އިގިރޭސި ޕްރިމިއާ ލީގުގައި މިރޭ އަމިއްލަ ދަނޑު ބްރައިޓަން އަތުން 2-1 ގެ ނަތީޖާއަކުން ޗެލްސީ ބަލިވެއްޖެ އެވެ.

ޗެލްސީގެ ދަނޑުގައި ކުޅުނު މި މެޗުގައި ފުރަތަަމަ ލަނޑުޖަހައި ކުރިހޯދީ ޗެލްސީ އިންނެވެ. މި ލަނޑު ފުރަތަަމަ ހާފުގެ 13 ވަނަ މިނެޓުގައި އެޓީމަށް ކާމިޔާބުކޮށްދިނީ އިގިރޭސި މިޑްފީލްޑަރު ކޮނޯރ ގަލަގަރ އެވެ. މިއީ އެޓީމުގެ ޔުކްރެއިން ފޯވާޑް މުޑްރިކް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ބްރައިޓަން އިން މެޗުގެ ނަތީޖާ އެއްވަރުކުރި ލަނޑު ފުރަތަަމަ ހާފުގެ 42 ވަނަ މިނެޓުގައި ކާމިޔާބުކޮށްދިނީ އެޓީމުގެ އިގިރޭސި ފޯވާޑް ޑެނީ ވެލްބެކް އެވެ. މިއީ އެޓީމުގެ ޖަރުމަނު މިޑްފީލްޑަރު  ޕާސްކަލް ގްރޮސް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މި މެޗުން ބްރައިޓަން މޮޅު ލަނޑު ދެވަނަ ހާފުގެ 69 ވަނަ މިނެޓުގައި ކާމިޔާބުކޮށްދިނީ އެޓީމުގެ ޕެރަގުއޭގެ ފޯވާޑް ޖޫލިއޯ އެންސިސޯ އެވެ. މިއީ އެޓީމުގެ އިގިރޭސި މިޑްފިލްޑަރު ސޯލީ މާޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ޗެލްސީ އެންމެ ފަހުން ކުޅުނު ހަ މެޗުގެ ތެރެއިިން މޮޅެއް ހޯދިފައިނުވާ އިރު ހަތަރު މެޗުން އެޓީމު ވަނީ ބަލިވެފަ އެވެ. އަދި މިއީ އެޓީމުގެ ލެޖެންޑް ފްރޭންކް ލަމްޕާޑް ދެވަނަ ފަހަރަށް އެޓީމާއި ހަވާލުވި ފަހުން އެޓީމު ޖެހިޖެހިގެން ބަލިވި ތިން ވަނަ މެޗެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 29 މެޗުން 49 ޕޮއިންޓް ހަމަކޮށް ބްރައިޓަން މިވަގުތު އޮތީ ޕްރެމިއާ ލީގު ތާވަލުގެ 7 ވަނައިގައެވެ. އަދި މިރޭގެ މެޗުން ބަލިވި ޗެލްސީ 31 މެޗު ކުޅެފައިވާއިރު އެޓީމަށް ލިބިފައިވަނީ 39 ޕޮއިންޓާއެކު ތާވަލްގެ 11 ވަނަ އެވެ.