ސްޕެނިޝް ލަލީގާގައި މިރޭ ރަށުން ބޭރުގައި 2-0 ގެ ނަތީޖާއަކުން ކާޑިޒް ބަލިކޮށް ރެއާލް މެޑްރިޑުން ބާސެލޯނާ އާއި ދެމެދުގައި އޮތް ފަރަގު 10 ޕޮއިންޓަށް ކުޑަކޮށްފި އެވެ.

މިރޭގެ މެޗުގެ ފުރަތަަމަ ހާފުގެ 12 ވަނަ މިނެޓުގައި ކާޑިޒްގެ އުރުގުއާއީ ޑިފެންޑަރު އަލްފެންސޯ އެސްޕީނޯ ރެއާލްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. އަދި އޭގެ ހަތަރު މިނެޓު ފަހުން ރެއާލްގެ ސްޕެނިޝް މިޑްފީލްޑަރު އަސެންސިއޯއަށް ވަނީ ކާޑިޒްގެ ޕެނަލްޓީ އޭރިއާ ތެެރެއިން ވަރަށް ހުސް ފުރުސަތެއް ލިބި ބޭނުންނުކުރެވިފައެވެ.

މީގެ އިތުރުން ވެސް ރެއާލްގެ ކެޕްޓަން ކަރީމް ބެންޒީމާ އަށް މިހާފުގައި ވަނީ ލަނޑުޖަހާނެ ރަގަޅު ހުސް ދެ ފުރުސަތު ލިބި ބޭނުންނުކުރެވިފައެވެ. އޭގެ ތެރޭއިން ފުރަތަަމަ ހާފުގެ 35 ވަނަ މިނެޓުގައި ކާޑިޒްގެ ޕެނަލްޓީ އޭރިއާ ތެެރެއިން ލިބުނު ފުރުސަތެއްގައި ބެންޒީމާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

Advertisement

ދެވަަނަ ހާފްގައި ރެއާލުން އެޓީމުގެ އެޓޭކްތައް އިތުރަށް ވަރުގަދަކުރުމާއި ނަތީޖާއެއްގެ ގޮތުން މިހާފުގައި އެޓީމުން ވަނީ ކާޑިޒްގެ ގޯލާއި އަމާޒުކޮށް ނުރައްކާތެރި ގިނަ ހަމަލާތަކެއް ފޮނުވާލާފައެވެ. އޭގެތެރޭގައި ރޮޑްރިގޯ، ވަލްވޭޑޭ، އިތުރު ބެންޒީމާއަށް މިހާފުގައި ވެސް ވަނީ ލަނޑުޖަހާނެ ރަގަޅު ފުރުސަތުތަކެއްލިބި ބޭނުން ނުކުރެވިފައެވެ.

މި މެޗުގައި ރެއާލްގެ ފުރަތަަމަ ލަނޑު ދެވަނަ ހާފުގެ 72 ވަނަ މިނެޓުގައި ކާމިޔާބުކޮށްދިނީ އެޓީމުގެ ތަޖުރިބާކާރު ޑިފެންޑަރު ނައްޗޯ ފެނާންޑޭޒް އެވެ. މިއީ ކާޑިޒްގެ ޕެނަލްޓީ އޭރިއާ ބޭރުން އެޓީމުގެ ފްރާންސް މިޑްފީލްޑަރު ޗުއަމެނީ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އޭގެ ހަތަރު މިނެޓު ފަހުން ރެއާލްގެ ދެވަނަ ލަނޑު ކާމިޔާބުކޮށްދިނީ މާކޯ އަސެންސިއޯއެވެ. މިއީ އެޓީމުގެ އުރުގުއާއީ މިޑްފީލްޑަރު  ފެޑެރިކޯ ވަލްވާޑޭ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 29 މެޗު ކުޅެގެން ރެއާލް މެޑްރިޑަށް 59 ޕޮއިންޓް ލިބިފައިވާއިރު އެވަނައިގައި އޮތް ބާސެލޯނާ އަށް 28 މެޗު ކުޅެގެން ވަނީ 69 ޕޮއިންޓް ލިބިފައެވެ. އެޓީމު މާދަމާ ރޭ ގެޓަފޭ އާއި ދެކޮޅަށް ކުޅޭ މެޗުން މޮޅުވެއްޖެ ނަމަ އަނެއްކާވެސް އެޓީމަށް ލީގު ތާވަލުގެ ކުރީގައި 13 ޕޮއިންޓުގެ ލީޑެއް ލިބިގެންދާނެއެވެ.

މިރޭގެ މެޗުން ބަލިވި ކާޑިޒް ލީގުގައި 29 ކުޅެފައިވާއިރު އެޓީމަށް ލިބިފައިވަނީ 31 ޕޮއިންޓާއެކު ތާވަލްގެ 15 ވަނަ އެވެ.