އެމްއެމްޕީއާރުސީގެ ޚިޔާނާތުގައި ހިމެނޭ ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފއިވާ ދައުވާތައް ސާބިތުކޮށްދިނުމަށް ދައުލަތުން ހުށައެޅި ހެކިތައް ބަލައިގަތުމާއި ގުޅޭގޮތުން ހައިކޯޓުން ނިންމި ނިންމުން ސުޕްރިމް ކޯޓުގައި އިސްތިއުނާފު ކުރަން ނިންމައިފި އެވެ. 

އެ މައްސަލައިގައި ރައީސް ޔާމިނުގެ ފަރާތްޕުޅުން ވަނީ ކުރީގެ ނާއިބު ރައީސް އަހުމަދު އަދީބާއި އެމްއެމްޕީއާރްސީގެ ކުރީގެ މެނޭޖިން ޑިރެކްޓަރު އަހުމަދު ޒިޔަތު ހިމެނޭހެން ދައުލަތުގެ ގިނަ ޝަފަހީ ހެކިތަކެއް ބަލައިނުގަތުމަށް އެދިފައެވެ. އޭގެ އިތުރުން އެ މައްސަލައާއި ގުޅުންހުރި ތަހުގީގު ބަޔާންތަކާއި ލޮގުތަކެއް ހޯދުމަށްވެސް އެދިވަޑައިގެންފައި ވެއެވެ. 

އެހެން ނަމަވެސް ކްރިމިނަލް ކޯޓުން ނިންމީ ރައީސް ޔާމިނުގެ ފަރާތްޕުޅުން ހުށައެޅުއްވި ކަންކަން ބަލައިގަންނަން ނުޖެހޭ ކަމަށެވެ. 

އެއާއެކު ރައީސް ޔާމިނުގެ ފަރާތްޕުޅުން އެެ މައްސަލަ ހައިކޯޓުގައި އިސްތިއުނާފު ކުރިއެވެ. ހައިކޯޓުގައި އޮތް އަޑުއެހުންތަކަށްފަހު އެ މައްސަލަ ބެއްލެވި ފަނޑިޔާރުންގެ ބެންޗުގެ އަގުލަބިއްޔަތުން ވަނީ ދަށު ކޯޓުގެ ނިންމުން ދަމަހައްޓާފަ އެވެ. 

ފުއްގިރި މައްސަލައިގެ އަޑުއެހުންތައް ވަގުތީގޮތުން މެދުކަނޑާލުމަށްފަހު އަލުން ފަށާފައިވާއިރު، މިއަދު އެ މައްސަލައިގައި ބޭއްވި އަޑުއެހުމުގައި ރައީސް ޔާމީންގެ ޤާނޫނީ ވަކީލު އާދަމް ޝަމީމު ވަނީ ހެއްކާއި ގުޅޭ މައްސަލަ ރައީސް ޔާމިނުގެ ފަރާތްޕުޅުން ސުޕްރިމް ކޯޓުގައި އިސްތިއުނާފު ކުރުމަށް ނިންމާފައިވާކަމަށް ވިދާޅުވެފަ އެވެ. 

ޤާނޫނުން ލިބިދީފައިވާ މުއްދަތުގެ ތެރޭގައި އެ މައްސަލަ ސުޕްރިމް ކޯޓަށް ހުށައަޅާނެ ކަމަށް ޝަމީމު ވިދާޅުވި އެވެ. 

މިއަދުގެ އަޑުއެހުން ނިންމާލިއިރު، ދެން އެ މައްސަލައިގެ އަޑުއެހުމެއް ބާއްވާނެ ދުވަހެއް ގާޒީ ވިދާޅެއް ނުވެއެވެ. އެހެން ނަމަވެސް އަޑުއެހުމެއް ތާވަލުކުރާނަމަ އެ މައްސަލައިގައި ހިމެނޭ ހަސްމުންނަށް ދުރާލާ އަންގާނެކަމަށް ގާޒީ ވަނީ ވިދާޅުވެފަ އެވެ.