ޑާބަންގައި މިއަހަރުގެ މެއި 20-28 އަށް ބޭއްވުމަށް ހަމަޖެހިފައިވާ އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް)ގެ އެންމެ ބޮޑު މުބާރާތަށް ވޯލްޑް ޗެމްޕިއަންޝިޕަށް ސައުތު އޭޝިއާ އިން ކޮލިފައިވި ތިން ޕެއާ ތެރޭގައި ރާއްޖޭގެ އެއްވަނަ އަންހެން ޕެއާ ހިމެނިއްޖެ އެވެ.

މި މުބާރާތަށް މިސަރަހައްދުން ކޮލިފައިވެފައިވަނީ ރާއްޖޭގެ ޓޭބަލް ޓެނިހުގެ އަންހެން ޑަބަލްސްގެ އެއް ވަނަ ޕެއާ، އައިޝަތު ރަފާ ނާޒިމް އާއި ފާތިމަތު ދީމާ އަލީ ގެ އިތުރުން އަވަށްޓެރި އިންޑިޔާގެ ދެ ޕެއާ އެކެވެ.

"މިއީ ވަރަށް ބޮޑު ކާމިޔާބެއް. އަނެއްކާ ވެސް މި ދެ ކުދިން މި ވަނީ ގައުމު ފަހުރުވެރިކޮށްދީފައި،" ޓޭބަލް ޓެނިސް އެސޯސިއޭޝަން އޮފް މޯލްޑިވްސް އިން ބުނެފައިވެ އެވެ.

ދީމާ އާއި ރަފާ ވެސް މި ވަގުތު އަންނަނީ ބައިނަލްއަގުވާމީ ލެވަލްގައި ކާމިޔާބު ހޯދުމަށް ރާއްޖޭން ބޭރުގައި އެކި ޓްރެއިނިންތައް ފުރިހަމަކުރަމުންނެވެ. ދީމާ ހުރީ މޯލްޑިވްސް އޮލިމްޕިކް ކޮމިޓީން ދިން 2024 ޕެރިސް އޮލިމްޕިކްސް ސްކޮލަޝިޕާއި، ޔޫތު މިނިސްޓްރީގެ "އަރުތަ" ޕްރޮގްރާމްގައި ބައިވެރިކޮށްފަ އެވެ. އަދި ރަފާ އަކީ ވެސް "އަރުތަ" ޕްރޮގްރާމުގައި ހިމަނާފައިވާ އެތުލީޓެކެވެ.

ޓޭބަލް ޓެނިސް އަކީ ރާއްޖޭގައި ހަލުވިކަމާއެކު ކުރިއަރަމުން އަންނަ ކުޅިވަރަކަށްވެފައި ބައިނަލްއަގުވާމީ ފެންވަރުގައި ރާއްޖޭ ކުޅުންތެރިން އަންނަނީ ފަހުރުވެރި ކާމިޔާބީތަކެއް ހޯދަމުންނެވެ. މިގޮތުން 2019 އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން ރަން މެޑަލް ހޯދުމުގެ އިތުރުން 2022 ވަނަ އަހަރު ބޭއްވުނު އިސްލާމިކް ސޮލިޑާރިޓީ ގޭމްސްގައި އަންހެން ޓީމު އިވެންޓުން ރާއްޖެ ވަނީ ލޯ މެޑަލް ހޯދައިފަ އެވެ.