އިގިރޭސި ޕްރިމިއާ ލީގުގައި މިރޭ ރަށުން ބޭރުގައި ވެސްޓްހަމް އާއި އެއްވަރުވެ ލީގު ތާވަލުގެ ކުރީގައި 6 ޕޮއިންޓުގެ ލީޑެއް ނެގުމަށް ލިބުނު ފުރުސަތު އާސެނަލް އިން ނަގާލައިފި އެވެ.

މިރޭގެ މެޗުގެ ފުރަތަަމަ 10 މިނެޓު ތެރޭގައި އާސެނަލް އިން ދެ ލަނޑުގެ ލީޑެއް ނެގިއިރު، އެޓީމުގެ ފުރަތަަމަ ލަނޑު 7 ވަނަ މިނެޓުގައި ކާމިޔާބުކޮށްދިނީ ބްރެޒިލްގެ ފޯވާޑް ގެބްރިއަލް ޖީސަސް އެވެ. މިއީ އެޓީމުގެ އިގިރޭސި ޑިފެންޑަރު ބެން ވައިޓް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

އާސެނަލްގެ ދެވަަނަ ލަނޑު ފުރަތަމަ ހާފުގެ 10 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން މާޓިން އޮޑެގާޑް އެވެ. މިއީ އެޓީމުގެ ބްރެޒިލް ފޯވާޑް ގެބްރިއަލް މާޓިނެލް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

Advertisement

ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން އާސެނަލް އިން މެޗު ޑޮމިނޭޓުކުރި ނަމަވެސް މިހާފުގައި ވެސްޓްހަމް އިން ވަނީ ލަނޑު ޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަތީޖާއެއްގެ ގޮތުން ފުރަތަަމަ ހާފުގެ 33 ވަނަ މިނެޓުގައި އެޓީމަށް ލިބުނު ޕެނަލްޓީއަކުން ނަތީޖާގެ ފަރަގު ކުޑަކޮށްދިނީ އެޓީމުގެ އަލްޖީރިއާ މިޑްފީލްޑަރު މުޙައްމަދު ސަޢީދު ބެންރަޙްމާ އެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން އާސެނަލް ކުރީގައި އޮވެގެންނެވެ.

ދެވަަނަ ހާފު ފެށިގެން 52 ވަނަ މިނެޓުގައި އާސެނަލްއަށް ވަނީ އެޓީމުގެ ލީޑު ފުޅާކުރުމަށް ރަނުގެ ފުރުސަތެއްލިބި ބޭނުންނުކުރެވިފައެވެ. ވެސްޓްހަމްގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ވަނީ އާސެނަލްއަށް ޕެނަލްޓީއެއް ދީފައެވެ. ނަމަވެސް އެޓީމުގެ އިގިރޭސި ފޯވާޑް ސަކާ ފޮނުވާލި ޕެނަލްޓީ ގޯލާއި އަމާޒުނުވެ ދިޔައީ ބޭރަށެވެ.

ވެސްޓްހަމް އިން މެޗުގެ ނަތީޖާ އެއްވަރުކުރި ދެވަަނަ ހާފުގެ 55 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އިގިރޭސި ފޯވާޑް ބްރައުން އެވެ. މިއާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމު އެއްވަރުވެގެންނެވެ.

މިރޭގެ މެޗުން ލިބުނު އެއް ޕޮއިންޓާއެކު 31 މެޗު ކުޅެގެން އާސެނަލްއަށް 74 ޕޮއިންޓް ލިބިފައިވާއިރު، ދެވަނައިގައި އޮތް މެންޗެސްޓާ ސިޓީ ވަނީ 30 މެޗު ކުޅެގެން 70 ޕޮއިންޓް ހަމަކޮށްފައެވެ. މި މެޗުން ލިބުނު އެއް ޕޮއިންޓާއެކު ވެސްޓްހަމް އަށް 30 މެޗު ކުޅެގެން ލިބިފައިވަނީ 31 ޕޮއިންޓާއެކު ތާވަލްގެ 15 ވަނަ އެވެ.