ގައުމީ ފުޓްބޯޅަ މުބާރާތުގެ ދެވަަނަ މެޗުގައި މިރޭ އެންމެ ފަހުގެ ޗެމްޕިއަން ވެލެންސިއާ 5-0 ގެ ނަތީޖާއަކުން ބަލިކޮށް ސުޕަރ ޔުނައިޓެޑް ސްޕޯޓްސް ކްލަބުން މުބާރާތުގެ ފެށުން ރަނގަޅުކޮށްފި އެވެ.

ގަލޮޅު ރަސްމީ ދަނޑުގައި މިރޭ ކުޅެވުނު މެޗު ފުރަތަަމަ ހާފުގެ ފަސް ވަނަ މިނެޓުގައި ސުޕަރ ޔުނައިޓެޑް ސްޕޯޓްސް ކްލަބަށް ލީޑު ނަގައިދިނީ ތަޖުރިބާކާރު ފޯވާޑް އަލީ އަޝްފާގުއެވެ. މިއީ މިދިޔަ އަހަރުގެ ސީޒަން ހުޅުވުނު ގެ ގޮތުން ކުޅެވުނު ޗެރިޓީ ޝީލްޑް މެޗަށް ފަހު އަނިޔާގެ ސަބަބުން އަހަރެންހާ ދުވަހު ފުރަތަަމަ ޑިވިޝަނުގެ ފުޓްބޯޅަ އާއި ދުރުގައި ހުރުމަށްފަހު އެނބުރި އައިސް ގަލޮޅު ދަނޑުގައި އަޝްފާގު ކުޅުނު ފުރަތަަމަ މެޗެވެ.

ސުޕަރ ޔުނައިޓެޑް ސްޕޯޓްސްގެ ދެވަނަ ލަނޑު އޭގެ ދެމިނެޓު ފަހުން ފުރަތަމަ ހާފުގެ 7 ވަނަ މިނެޓުގައި ކާމިޔާބުކޮށްދިނީ އިބްރާހިމް އަތީގް އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ސުޕަރ ޔުނައިޓެޑް ސްޕޯޓްސް ކުރީގައި އޮވެގެންނެވެ.

ޒުވާން ގިނަ ކުޅުންތެރިންތަކަކާ އެކު މިރޭގެ މެޗަށް ނިކުތް ވެލެންސިއާގެ ޓީމަށް މި މެޗުގައި ވާދަވެރި ކުޅުމެއް ނުދެއްކުނުއިރު ދެވަނަ ހާފުގައި ސުޕަރ ޔުނައިޓެޑް ސްޕޯޓްސް އިން ވަނީ އިތުރު ތިން ލަނޑު ކާމިޔާބުކޮށްފައެވެ. މި ގޮތުން އެޓީމުގެ ތިން ވަނަ ލަނޑު ދެވަނަ ހާފުގެ 58 ވަނަ މިނެޓުގައި ކާމިޔާބުކޮށްދިނީ މުހައްމަދު ސަޚާއު އެވެ.

މިމެޗުގައި ސުޕަރ ޔުނައިޓެޑް ސްޕޯޓްސް ގެ ހަތަރު ވަނަ ލަނޑު ދެވަނަ ހާފުގެ 61 ވަނަ މިނެޓުގައި ކާމިޔާބުކޮށްދިނީ ކެޕްޓަން އަލީ އަޝްފާގް އެވެ. އަދި އެޓީމުގެ ފަސް ވަނަ ލަނޑު 83 ވަނަ މިނެޓުގައި ކާމިޔާބުކޮށްދިނީ އަހުމަދު ހަމީދެވެ.

މި މުބާރާތުގެ މެޗެއް މާދަމާ ރޭ ވެސް ކުޅުމަށް ހަމަޖެހިފައިވާ އިރު އެމެޗުގައި ބައްދަލުކުރާނީ ބުރު ސްޕޯޓްސް ކްލަބާއި ޓީސީ ސްޕޯޓްސް ކްލަބެވެ. މިއީ މި މުބާރާތުގައި މިދެޓީމު ވެސް ކުޅޭ ފުރަތަަމަ މެޗެވެ.