ފްރާންސް ލީގުގައި މިރޭ އަމިއްލަ ދަނޑުގައި ލެންސް އާއި ވާދަކޮށް 3-1 ގެ ނަތީޖާއަކުން މޮޅުވެ، ޕީއެސްޖީ އިން ލީގު ތާވަލުގެ ކުރީގައި 9 ޕޮއިންޓްގެ ލީޑެއް ނަގައިފި އެވެ.

މިރޭގެ މެޗުގެ ފުރަތަަމަ ހާފުގެ 19 ވަނަ މިނެޓުގައި ލެންސް ގެ ގާނާ މިޑްފީލްޑަރު ސާލިސް އަބްދުލް ސަމީދު ޕީއެސްޖީގެ ކުޅުންތެރިއަކަށް ކުރި ނުރައްކާތެރި ފައުލަކާ ގުޅިގެން ރެފްރީ ވަނީ އޭނާއަށް ސީދާ ރަތް ކާޑެއް ދައްކާ ދަނޑުން ފޮނުވާލައިފައެވެ. މިއާއެކު މެޗުގެ ބާކީބައި އެޓީމުން ފުރިހަމަކުރީ އެއްކުޅުތެރިއަކު މަދުކޮށެވެ.

އިދިކޮޅު ޓީމުގެ އެއް ކުޅުންތެރިއަކު މަދުވުމުގެ ފައިދާ ނަގައި ޕީއެސްޖީ އިން ވަނީ ފުރަތަަމަ ހާފުގައި ތިން ލަނޑުގެ ލީޑެއް ނަގާފައެވެ. މިގޮތުން އެޓީމުގެ ފުރަތަަމަ ލަނޑު 30 ވަނަ މިނެޓުގައި ކާމިޔާބުކޮށްދިނީ ކެޕްޓަން އެމްބާޕޭ އެވެ. މިއީ އެޓީމުގެ ޕޯޗުގަލް މިޑްފިލްޑަރު ވިޓީނިއާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުގައި ޕީއެސްޖީގެ ދެވަަނަ ލަނޑު ކާމިޔާބުކޮށްދިނީ ވިޓީނިއާ އެވެ. އަދި އެޓީމުގެ ތިންވަނަ ލަނޑު ފުރަތަަމަ ހާފުގެ 40 ވަނަ މިނެޓުގައި އެމްބާޕޭ ތަނަވަސްކޮށްދިން ފުރުސަތެއްގައި ކާމިޔާބުކޮށްދިނީ މެސީ އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 3-0 ގެ ނަތީޖާއަކުން ޕީއެސްޖީ ކުރީގައި އޮވެގެންނެވެ.

ދެވަަނަ ހާފުގައި އެއްކުޅުތެރިއަކު މަދުކޮށް ކުޅެމުންދިޔަ ލެންސް އިން ވަނީ އެޓީމުގެ ކުޅުން ރަނގަޅުކޮށް ޕީއެސްޖީގެ އެޓޭކްތައް ހުއްޓުވާފައެވެ. އަދި މިމެޗުގައި އެޓީމުން ކާމިޔާބުކުރި ހަމައެކަނި ލަނޑު ދެވަނަ ހާފުގެ 60 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ އެޓީމުގެ ޕޮލެންޑު މިޑްފީލްޑަރު ފްރޭންކޮވްސްކީ އެވެ. މިއާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން ޕީއެސްޖީ މޮޅުވެގެންނެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު ލީގުގައި ކުޅުނު 31 މެޗު ޕީއެސްޖީއަށް ވަނީ 72 ޕޮއިންޓް ލިބިފައެވެ. އަދި މިރޭގެ މެޗުން ބަލިވި ލެންސް ލީގުގައި ކުޅުނު 31 މެޗުން އެޓީމަށް 63 ޕޮއިންޓް ލިބިފައިވާއިރު މިވަގުތު އެޓީމު އޮތީ ލީގު ތާވަލުގެ ދެވަނައިގައެވެ.