ޔުއެފާ ޗެމްޕިއަންސްލީގުގެ ކުއާޓަރ ފައިނަލްގެ ފުރަތަމަ ލެގުގައި މިރޭ ރަށުން ބޭރުގައި ޕޯޗުގަލްގެ ބެންފީކާ 2-0 ގެ ނަތީޖާއަކުން ބަލިކޮށް އިންޓަރ މިލާނުން މުބާރާތުގެ ސެމީ ފައިނަލުގެ ފުރުސަތު ބޮޑުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަަމަ ހާފުގެ 16 ވަނަ މިނެޓުގައި ބެންފީކާ ޕޯޗުގަލްގެ މިޑްފީލްޑަރު ރަފާ ސިލްވާއަށް މުޅިން ހުސްކޮށް ހުރެ ފޮނުވާލި ހަމަލާ އިންޓަރ މިލާންގެ ކެމަރޫން ގޯލްކީޕަރު އަންދްރޭ އޮނާނާ ވަނީ ދިފާއުކޮށްފައެވެ.

މިހާފުގައި އިންޓަރ މިލާނުން އެންމެ ހުސް ފުރުސަތެއް ލިބުނީ އެޓީމުގެ ޑިފެންޑަރު ފްރާންސެސްކޯ އަސެރްބީ އަށެވެ. ފުރަތަަމަ ހާފުގެ 25 ވަނަ މިނެޓުގައި އޭނާ ފޮނުވާލި ބާރު ހަމަލާ ގޯލާއި އަމާޒުނުވެ ދަނޑިކައިރިން ބޭރަށް ދިޔައިރު، ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި ދެޓީމު އެއްވަރުވެގެންނެވެ.

ދެވަަނަ ހާފްގައި އިންޓަރ މިލާނުން ވަނީ އެޓީމުގެ ކުޅުން ރަނގަޅުކޮށް ވަރަށް ކުރީކޮޅު މެޗުގެ ލީޑު ނަގާފައެވެ. މި ލަނޑު ދެވަނަ ހާފުގެ 51 ވަނަ މިނެޓުގައި އެޓީމަށް ކާމިޔާބުކޮށްދިނީ އިޓަލީގެ މިޑްފީލްޑަރު ނިކޮލޯ ބަރޭލާއެވެ. މިއީ އެޓީމުގެ ޑިފެންޑަރު އަލްސެންދްރޯ ބަސްޓޯނީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި އިންޓަގެ ދެވަަނަ ލަނޑު ފަހު ހާފުގެ 82 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ އެޓީމުގެ ބެލްޖިއަމް ފޯވާޑް ރޮމެލޫ ލުކާކޫ އެވެ. މިއީ ބެންފީކާގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ އެޓީމަށް ދިން ޕެނަލްޓީއެކެވެ.

ދެ ލަނޑުގެ ލީޑެއް އިންޓަރ މިލާނުން އޮވެ މެޗު ނިމެން ދަނިކޮށް ދެވަނަ ހާފުގެ އިތުރު ވަގުތުގެ ތެރޭގައި ނަތީޖާގެ ފަރަގު ކުޑަކޮށްލުމަށް ބެންފީކާގެ ޒުވާން ފޯވާޑް ގޮންކާލޯ ރާމޯސްއަށް ވަނީ ރަނުގެ ފުރުސަތެއްލިބި ބޭނުންނުކުރެވިފައެވެ.

މިރޭގެ މެޗު 2-0 ގެ ނަތީޖާއަކުން އިންޓަރ މިލާން ކާމިޔާބުކުރުމުން މި މަހުގެ 20 ވަނަ ދުވަހުގެ ރޭ އިޓަލީގައި ކުޅޭ ދެވަަނަ ލެގު އެއްވަރުކޮއްލައިގެންވެސް ސެމީއަށް ދިއުމުގެ ފުރުސަތު މިހާރު އިންޓަރ މިލާނަށް އެބައޮތެވެ.

މިދެޓީމު އެންމެ ފަހުން ޗެމްޕިއަންސްލީގުގައި ވާދަކޮށްފައި ވަނީ 2004 ވަނަ އަހަރުގެ މުބާރާތުގެ ދެވަަނަ ބުރުގައެކެވެ. އެފަހަރު ބެންފީކާގެ ދަނޑުގައި ދެޓީމު އެއްވަރުވިއިރު، އިންޓަރ މިލާނުގެ ދަނޑުގައި ކުޅުނު ދެވަނަ ލެގު އެޓީމުން ކާމިޔާބުކުރީ 4-3 ގެ ނަތީޖާއަކުންނެވެ.