އިގިރޭސި ޕްރިމިއާ ލީގުގައި މިރޭ ރަށުން ބޭރުގައި ލީޑްސް އާއި ދެކޮޅަށް ކުޅުނު މެޗު 6-1 ގެ ނަތީޖާއަކުން ލިވަޕޫލް ކާމިޔާބުކޮއްފިއެވެ.

މިރޭގެ މެޗުގެ ފުރަތަަމަ ހާފުގައި ލިވަޕޫލުން ދެ ލަނޑުގެ ލީޑެއް ނެގިއިރު، އެޓީމުގެ ފުރަތަަމަ ލަނޑު ފުރަތަަމަ ހާފުގެ 35 ވަނަ މިނެޓުގައި ކާމިޔާބުކޮށްދިނީ ނެދަލޭންޑްސްގެ ފޯވާޑް ކޯޑީ ގައްޕޯއެވެ. މިއީ އެޓީމުގެ އިގިރޭސި ޑިފެންޑަރު އެލެގްޒެންޑަރ އާނޯލްޑް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ. އަދި އޭގެ ހަތަރު މިނެޓު ފަހުން އެޓީމުގެ ދެވަނަ ލަނޑު ކާމިޔާބުކޮށްދިނީ މުހައްމަދު ސަލާހް އެވެ. މިއީ އެޓީމުގެ ޕޯޗުގަލް ފޯވާޑް ޑިއެގޯ ޖޯޓާ ތަނަވަސްކޮށްދިން ފުރުސަތެއްގައި ސަލާހް ކާމިޔާބުކޮށްދިން ލަނޑެކެވެ.

ދެވަަނަ ހާފު ފެށިގެން ދެވަނަ މިނެޓުގައި ލީޑްސްގެ ކޮލަންބިއާ ފޯވާޑް ލުއިސް ސިނިސްޓެރާ ވަނީ ލަނޑެއް ކާމިޔާބުކޮށް އެޓީމަށް ނަތީޖާގެ ފަރަގު ކުޑަކޮށްދިފައެވެ. ނަމަވެސް އޭގެ ފަސް މިނެޓު ފަހުން ލިވިޕޫލުގެ ޑިއޭގޯ ޖޯޓާ ވަނީ ލަނޑެއް ކާމިޔާބުކޮށް އަނެއްކާވެސް އެޓީމަށް ދެލަނޑުގެ ލީޑެއް ހޯދައިދީފައެވެ.

Advertisement

ލިވަޕޫލްގެ ހަތަރު ވަނަ ލަނޑު ގައްޕޯ ތަނަވަސްކޮށްދިން ފުރުސަތެއްގައި ސަލާހް ކާމިޔާބުކޮށްދިން އިރު އެޓީމުގެ ފަސްވަނަ ލަނޑު 73 ވަނަ މިނެޓުގައި ކާމިޔާބުކޮށްދިނީ ޑިއޭގޯ ޖޯޓާ އެވެ. މިއީ އެޓީމުގެ އިގިރޭސި މިޑްފީލްޑަރު ޖޯޑަން ހެންޑަސަން ތަނަވަސްކޮށްދިން ފުރުސަތެއްގައި ޖޯޓާ ކާމިޔާބުކޮށްދިން ލަނޑެކެވެ.

މި މެޗުގައި ލިވަޕޫލް އިން ކާމިޔާބުކުރި ހަވަނަ ލަނޑު ދެވަނަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ އުރުގުއާއީ ފޯވަޑް ޑާވިން ނުނޭޒް އެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު 30 މެޗު ކުޅެގެން ލިވަޕޫލަށް ލިބިފައިވަނީ 47 ޕޮއިންޓެވެ. އެޓީމު މިވަގުތު ތާވަލުގެ 8 ވަނައިގައި އޮތް އިރު، މިރޭގެ މެޗުން ބަލިވި ލީޑްސް މިވަގުތު އޮތީ 31 މެޗު ކުޅެގެން ލިބުނު 29 ޕޮއިންޓާއެކު ތާވަލްގެ 16 ވަނައިގައެވެ.