މި ސަރުކާރު ފެއިލްވެފައިވާކަމަށް ބުނާ ފަރާތްތައް ސަރުކާރުގެ ވަޒީފާތަކުގައި ތިބުމަކީ ޖޯކެއް ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރު އަޙްމަދު ސައީދު ވިދާޅުވެއްޖެ އެވެ. 

ސަޢީދު މިފަދައިން ވިދާޅުވެފައިވަނީ ރައްޔިތުންނަށް ވީ ވައުދުތައް ފުއްދުމަށް ސަރުކާރު ފެއިލްވެފައިވާ ކަމަށާއި، ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހަށް ދެވަނަ ދަޢުރެއް ދޭން ޖެހޭކަމަށް ޤަބޫލު ނުކުރާކަމަށް ވިދާޅުވާ ބައެއް ފަރާތްތައް ސަރުކާރާއި ސަރުކާރުގެ ކުންފުނިތަކުގެ އިސްވެރިންގެ ގޮތުގައި ތިއްބަވާތީ، އެކަމަށް ފާޑުވިދާޅުވަމުން ކުރެއްވި ޓްވީޓެއްގަ އެވެ. 

ބެލެވޭގޮތުގައި ސަޢީދުގެ ފާޑުކިޔުން އަމާޒުކުރައްވާފައި ވަނީ އެސްޓީއޯގެ މެނޭޖިން ޑިރެކްޓަރުގެ މަޤާމުން ދާދިފަހުން ވަކިކުރެއްވި ހުސެއިން އަމްރުއަށް ކަމަށް ބެލެވެއެވެ. އެއީ މަޤާމުން ވަކިކުރެއްވުމާއި ގުޅިގެން އަމްރު ގެންދަވަނީ ސަރުކާރުގެ ކުންފުނިތަކަށް ބޮޑެތި ފާޑުކިޔުންތަކެއް ކިޔުއްވަމުންނެވެ.

Advertisement

ވަކިން ޚާއްސަކޮށް ފެނަކް ކުންފުނީގެ ތެރެއިން ކޮރަޕްޝަނަށް މަގުފަހިވާގޮތަށް ގިނަ ކަންތައްތަކެއް ކުރަމުންދާކަމަށް އޭނާ ވަނީ ތުހުމަތުކޮށްފަ އެވެ.

ސައީދުގެ އެ ޓްވީޓުގައި ވަކި ފަރާތެއްގެ ނަން ވިދާޅިވެފައި ނުވާތީ އެ ފާޑުކިޔުންތައް އެމްޑީޕީގެ ރައީސް މުޙައްމަދު ނަޝީދު އިސްވެ ހުންނަވާ އުފައްދަވާފައިވާ "ފިކުރެއްގެ ދިރުން" ގޮތްޕަށް ނިސްބަތްވާ ސަރުކާރުގެ ސިޔާސީ މަޤާމުތަކުގައި ތިއްބެވި ފަރާތްތަކާއި ޖުމްޙޫރީ ޕާޓީގެ ސްލޮޓުތަކުގައި ސަރުކާރުގެ މަޤާމުތަކުގައި ތިއްބެވި ފަރާތްތަކަށް ވެސް ރައްދުވެއެވެ. 

ސައީދު ވިދާޅުވީ ފެއިލްވެފައިވާ ސަރުކާރެއްނަމަ، އެފަދަ ސަރުކާރުގެ މަގާމުތަކުން ރައީސުލްޖުމްޙޫރިއްޔާ ވަކިކުރަންދެން ތިއްބެވުމަކީ ޖޯކެއް ކަމަށެވެ. ސަރުކާރު ފެއިލްވެފައިވާކަމަށް ޤަބޫލުކުރެވޭއިރު މަގާމުތަކުން އިސްތިއުފާދެއްވަން ކެރިވަޑައިނުގަންނަވާ ސަބަބަކީ ކޮބައިތޯ ސައީދު ވަނީ ސުވާލުކުރައްވާފަ އެވެ.

ކުރިއަށް އޮތް ރިޔާސީ އިންތިޚާބުގައި ޖުމްޙޫރީ ޕާޓީން ވަކިން ނިކުތުމަށް ނިންމާ އެ ޕާޓީގެ ކެންޑިޑޭޓަކީ ޕާޓީގެ ލީޑަރު ޤާސިމް އިބްރާހިމްކަމަށް ކަނޑައެޅުމާއެކު ރައީސް ޞާލިހަށް ތާއީދުކުރައްވާ މެމްބަރުން ގެންދަވަނީ ޖޭޕީގެ ވަޒީރުން މަޤާމުތަކުން އިސްތިއުފާ ނުދެއްވާނަމަ އިތުބާރު ނެތްކަމުގެ ވޯޓު ނަގާ މަޤާމުތަކުން ވަކިކުރާނެ ކަމުގެ އިންޒާރު ދެއްވާފައެވެ. 

އޭގެ އިތުރުން ނަޝީދަށް ތާއީދުކުރައްވާ ބައެއް ފަރާތްތައްވެސް މި ފަހުން ވަނީ ސަރުކާރުގެ މަޤާމުތަކުން ވަކިކޮށްފަ އެވެ.