ޔުއެފާ ޔޫރޮޕާ ލީގުގެ ކުއާޓާ ފައިނަލް ފުރަތަމަ ލެގުގައި ރޭ ރަށުން ބޭރުގައި ސެވިއްޔާ އިން މެންޗެސްޓާ ޔުނައިޓެޑް މޮޅުވިޔަނުދީ ހިފަހައްޓައިފި އެވެ.

ފުރަތަަމަ ހާފުގައި މެންޗެސްޓާ ޔުނައިޓެޑުން ދެ ލަނޑުގެ ލީޑެއް ނަގާފައި ވަނިކޮށް ސެވިއްޔާއަށް މެޗުގެ ނަތީޖާ އެއްވަރު ކުރެވުނީ ދެވަަނަ ހާފްގައި  މެންޗެސްޓާ ޔުނައިޓެޑާއި ކެޕްޓަން  ހެރީ މެގުއާ އާއި ޓައިރެލް މަލާސިއާ އަތުން ބައިކޮޅަށް ވަތް ދެ ލަނޑުންނެވެ.

ރޭގެ މެޗުގައި މެންޗެސްޓާ ޔުނައިޓެޑަށް ލީޑު ނަގައިދިނީ ފުރަތަަމަ ހާފުގެ 14 ވަނަ މިނެޓުގައި ޕޯޗުގަލްގެ މިޑްފީލްޑަރު ފެނާންޑޭޒް ތަނަވަސްކޮށްދިން ފުރުސަތެއްގައި މާސެލް ސަބިޓްޒާ އެވެ. އަދި އޭގެ ހަތް މިނެޓު ފަހުން އޭނާ ވަނީ އިތުރު ލަނޑެއް ކާމިޔާބުކޮށް ޔުނައިޓެޑުގެ ލީޑު ފުޅާކޮށްދީފައެވެ. މިއީ އެޓީމުގެ ފްރާންސް ފޯވާޑް މާޝިއަލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ސެވިއްޔާ އިން ކާމިޔާބުކުރި ފުރަތަަމަ ލަނޑަކީ ދެވަަނަ ހާފުގެ 84 ވަނަ މިނެޓުގައި ޔުނައިޓެޑުގެ ޑިފެންޑަރު މަލާސިއާ އަތުން ބައިކޮޅަށް ވަތް ގޯލެކެވެ. އަދި އެޓީމުން މެޗުގެ ނަތީޖާ އެއްވަރުކުރި ލަނޑަކީ ދެވަަނަ ހާފުގެ އިތުރު ވަގުތުގައި މެންޗެސްޓާ ޔުނައިޓެޑްގެ ކެޕްޓަން ހެރީ މެގުއާ އަތުން ބައިކޮޅަށް ވަތް ގޯލެކެވެ.

ފާއިތުވި 17 ސީޒަނުގައި ހަ ފަހަރަށް ޔޫރޮޕާ ލީގު ކާމިޔާބުކޮށް، ހަތް ވަނަ ފަހަރަށް ތަށި އުފުލައިލުމުގެ އަމާޒު ހިފާފައިވާ ސެވިއްޔާއަށް، އަންނަ ހަފްތާގައި އަމިއްލަ ދަނޑުގައި ދެވަނަ ލެގު ކުޅުމަކީ ބޮޑު ހިތްހަމަޖެހުމެކެވެ. މިދެޓީމު ކުއާޓާ ފައިނަލުގެ ދެވަަނަ ލެގުގައި ސެވިއްޔާގެ ދަނޑުގައި ކުޅޭ މެޗު އޮންނާނީ މި މަހުގެ 21 ވަނަ ދުވަހުގެ ރޭ އެވެ.

ރޭ ޔޫރޮޕާ ލީގުގެ ކުއާޓާ ފައިނަލުގައި ރޭ ކުޅެވުނު އެހެން މެޗުތަކުގެ ނަތީޖާތަކަށް ބަލާއިރު، ބަޔާ ލެވަކޫސަން ވަނީ 1-1 އިން ބެލްޖިއަމްގެ ޔޫނިއަން ސެއިން ގިލޮއިސްއާ އެއްވަރުވެފަ އެވެ. ފެޑްރިކޯ ގައްޓީގެ ލަނޑާ އެކު ސްޕޯޓިން ލިޒްބަން އަތުން 1-0 އިން ޔުވެންޓަސް މޮޅުވިއިރު، ހޯސޭ މޮރީނޯގެ އިރުޝާދުގެ ދަށުން ކުޅެމުން އަންނަ ރޯމާ ވަނީ 0-1ގެ ނަތީޖާއަކާ އެކު ފެޔަނޫޑް އަތުން ބަލިވެފަ އެވެ.