މާރސީ ގެ "ހަދިޔާ ވަށި" މެދުވެރިކޮށް ހާލުގައި ދިރިއުޅެމުންދާ 30 ޢާއިލާ އަކަށް އެހީތެރިކަން ފޯރުކޮށްދީފި އެވެ. 

މާރސީގެ ހަދިޔާވަށި ޕްރޮގްރާމަކީ، މަތިވެރި ރަމަޟާން މަހުގައި، މި ކުޑަ މުޖުތަމަޢުގައި ދަތި ޙާލުގައި ދިރިއުޅޭ ފަރާތްތަކާއި، ކިރިޔާވެސް ފުދިގެން އުޅޭ ފަރާތްތަކަށް ޞަދަޤާތްކުރެވޭނެ މަގެއް ހުޅުވައި، މުޖުތަމަޢުން އެއްވެސް ބަޔަކު ބާކީ ނުކޮށް، އެކަކު އަނެކަކަށް އެހީތެރިވެ ހެދުމަކީ އުފަލަކަށް ހެދުމުގެ މަގުސަދު ގައި އެ ޖަމިއްޔާ އިން ކުރިއަށް ގެންދާ ޕްރޮގްރާމެކެވެ. 

މިޕްރޮގްރާމްގެ ދަށުން މި ރަމަޟާން މަހުގައި މިހާތަނަށް 17 ޢާއިލާ އަކަށް 1,500 ރުފިޔާގެ މާލީ އެހީ ފޯރުކޮށްދެވިފައިވާ ކަމަށް މާރސީ އިން މައުލޫމާތު ދެއެވެ. އަދި އިތުރު 13 ޢާއިލާ އަށް މިރޭގެ ވަގުތެއްގައި އެހީ ފޯރު ކޮށްދެވޭނެ ކަމަށް އެ ޖަމިއްޔާ އިން ބުނެއެވެ.

Advertisement

އެ ޢާއިލާ ތަކަށް އެހީ ފޯރުކޮށްދީފައިވަނީ ޢާއިލާ ތަކުގެ ހާލަތު ރަނގަޅަށް ބެލުމަށްފަހުގައި ކަމަށްވެސް މާރސީ އިން ފާހަގަކޮށްފައިވެއެވެ. 

މިއީ މާރސީގެ ހަދިޔާ ވަށި ޕްރޮގްރާމް ބާއްވަމުންދާ 5 ވަނަ އަށްވީ އަހަރެވެ. މިއަހަރުވެސް އެ ޖަމިއްޔާގެ އަމާޒަކީ 30 ޢާއިލާ އަކަށް 1,500 ރުފިޔާގެ އެހީ ފޯރުކޮށްދިނުން ކަމުގައި މީގެ ކުރިން އެ ޖަމިއްޔާ އިން ބުނެފައިވާއިރު، އެ ޓާގެޓާއި އެއްގޮތަށް 30 ޢާއިލާ އަކަށް އެހީ ފޯރުކޮށްދެވިގެންދާނެ ކަން މިއަދު އެވަނީ ހާމަކޮށްދީފައެވެ.

މާރސީއަކީ، 2019 ވަނަ އަހަރުގެ ޖޫން މަހުގެ ތެރޭގައި ޔޫތު މިނިސްޓްރީގައި ރަޖިސްޓްރީކޮށްގެން ހިންގާ އަމިއްލަ ޖަމްޢިއްޔާއެކެވެ. ޖަމްޢިއްޔާއަކަށް ވުމަށްފަހުގައާއި އޭގެ ކުރިންވެސް މާރސީގެ ފަރާތުން ވަނީ އެހީތެރިކަން ބޭނުންވެފައިވާ އެކި ފަރާތްތަކަށް އެހީތެރިކަން ފޯރުކޮށްދީފައެވެ. ޚާއްޞަގޮތެއްގައި އެކިއެކި ފަންޑްރައިޒް އިވެންޓްތަކުން ގިނަ ޢަދަދެއްގެ އެހީތެރިކަން އެކި ފަރާތްތަކަށް ފޯރުކޮށްދީފައިވެއެވެ.