ގައުމީ އެއާލައިން މޯލްޑިވިއަނުން އޭޓީއާރު މަރުކާގެ އިތުރު ފަސް މަތިންދާ ބޯޓު ކުއްޔަށް ހޯދަން އިއުލާނު ކޮށްފި އެވެ.

މިކަމާއި ގުޅިގެން އައިލެންޑް އޭވިއޭޝަން ސާވިސް (އައިއޭއެސް)އިން ކުރި އިއުލާނެއްގައި ބުނީ، އެ ކުންފުންޏަށް މުޅިން އާ ނުވަތަ ބޭނުންކުރަމުން އަންނަ އޭޓީއާރު 42-600 މަރުކާގެ ފަސް ބޯޓް ބޭނުންވާ ކަމަށެވެ.

އަދި އާ ބޯޓެއްނަމަ 12 އަހަރަށް އަދި މިހާރު ބޭނުންކުރަމުންދާ ބޯޓެއްނަމަ ކުއްޔަށް ނެގުމަށް ހަމަޖެހިފައިވަނީ ހަ އަހަރަށް ކަމަށް އިއުލާނުގައި ވެއެވެ. 

Advertisement

އައިލެންޑް އޭވިއޭޝަނުން އިތުރަށް ބުނީ ކުއްޔަށް ނަގަން ބޭނުންވާ ފަސް ބޯޓްގެ ތެރެއިންއިން ތިން ބޯޓު ބޭނުން ވަނީ އޮޕަރޭޓިން ލީސް ނުވަތަ އެ އެއާލައިންގެ ދަތުރުތަކުގައި ބޭނުންކުރުމަށް ހަދާ އެއްބަސްވުމެއްގެ ދަށުންކަމަށާއި އަދި ބޯޓުތައް މި އަހަރުގެ ފަހުކޮޅު ނުވަތަ އަންނަ އަހަރުގެ ތެރޭގައި ރާއްޖެ ގެންނަން ބޭނުންވާކަމަށެވެ.

މީގެ އިތުރުން އެ ކުންފުނިން ދެން ގެންނަން ބޭނުންބާ ބޯޓުގެ ތެރެއިން އެއް ބޯޓު ބޭނުންވަނީ ސޭލް އެންޑް ލީސް ބެކް (އެސްއެލްބީ) ނުވަތަ ކުންފުންޏެއްގެ މުދާ އެ ކުންފުންޏަކަށް ބޭނުންކުރެވޭ ގޮތަކަށް އެހެން ފަރާތަކަށް ކުއްޔަށް ދިނުމަށް ހަދާ އެއްބަސްވުމެއްގެ ދަށުން ކަމަށް ބުނެފައިވާއިރު އެ ބޯޓު މި އަހަރުގެ ފަހު ކުއާޓަރަށް ރާއްޖެ ގެންނަން ބޭނުންވާކަމަށްވެސް އިއުލާނުގައި ބުނެފައިވެއެވެ.

އަދި ފަސް ވަނައަށް ކުއްޔަށް ނަގާ ބޯޓު ބޭނުންވަނީ ފައިނޭންސް ލީސް ނުވަތަ އެހެން ބަޔަކު ހަރަދުކޮށްގެން ބޯޓު ގަތުމަށް ފަހު މޯލްޑިވިއަންއަށް ބޭނުންކުރުމަށް އެ ބޯޓު ކުއްޔަށް ދިނުމަށް ހަދާ އެއްބަސްވުމެއްގެ ދަށުން ކަމަށް ވާއިރު އެ ބޯޓު 2025 ގެ ފުރަތަމަ ކުއާޓަރުގައި ރާއްޖެ ގެންނަން ބޭނުންވާ ކަމަށް އިއުލާނުގައި ވެއެވެ.

ބޯޓު ކުއްޔަށް ދޫކުރުމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ ހަތަރު ވަނަ ދުވަހުގެ ނިޔަލަށް ވަނީ ހުޅުވާލާފަ އެވެ.

މޯލްޑިވިއަންގައި މިހާރު އޭޓީއާރު72 މަރުކާގެ ދެ ފްލައިޓާއި އޭޓީއާރް މަރުކާގެ އެއް ފްލައިޓް އޮވެ އެވެ.

މީގެ އިތުރުން އެއާބަސް 320 މަރުކާގެ ފްލައިޓަކާއި ޑޭޝް8-300 މަރުކާގެ އަށް ފްލައިޓާއި ޑޭޝް8-200 މަރުކާގެ ދެ ފްލައިޓް އޮވެ އެވެ.

ސީޕްލޭންގެ ހިދުމަތަށް 11 ސީޕްލޭން އެ އެއާލައިންގައި އޮވެ އެވެ.