ޔުއެފާ ޗެމްޕިއަންސްލީގުގެ ކުއާޓަރ ފައިނަލްގެ ދެވަނަ ލެގުގައި މިރޭ ރަށުން ބޭރުގައި ނަޕޯލީ އާއި ވާދަކުރި މެޗު 1-1 ގެ ނަތީޖާއަކުން އެއްވަރުކޮށް، 16 އަހަރުގެ ތެރޭގައި ފުރަތަަމަ ފަހަރަށް އޭސީ މިލާނުން ޗެމްޕިއަންސްލީގުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

މިދިޔަ ހަފްތާގައި މިލާންގެ ދަނޑުގައި ކުޅުނު ފުރަތަަމަ ލެގުގެ މެޗު 1-0 ގެ ނަތީޖާއަކުން އެޓީމު މޮޅުވެފައި އޮތުމުން މިރޭގެ މެޗަށް ނުކުތްއިރު މެޗު އެއްވަރު ކޮށްލައިގެން ވެސް އެޓީމަށް ސެމީގެ ފުރުސަތު ލިބެން އޮތެވެ.

ފާއިތުވެދިޔަ 17 ދުވަސް ތެރޭގައި މިދެޓީމު ތިން ފަހަރެއްގެ މަތިން ވާދަކޮށްފައި ވާއިރު، އޭގެ ތެރެއިން ދެމެޗުން އޭސީ މިލާން މޮޅުވެފައިވާއިރު މިރޭގެ މެޗު ނިމިފައި ވަނީ ދެޓީމު އެއްވަރުވެގެންނެވެ.

މިރޭގެ މެޗުގެ ފުރަތަަމަ ހާފުގެ 22 ވަނަ މިނެޓުގައި މެޗުގެ ލީޑު ނެގުމަށް އޭސީ މިލާނަށް ޕެނަލްޓީއެއް ލިބުނު އިރު އެޓީމުގެ ފުރާންސް ފޯވާޑް އޮލިވިއޭ ޖިރޫޑް ފޮނުވާލި ޕެނަލްޓީ ނަޕޯލީ ގެ ގޯލްކީޕަރު އެލެކްސް މެރޭޓް ދިފާއުކޮށްފައެވެ. ނަމަވެސް ފުރަތަަމަ ހާފު ނިމުމުގެ ކުރިން ޖިރޫޑް ވަނީ ލަނޑެއް ކާމިޔާބުކޮށް އޭސީ މިލާނަށް މެޗުގެ ލީޑު ނަގައިދީފަ އެވެ.

މިއީ ފުރަތަަމަ ހާފުގެ 42 ވަނަ މިނެޓުގައި އެޓީމުގެ ޕޯޗުގަލް ފޯވާޑް ރަފައެލް ލިއައޯ އޭސީ މިލާނުގެ ހާފުތެރެއިން ލިބުނު ބޯޅައެއް ހިފައިގެން ގޮސް ބޯޅަޔާއެކު ނަޕޯލީ ގެ ޕެނަލްޓީ އޭރިއާ ތެރެއަށް އެޓީމުގެ ދެ ޑިފެންޑަރުން ކައިރިން ނައްޓާލުމަށް ފަހު މުޅިން ހުސްކޮށްލާފައި ޖައްސާލި ބޯޅައެއް ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

ފުރަތަަމަ ހާފުގެ އިތުރު ވަގުތުގެ ތެރޭގައި ނަޕޯލީގެ ނައިޖީރިއާ ފޯވާޑް ވިކްޓާ އޮސިމްހެން އެޓީމަށް ލަނޑެއް ކާމިޔާބުކޮށްދިން ނަމަވެސް ބޯޅަ ކޮންޓްރޯލް ކުރުމުގެ ތެރޭގައި އޭނާގެ އަތުގައި ބޯޅަ ޖެހިފައިވާތީ ރެފްރީ ނިންމީ އެއީ ރަގަޅު ލަނޑެއް ނޫންކަމަށެވެ.

މެޗުގެ ދެވަަނަ ހާފުގައި ނަޕޯލީ އިން އެޓީމުގެ ކުޅުން ރަނގަޅުކޮށް އޭސީ މިލާނުގެ ގޯލަށް އަމާޒުކޮށް ގިނަ ހަމަލާތަކެއް ފޮނުވާލާފައިވާ އިރު ދެވަނަ ހާފުގެ 80 ވަނަ މިނެޓުގައި އޭސީ މިލާނުގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ވަނީ ނަޕޯލީއަށް ޕެނަލްޓީއެއް ދީފައެވެ. ނަމަވެސް އެޓީމުގެ ޖޯޖިޔާގެ މިޑްފީލްޑަރު ޚަވިޗާ ކްވަރަޓްސްކެލިއާ ފޮނުވާލި ޕެނަލްޓީ އޭސީ މިލާނުގެ ގޯލްކީޕަރު މައިކް މައިގްނާން ވަނީ ދިފާއުކޮށްފައެވެ.

މި މެޗުގައި ނަޕޯލީއަށް މެޗުގެ ނަތީޖާ އެއްވަރުކުރި ލަނޑު ދެވަނަ ހާފުގެ އިތުރު ވަގުތުގައި ކާމިޔާބުކޮށްދިނީ އެޓީމުގެ ނައިޖީރިއާ ފޯވާޑް ވިކްޓާ އޮސިމްހެން އެވެ.

އޭސީ މިލާނުގެ ކޯޗު ސްޓެފާނޯ ޕިއޯލީ އެ މަގާމަށް ހަމަޖެއްސިއިރު އެޓީމު އޮތީ ސެރީއޭގެ 13 ވަނައިގައި އެވެ. ނަމަވެސް މިދިޔަ ސީޒަނުގައި އޭނާ ވަނީ 2010/11 އަށް ފަހު އޭސީ މިލާނަށް ފުރަތަމަ ފަހަރަށް އިޓާލިއަން ސެރިއޭގެ ތަށި ހޯދައިދީފަ އެވެ. އަދި މިއީ ފާއިތުވެދިޔަ 16 އަހަރު ތެރޭގައި ޗެމްޕިއަންސްލީގެ ސެމީ ފައިނަލުން އޭސީ މިލާނަށް ޖާގަ ލިބުނު ފުރަތަމަ ފަހަރެވެ.

ސެމީ ފައިނަލުގައި އޭސީ މިލާން ވާދަކުރަންޖެހެނީ މާދަމާ ރޭ ކުޅޭ ބެންފީކާ އާއި އިންޓަ މިލާން ވާދަކުރާ މެޗުން މޮޅުވާ ޓީމަކާއި ދެކޮޅަށެވެ. އެދެޓިމު ވާދަކުރި ފުރަތަަމަ ލެގުގެ މެޗު ރަށުން ބޭރުގައި 2-0 ގެ ނަތީޖާއަކުން އިންޓަ މިލާން މޮޅުވެފައި އޮތުމުން މާދަމާ ރޭގެ މެޗު އެއްވަރުކޮށްލައިގެން ސެމީގެ ޖާގައެއް ހޯދުމުގެ ފުރުސަތު އިންޓަ މިލާނަށް އެބައޮތެވެ.