ކްރިސްޓިއާނޯ ރޮނާލްޑޯ ކުޅެމުން އަންނަ ސައުދީ ޕްރޮފެޝަނަލް ލީގުގެ ކުލަބު އަލް ނަސްރު އިން އެޓީމުގެ ކޯޗު ރުޑީ ގާސިއާ މަގާމުން ވަކިކޮށްފި ކަމަށް ސްޕޭނުގެ ކުޅިވަރު ނޫހެއް ކަމަށްވާ މާސާ އިން ރިޕޯޓް ކޮށްފިއެވެ.
އުމުރުން 59 އަހަރުގެ ގާސިއާ އަލް ނަސްރުގެ ކޯޗުކަމާއި ހަވާލުވީ 2022 ވަނަ އަހަރުގެ ޖޫންމަހު ތެރޭގައެވެ. އޭގެކުރިން އޭނާ ވަނީ ފުރާންސްގެ މާސޭ، ލިޔޯން، ލިއްލެގެ އިތުރުން އިޓަލީގެ ރޯމާއަށް ވެސް ކޯޗުކަން ކޮއްދީފައެވެ.
މިޑިއާ ރިޕޯޓްތައް ބުނާގޮތުގައި އަލް ނަސްރުން ރުޑީ ގާސިއާ މަގާމުން ވަކިކޮށްފައިވަނީ މިސީޒަނުގައި އެޓީމުން ދައްކަމުން އަންނަ ދަށް ކުޅުމުގެ އިތުރުން ޓީމުގެ ސީނިއާ ބައެއް ކުޅުންތެރިންނާއި މައްސަލަޖެހި އޭނާގެ އަތުން ޓީމުގެ ކޮންޓްރޯލް ގެއްލިފައިވާތީއެވެ.
އަލް ނަސްރު އިން މިސީޒަނަށް ބޮޑު ހޭދައެއްކޮށް ވަރުގަދަ ޓީމެއް ގާސިއާއާއި ހަވާލުކުރި ނަމަވެސް ލީގުގައި ކޮންމެ ޓީމަކަށް ބާކީ 7 މެޗު އޮތްއިރު އެ ޓީމު މިވަގުތު އޮތީ ތާވަލްގެ ދެވަނައިގައި އެވެ. އަދި ސައުދީ ކިންގް ކަޕްގެ ސެމީ ފައިނަލުން އެޓީމު ކެޓިއިރު ލީގުގައި އެންމެ ފަހުން ކުޅުނު މެޗު އެއްވަރުވުމުން އެއްވަނާގައި އޮތް އަލް އިއްތިހާދަށް ވަނީ ތިން ޕޮއިންޓުގެ ލީޑެއް ލިބިފައެވެ.
އަލް ނަސްރުގެ ކޯޗުގެ މަގާމު މިވަގުތު ހުސްވެފައި ވާއިރު އެމަގާމަށް ޕޯޗުގަލްގެ ތަޖުރިބާކާރު ކޯޗު ހޯސޭ މޮރީނިއޯ ގެނައުމަށް އެކުލަބުން ބޮޑު ހުށަހެޅުމެއް ހުށަހަޅާފައިވާ ކަމަށާއި އަންނަ ސީޒަނުގައި މޮރީނިއޯ އެޓީމުން ފެނުމުގެ ފުރުސަތު ބޮޑުކަމުގައި މީޑިއާ ރިޕޯޓްތައް ބުނެ އެވެ.
Advertisement
This content is created and paid for by advertisers and does not involve Voice Journalists
