މީގެ ކުރިން ބައެއް ރަށް ރަށުގައި ހުރި އެމްބިއުލާންސް ތައް ހުރީ ހަލާކުވެ ބޭނުން ނުކުރެވޭ ގޮތަށް ކަމަށާ، އެ ރަށް ރަށުގައި އެމްބިއުލާންސް ހުރީ ނަމަކަށް ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މިއުވާން ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙު ރާއްޖޭގެ ވެރިކަމާ ޙަވާލުވެވަޑައިގެންނެވިއިރު، ގިނަ ރަށްތަކުގެ އެމްބިއުލާންސްތައް ހުރީ ހަލާކުވެފައި ކަމަށާއި، އެ އެމްބިއުލާންސްތައް ހުރީ ނަމަކަށް ކަމަށެވެ. އަދި ރައްޔިތުންނަށް އެ ޚިދުމަތް ނުލިބޭތީ، އެމްބިއުލާންސް ގެނައުމުގެ މަސައްކަތް ކުރީ މި ސަރުކާރުން ކަމަށްވެސް އޭނާ ވިދާޅުވި އެވެ.
އެގޮތުން ކުރި މަސައްކަތުން މިދައުރުގެ ތެރޭގައި 127 ރަށަކށް އެމްބިއުލާން ފޯރުކޮށްދެވިފައިވާ ކަމަށާއި، އޭގެ ތެރޭގައި އަލަށް އެމްބިއުލާން ފޯރުކޮށްދެވުނު ރަށްތައް ހިމެނޭ ކަމަށް މިއުވާން ވިދާޅުވިއެވެ.
"މީގެ ކުރީގައި އެމްބިއުލާންސްތަކެއް ނަމަކަށް ހުރި ރަށްރަށްވެސް އެބަ ހިމެނޭ. އަދި އެމްބިއުލާންސްތަކުގެ ބަދަލުގައި ހަމައެކަނި ވެހިކަލްތަކެއް ބާއްވައިގެން އެމްބިއުލާންސްގެ ހިދުމަތް ދެމުންގެންދިޔަ ރަށްރަށްވެސް ހިމެނޭ. އެހެންކަމުން މިހުރިހާ ރަށްރަށް ހިމެނޭގޮތަށް މިހާތަނަށް 127 ރަށަކަށް ވަނީ އެމްބިއުލާންސް ފޯރުކޮށްދެވިފައި" މިއުވާން ވިދާޅުވިއެވެ.
މިއާއެކު މިއުވާން ވިދާޅުވީ، އަދިވެސް އިތުރު އެމްބިއުލާންސް ތައް ގެނައުމަށް ސަރުކާރުން މަސައްކަތް ނިންމާފައިވާ ކަމަށާ، އަލަށް ގެނައުމަށް ހަމަޖެހިފައިވާ އެމްބިއުލާންސްތައް ފޯރުކޮށްދިނުމަށް ހަމެޖެހިފައިވަނީ، އެމްބިއުލާންސް މަރާމާތު ކުރަން ހަމަޖެހިފައިވާ ރަށްރަށަށް ނުވަތަ އެމްބިއުލާންސް އެއްގޮތަކަށްވެސް ނެތް ރަށްރަށަށް އިސްކަންދީގެން ކަމަށެވެ.
"އެނގިވަޑައިގަންނަވާނެ ފަދައިން 20 އެމްބިއުލާންސް ހޯދުމަށް އެޕްރީލްމަހު އެސްޓީއޯއާއެކު މިނިސްޓްރީ އޮފް ހެލްތުން ވަނީ ސޮއިކޮށްފަ. މިއެއްބަސްވުމުގެ ދަށުން 20 އެމްބިއުލާންސް ކުރިއަށް މިއޮތް 3 މަސްދުވަހުގެ ތެރޭގައި ހެލްތު މިނިސްޓްރީއާ އެސްޓީއޯއިން ހަވާލުކުރައްވާނެ. އަދި އިތުރަށްވެސް އެމްބިއުލާންސް ހޯދުމުގެ މަސައްކަތް ކުރިއަށްއެބަދޭ." މިއުވާން ވިދާޅުވިއެވެ.
މީގެ އިތުރުން، ޖަޕާނު ސަރުކާރުގެ ހިލޭ އެހީގެ ދަށުން ރާއްޖެއަށް ފޯރުކޯށްދިނުމަށް އެއްބަސްވެފައިވާ 8 ޕެރަމެޑިކް އެމްބިއުލާންސް ކުރިއަށް އޮތް މަދު ހަފްތާއެއްގެ ތެރޭގައި ލިބޭނެ ކަމަށް ޖަޕާނު ސަރުކާރުގެ ފަރާތުން މައުލޫމާތުދޭ ކަމަށްވެސް މިއުވާން ފާހަގަކުރެއްވި އެވެ.
Advertisement
This content is created and paid for by advertisers and does not involve Voice Journalists
