އިގިރޭސި ޕްރިމިއާ ލީގުގައި މިރޭ އަމިއްލަ ދަނޑުގައި ލެސްޓާ ސިޓީ 3-1 ގެ ނަތީޖާއަކުން ބަލިކޮށް މެންޗެސްޓާ ސިޓީ އިން އެއްވަނާގައި އޮތް އާސެނަލް އާއި ދެމެދުގައި އޮތް ފަރަގު ތިން ޕޮއިންޓަށް ކުޑަކޮށްފި އެވެ.

މިރޭގެ މެޗުގައި މެންޗެސްޓާ ސިޓީ އިން ކާމިޔާބުކުރި ތިން ލަނޑުވެސް އެޓީމުން ކާމިޔާބުކޮށްފައިވަނީ ފުރަތަަމަ ހާފުގައެވެ. މި ގޮތުން އެޓީމުގެ ފުރަތަމަ ލަނޑު 5 ވަނަ މިނެޓުގައި ކާމިޔާބުކޮށްދިނީ އިގިރޭސި ޑިފެންޑަރު ޖޯން ސްޓޯން އެވެ. މިއީ އެޓީމުގެ ސްޕެނިޝް މިޑްފީލްޑަރު ރޮޑްރީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސިޓީގެ ދެވަަނަ ލަނޑު ފުރަތަމަ ހާފުގެ 13 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ އެޓީމުގެ ފޯވާޑް ހާލަންޑް އެވެ. އަދި 12 މިނެޓު ފަހުން ހާލަންޑް ވަނީ އިތުރު ލަނޑެއް ކާމިޔާބުކޮށް ސިޓީގެ ލީޑު ފުޅާކޮށްދީފައެވެ. މިއީ އެޓީމުގެ ބެލްޖިއަމް މިޑްފީލްޑަރު ކެވިން ޑިބްރޭނާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. މިއީ ޕްރެމިއާ ލީގުގައި ކުޅުނު 28 މެޗުގައި އޭނާ ކާމިޔާބުކޮށްދިން 32 ވަނަ ލަނޑެވެ.

އަދި މިއާއެކު ޕްރެމިއާ ލީގުގައި އެއް ސީޒަނެއްގައި އެންމެ ގިނަ ލަނޑުޖަހައިގެން ލިވިޕޫލުގެ މިސްރު ފޯވާޑް މުހައްމަދު ސަލާހް ހަދާފައިވާ ރެކޯޑާއި ހާލަންޑް ވަނީ އަރާ ހަމަކޮއްފައެވެ.

މި މެޗުގެ ދެވަނަ ހާފުގައި މެންޗެސްޓާ ސިޓީ އިން ގިނަ ބަދަލުތަކެއް ކޮއްފައިވާ އިރު، ލީގުގައި އެންމެ ފަހުން ކުޅުނު 10 މެޗުގައި މޮޅެއް ހޯދިފައިނުވާ ލެސްޓާ ސިޓީ އިން މި މެޗުގައި ކާމިޔާބުކުރި ހަމައެކަނި ލަނޑު ދެވަނަ ހާފުގެ 75 ވަނަ މިނެޓުގައި ކާމިޔާބުކޮށްދިނީ އެޓީމުގެ ނައިޖީރިއާ ފޯވާޑް ކެލެޗީ އިހެނާޗޯ އެވެ.

މި މެޗުން ލިބުނު ތިން ޕޮއިންޓާއެކު އެކު ލީގުގައި ކުޅުނު 30 މެޗުން މެންޗެސްޓާ ސިޓީއަށް ވަނީ 70 ޕޮއިންޓް ލިބިފައެވެ. ލީގު ތާވަލުގެ ދެވަނައިގައި އެޓީމު މިވަގުތު އޮތް އިރު އެއްވަނައިގައި އޮތް އާސެނަލްއަށް 30 މެޗު ކުޅެގެން ލިބިފައިވަނީ 73 ޕޮއިންޓެވެ. އަދި މިރޭގެ މެޗުން ބަލިވި ލެސްޓާ ސިޓީ ލީގުގައި ކުޅުނު 31 މެޗުން އެޓީމަށް ލިބިފައިވަނީ 25 ޕޮއިންޓާއެކު ލީގު ތާވަލުގެ 19 ވަނަ އެވެ.