އިންތިޚާބުތަކުގައި ވޯޓު ހޯދަން މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) މިހާރު ވިއްކަނީ ސިޔާސަތުތަކެއް ނޫން ކަމަށާއިި، މިހާރު ވޯޓު ހޯދަނީ ފައިސާ އާއި ސަރުކާރުގެ ވަސީލަތްތައް ބޭނުންކޮށްގެން ކަމަށް އެމްޑީޕީގެ ޕާލަމެންޓްރީ ގުރޫޕުގައި ހިމެނިވަޑައިގަންނަވާ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެ އެވެ.
ވަހީދު މިފަދައިން ވިދާޅުވެފައިވަނީ ނިމިދިޔަ ގުރައިދޫ ދާއިރާގެ ބައި-އިލެކްޝަންގެ ގޮނޑި އެމްޑީޕީން ކާމިޔާބުކުރުމާއެކު ސަރުކާރަށް ތާއީދު ކުރައްވާ މެމްބަރުން އުފާ ފާޅުކުރަމުންދާ ދަނޑިވަޅެއްގައި ކުރެއްވި ޓްވީޓެއްގަ އެވެ.
ޒަމާންތަކެއް ވަންދެން ޕީޕީއެމް ތަމްސީލު ކުރަމުން ދިޔަ ގުރައިދޫ ގޮނޑި އެމްޑީޕީއަށް ލިބުމާއި ގުޅިގެން އެ ޕާޓީން ގެންދަނީ ގޮނޑި ކާމިޔާބު ކުރެވުނީ އެމްޑީޕީން މިހާރު ގެންގުޅޭ ސިޔާސަތުތައް ރައްޔިތުންނަށް ކަމުދާތީކަމަށް ވިދާޅުވަމުން ނެވެ.
އަދި އެމްޑީޕީ އަކީ ވަކި އެއްބޭފުޅެއްގެ ވަށާ އެނބުރޭ އެއްޗެއް ނޫން ކަން ގުރައިދޫ އިންތިޚާބު ކާމިޔާބުވުމުން ދޭހަކޮށްދޭކަމަށް އެމްޑީޕީގެ ސަރުކާރު ފަޅީގައި ތިއްބެވި ބޭފުޅުން ގެންދަވަނީ ވިދާޅުވަމުން ނެވެ.
އެކަމަށް އިޝާރާތްކުރައްވާ ވައްޑެ ވިދާޅުވީ އިންތިޚާބުތައް ކާމިޔާބު ކުރުމަށް އެމްޑީޕީން މިހާރު ވިއްކަނީ ސިޔާސަތުތައް ނޫން ކަމަށެވެ. މިހާރު އިންތިޚާބުތައް ކާމިޔާބުކުރަނީ ފައިސާއާއި ސަރުކާރުގެ ވަސީލަތްތަކުގެ ބޭނުން ނަހަމަ ގޮތުގައި ހިފައިގެންކަމަށް އޭނާ ވިދާޅުވި އެވެ.
އެކަން ފާހަގަކުރައްވާ ވައްޑެ އިތުރަށް ވިދާޅުވީ ފައިސާ އާއި ނުފޫޒު ބޭނުންކޮށްގެން އިންތިޚާބުތައް ކާމިޔާބުކުރާކަމަށް ވާނަމަ އެމްޑީޕީ ވެރިކަމުގައި ނޯންނަ ދުވަހަކުން އެކަމުގެ ހިތި ނަތީޖާ ފެންނާނެ ކަމަށެވެ. އެދުވަހަކުން ޕާޓީ ނިކަމެތި ވާނެ ކަމަށާއި، ފައިސާ އާއި ނުފޫޒު ބޭނުންކޮށްގެން ގޮނޑި ހޯދުނަސް އެއީ ޕާޓީއަށް ލިބޭ މޮޅެއް ނޫން ކަމަށް އޭނާ ވިދާޅުވި އެވެ.
"އެމްޑީޕީއަކީ ސިޔާސަތު ވިއްކައިގެން ވޯޓު ހޯދާ ޕާޓީއެއް ގޮތުގައި އޮތްއޮތުން ބަދަލުކޮށް، ފައިސާއާ ސަރުކާރުގެ ވަސީލަތްތައް ނަހަމަގޮތުގައި ބޭނުންކޮށްގެން ވޯޓުހޯދާ ޕާޓީއަކަށް ބަދަލުކޮށްލުމަކީ، ވެރިކަމުގައި ނެތް ދުވަހަކުން މިޕާޓީ ވަރަށް ނިކަމެތިވާނެ ކަމެއް. އެއީ މާމޮޅު ކަމެއް ނޫން"
އުނގޫފާރު ދާއިރާގެ މެމްބަރު މުޙައްމަދު ވަހީދު
ގުރައިދޫ ދާއިރާގެ ގޮނޑި އެމްޑީޕީން ކާމިޔާބުކޮށްފައި ވާއިރު، އެ އިންތިޚާބުގައި އެމްޑީޕީއާއި ވާދަކުރި ޕީޕީއެމުން ގެންދަނީ ބޮޑެތި ތުހުމަތުތަކެއް ކުރަމުންނެވެ.
އެގޮތުން އެ އިންތިޚާބަށް ސަރުކާރުން ނުފޫޒު ފޯރުވަމުން ދިޔަ ކަމަށާއި، އިންތިޚާބާއި ދިމާކޮށް ފައިސާ ބަހާފައިވާކަމަށް އިދިކޮޅުން ވަނީ ތުހުމަތުކޮށްފަ އެވެ. އަދި އިންތިޚާބު އޮޅުވާލުމަށްވެސް ސަރުކާރުން މަސައްކަތް ކޮށްފައިވާކަމަށް އިދިކޮޅުން ދަނީ ބުނަމުން ނެވެ.
Advertisement
This content is created and paid for by advertisers and does not involve Voice Journalists
