ޔުއެފާ ޗެމްޕިއަންސްލީގުގެ ކުއާޓަރ ފައިނަލްގެ ފުރަތަމަ ލެގުގައި މިރޭ އަމިއްލަ ދަނޑުގައި 2-0 ގެ ނަތީޖާއަކުން ޗެލްސީ ބަލިކޮށް އެންމެ ފަހުގެ ޗެމްޕިއަން ރެއާލް މެޑްރިޑުން ސެމީގެ ފުރުސަތު ބޮޑުކޮށްފި އެވެ.

މިރޭގެ މެޗުގެ ފުރަތަަމަ ހާފުގައި ގިނަވަގުތު ބޯޅަ ގެންގުޅެ ރެއާލް މެޑްރިޑުން މެޗު ޑޮމިނޭޓުކުރި ނަމަވެސް މިހާފުގައި ޗެލްސީގެ ޖާއު ފެލިކްސް އަދި ރަހީމް ސްޓާލިންއަށް ވަނީ ލަނޑު ޖަހާނެ ވަރަށް ހުސް ދެ ފުރުސަތު ލިބި ބޭނުންކުރެވޭ ގޮތްނުވެފައެވެ.

މިރޭގެ މެޗުގައި ރެއާލް މެޑްރިޑަށް ލީޑު ނަގައިދިނީ އެޓީމުގެ ކެޕްޓަން ކަރީމް ބެންޒީމާ އެވެ. މިއީ އެޓީމުގެ ބްރެޒިލް ފޯވާޑް ވިނީޝިއަސް ޖޫނިއަރ ފޮނުވާލި ހަމަލާއެއް ޗެލްސީގެ ގޯލްކީޕަރު ކެޕާ ދިފާއުކޮށް ބޭރަށް ނެރުނު ބޯޅަ މުޅިން ހުސްކޮށް ހުރެ ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ރެއާލް މެޑްރިޑް ކުރީގައި އޮވެގެންނެވެ.

ދެވަނަ ހާފުގައި ޗެލްސީ އިން އެޓީމުގެ ކުޅުން ރަނގަޅުކޮށް ކުރިއަށް ޖެހި ލަނޑެއް ޖެހޭތޯ މަސައްކަތް ކުރަމުން ދަނިކޮށް އެޓީމަށް އިތުރު މައްސަލަތަކެއް ދިމާވީ ދެވަނަ ހާފުގެ 59 ވަނަ މިނެޓުގައި އެޓީމުގެ އިގިރޭސި ޑިފެންޑަރު ބެން ޗިލްވެލްއަށް ރެފްރީ ސީދާ ރަތް ކާޑެއް ދައްކާ ދަނޑުން ފޮނުވާލުމުންނެވެ. މިއީ ރެއާލް މެޑްރިޑުން އުފެއްދި ކައުންޓާ އެޓޭކެއްގައި އެޓީމުގެ ބްރެޒިލް ފޯވާޑް ރޮޑްރިގޯ ބޯޅަ ހިފައިގެން ޗެލްސީގެ ޕެނަލްޓީ އޭރިއާ ތެެރެއަށް ވަންނަން އުޅެނިކޮށް ޗިލްވެލް އޭނާ ވައްޓާލުމަށް ރެފްރީ ދެއްކި ކާޑެކެވެ.

އެއްކުޅުތެރިއަކު މަދުކޮށް ކުޅެމުންދިޔަ ޗެލްސީ ކޮޅަށް ރެއާލް މެޑްރިޑުން ކާމިޔާބުކުރި ދެވަނަ ލަނޑު ދެވަނަ ހާފުގެ 74 ވަނަ މިނެޓުގައި ކާމިޔާބުކޮށްދިނީ ދެވަަނަ ހާފްގައި ބަދަލު ކުޅުންތެރިއެއްގެ ގޮތުގައި ކުޅެންނުކުތް މާކޯ އަސެންސިއޯއެވެ. މިއީ އެޓީމުގެ ބްރެޒިލް ފޯވާޑް ވިނީޝިއަސް ޖޫނިއަރ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ރެއާލް މެޑްރިޑުން ދެ ލަނޑުގެ ލީޑެއްގައި އޮވެ މެޗު ނިމެން ދަނިކޮށް ޗެލްސީގެ އިގިރޭސި މިޑްފީލްޑަރު މައުންޓަށް ވަނީ ނަތީޖާގެ ފަރަގު ކުޑަކޮށްލުމަށް ތަނުގެ ފުރުސަތެއްގައި ލިބި ބޭނުންކުރެވޭ ގޮތްނުވެފައެވެ. ދެވަަނަ ހާފުގެ އިތުރު ވަގުތުގައި ރެއާލް މެޑްރިޑްގެ ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ އޭނާ ފޮނުވާލި ބޯޅަ ރެއާލްގެ ޖަރުމަނު ޑިފެންޑަރު ރުޑިގާ ވަނީ ދިފާއުކޮށް ކޯނަރަކަށް ބޭރުކޮށްލާފައެވެ.

ޗެލްސީގެ ދަނޑުގައި މިދެޓީމު ކުޅޭ ދެވަަނަ ލެގުގެ މެޗު އޮންނާނީ މި މަހުގެ 19 ވަނަ ދުވަހުގެ ރޭ އެވެ. މި މެޗު އެއްވަރު ކޮށްލައިގެން ވެސް ރެއާލް މެޑްރިޑަށް ސެމީގެ ފުރުސަތު ލިބެން އެބައޮތެވެ.

މިދިޔައަހަރުގެ މުބާރާތުގެ ކުއާޓާ ފައިނަލުގައި މިދެޓީމު ވާދަކުރި ފުރަތަަމަ ލެގުގެ މެޗު ޗެލްސގެ ދަނޑުގައި 3-1 ގެ ނަތީޖާއަކުން ރެއާލް މެޑްރިޑް މޮޅުވިއިރު ރެއާލްގެ ދަނޑުގައި ކުޅުނު ދެވަނަ ލެގުގެ މެޗު 3-2 ގެ ނަތީޖާއަކުން ކާމިޔާބުކުރީ ޗެލްސީ އެވެ. އަދި ރެއާލް މެޑްރިޑަށް ސެމީގެ ފުރުސަތު ލިބުނީ 5-4 ގެ އެގްރިގޭޓު ނަތީޖާއަކުން ނެވެ.