ހދ. ކުމުންދޫ ބަނދަރު ތަރައްޤީ ކުރުމުގެ މަޝްރޫޢު ސަރުކާރުން މިއަދު އެމްޓީސީސީއާއި ހަވާލުކޮށްފިއެވެ.

މި މަޝްރޫޢު ހަވާލުކުރުމަށް މިއަދު ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ، އަލްފާޟިލް އާދަމް އާޒިމެވެ. އަދި މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ، ޑިރެކްޓަރ ޖެނެރަލް، އަލްފާޟިލާ ފާތުމަތު ޝާނާ ފާރޫޤެވެ.

ކުމުންދޫއަކީ މަސްވެރި ރަށެއްކަމުގައި ވީނަމަވެސް، ފަޅު ކުޑަ ގާމަތީ ރަށެއްކަމުން، މި ރަށަކީ ޒަމާނުއްސުރެ ވެސް ލަފާފުރުމުގެ ދަތިކަން އޮތް ރަށެކެވެ. އަދި، މި ރަށުގައި ބަނދަރެއް އޮތްނަމަވެސް، ލަފާފުރުމުގެ ދަތިކަން މުޅިން ހައްލެއް ނުވެއެވެ. ސަބަބަކީ ބަނދަރު އޮތް ސަރަހައްދުގެ ގޮތުން، މޫސުން ގޯސް ދުވަސްވަރުގައި ބަނދަރަށް ވަދެ ނިކުތުމަށް ދަތިވުމެވެ.

އެހެންކަމުން އެ ރަށުގެ ނެރު ހެދުމުގެ މަސައްކަތް މިހާރުވެސް އެމްޓީސީސީއިން ކުރަމުންއައި ނަމަވެސް، އެ ރަށު ރައްޔިތުންގެ އެންމެ ބޮޑު އެއް ކަންބޮޑުވުމަކީ ރަށުގެ ބަނދަރު ބޭނުންކުރުމުގައި އޮތް ޖާގައިގެ ދަތިކަން އިންތިހާއަށް ބޮޑުވުމެވެ.

މިމަޝްރޫއާއި ގުޅިގެން އެމްޓީސީސީއިން ނެރިފައިވާ ނޫސް ބަޔާނެއްގައި ބުނެފައިވަނީ މިއަދު ސޮއިކުރެވިގެން ދިޔަ މަޝްރޫޢުއާއިއެކު، މިކަން ހައްލު ކޮށް ހދ. ކުމުންދޫއަށް ދެގުނަބޮޑު ޒަމާނީ ރީތި ބަނދަރެއް މުސްތަޤުބަލުގައި ލިބިގެން ދިޔުމަކީ ރައްޔިތުންނަށް އެތައް ލުއިފަސޭހައަކާއި، ވަރަށް ބޮޑު އުފަލެއް ލިބޭނެ ކަމެއް ކަމުގައި އެކުންފުނިން ދެކޭ ކަމަށެވެ.

މި މަޝްރޫޢުގެ ދަށުން ކުރެވިގެންދާނެ މަސައްކަތްތައް:

-45760 ކިއުބިކް މީޓަރުގެ ސަރަޙައްދެއްގެ އައު ހާބަރ ބޭސިން ފުންކުރުން

-300 މީޓަރުގެސަރަޙައްދެއްގައި ބޭރުތޮށި ލުން

-40 މީޓަރުގެ ސަރަޙައްދެއްގައި ރިވެޓްމެންޓް ޖެހުން

-60 މީޓަރުގެ ސަރަޙައްދެއްގައި ގްރޮއިން ޖެހުން

-332 މީޓަރުގެ ސަރަޙައްދެއްގައި އެއްގަމުތޮށި ލުން

-މޫރިންގ ބޮއީސް ހަރުކުރުން

-މިހާރު ހުރި އެއްގަމުތޮށީގެ 154 މީޓަރުގެ ސަރަޙައްދެއް މަރާމާތު ކުރުން

-11 މީޓަރު ދިގު 11 މީޓަރު ފުޅާ ރޭމްޕެއް ހެދުން

-120 މީޓަރު ދިގު 2 މީޓަރު ފުޅާ ކޮންކްރީޓް ޖެޓީއެއް ހެދުން

-ބަނދަރު ބައްތި ހަރުކުރުން

-5252.30 އަކަ މީޓަރުގެ ސަރަޙައްދެއްގައި ހާބަރ ޕޭވްމަންޓް ހެދުން

-537.62 މީޓަރުގެ ކާރބް ހަރުކުރުން

މި މަޝްރޫޢަކީ 66.08 މިލިއަން ރުފިޔާއަށް 570 ދުވަސް ތެރޭ ނިންމުމަށް އެމްޓީސީސީއާއި ހަވާލުކޮށްފައިވާ މަޝްރޫޢުއެއް ކަމަށް އެކުންފުނިން ވަނީ ފާހަގަކޮށްފައެވެ. އަދި މި މަޝްރޫޢުގެ އަމަލީ މަސައްކަތް ފެށުމަށް ހަމަޖެހިފައިވަނީ އެންވަޔަރަންމަންޓަލް އިމްޕެކްޓް އެސެސްމަންޓެއް ހެދުމަށް ފަހުގައި ކަމަށް ވެސް އެކުންފުނިން ބުނެފައިވެއެވެ.