވަނަ ފިޔަވަހީގައި އިތުރު ދާއިމީ މިސްކިތެއް ޤާއިމު ކުރުމަށް އިންޓަނޭޝަނަލް ޗެއިން މޯލްޑިވްސްއާ ހަވާލު ކޮށްފިއެވެ.

މި އެއްބަސް ވުމުގެ ދަށުން ދެވަނަ ފިޔަވަހީގެ ލޮޓް ނަންބަރު 20243 ގައި ޤާއިމު ކުރެވޭ މި މިސްކިތަކީ 11،643.74 އަކަފޫޓުގެ ޖާގައިގެ މިސްކިތެއް ކަމަށް އަރބަންކޯއިން މައުލޫމާތު ދެއެވެ.

ޖުމްލަ 521 މީހުންގެ ޖާގައިގެ މި މިސްކިތުގައި ތިން ފަންގިފިލާ ހެދުމަށް ވަނީ ހަމަޖެހިފައެވެ.

އެއްބަސްވުމުގައި ސޮއިކުރުމަށް މިއަދު އަރބަންކޯ ގައި ބޭއްވި ރަސްމިއްޔާތުގައި އައިސީއެމްޕީއެލް ގެ ފަރާތުން ސޮއި ކުރެއްވީ އެ ،ުންފުނީގެ މެނޭޖިންގ ޑިރެކްޓަރ މުހައްމަދު ފަޔާޒުއެވެ. އަދި އަރބަންކޯގެ ފަރާތުން ސޮއި ކުރެއްވީ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު އާތިފެވެ.

ހުޅުމާލޭ ދެވަނަ ފިޔަވަހީގައި އަލަށް މީހުން އާބާދު ވެގެން އަންނަ އިރު، ބޭނުންވާނެ މިސްކިތްތައް ޤާއިމު ކުރުމުގެ ތެރެއިން، މިއަދު ސޮއި ކުރެވުނު މިސްކިތް ހިމަނައިގެން ޖުމްލަ ހަތް މިސްކިތެއްގެ މަސައްކަތް ހަވާލު ކުރެވި، ގިނަ މިސްކިތްތަކުގެ އަމަލީ މަސައްކަތްތައް ފެށިފައި ވާކަމަށް އަރބަންކޯއިން މައުލޫމާތު ދެއެވެ.

ދެވަނަ ފިޔަވަހީގައި މިވަގުތު ހުރީ ދާއިމީ އެންމެ މިސްކިތެކެވެ. އެއީ އަމިއްލަ ފަރާތަކުން އިމާރާތް ކޮށްފައިވާ މިސްކިތެކެވެ.

ހުޅުމާލެ އަކީ ހުޅުމާލޭގައި ދިރިއުޅޭ އެންމަހާ ފަރާތްތަކަށާއި އެކި ބޭނުންތަކަށް ހުޅުމާލޭ ޒިޔާރަތް ކުރާ ފަރާތްތަކަށް ބޭނުންވާނެ ހުރިހާ ބެނުންތަކެއް ހިމެނިގެން ތަރައްޤީ ކުރެވޭ ރަށަކަށް ހެދުމަށް އަރބަންކޯގެ ފަރާތުން ދަނީ ގިނަ މަސައްކަތްތަކެއް ކުރަމުންނެވެ.