ސައުދީ ޕްރޮފެޝަނަލް ލީގުގައި މިރޭ ރަށުން ބޭރުގައި އަލް ހިލާލް ދެކޮޅަށް ކުޅުނު މެޗުން 2-0 ގެ ނަތީޖާއަކުން ބަލިވެ، ލީގު ތާވަލުގެ އެއްވަނައަށް އަރަން ލިބުނު ފުރުސަތު އަލް ނަސްރު އިން ނަގާލައިފިއެވެ.

އަންގާރަ ދުވަހުގެ ރޭ އަލް ހިލާލާ ދެކޮޅަށް ކުޅުނު މެޗުން މޮޅުވެ އަލް ނަސްރަށް އެއް ވަނައިގައި އޮތް އަލް އިއްތިހާދާ ޕޮއިންޓުގެ ގޮތުން ހަމަހަމަ ކުރުމުގެ ފުރުސަތު އޮތެވެ. ނަމަވެސް އެއީ އިއްތިހާދަށްވުރެ އެއް މެޗު އިތުރަށް ކުޅެގެންނެވެ.

މިއީ އަލް ނަސްރުގެ ކޯޗުކަމުން ރޫޑީ ގާސިއާ ވަކިކުރި ފަހުން އެޓީމު ކުޅުނު ފުރަތަމަ މެޗެވެ. ގާސިއާ ކޯޗުކަމުން ވަކިކޮށްފައިވާނި އެޓީމުގެ ބައެއް ސީނިއަރ ކުޅުންތެރިންނާއި މައްސަލަޖެހި ޖެހިގެންކަމަށް މީޑިއާތަކުން ރިޕޯޓް ކުރި ނަމަވެސް އަލް ނަސްރުން ބުނެފައިވަނީ ކޯޗު މަގާމުން ވަކިކުރީ މިސީޒަނުގައި އެޓީމުން ހާސިލްކުރުމަށް ކަނޑައަޅާފައިވާ ޓާގެޓުތައް ހާސިލްނުކުރެވި ފަހަކަށްއައިސް ޓީމު ނެރެމުން އަންނަ ދަށް ނަތީޖާތަކުގެ ސަބަބުން ކަމަށެވެ.

މި މެޗުގައި އަލް ހިލާލުން ކާމިޔާބުކުރި ދެ ލަނޑަކީ ވެސް އެޓީމަށް ލިބުނު ދެ ޕެނަލްޓީން ކާމިޔާބުކުރި ދެ ލަނޑެވެ. އަދި މި ދެ ޕެނަލްޓީ ވެސް ކާމިޔާބުކޮށްދިނީ އެޓީމުގެ ނައިޖީރިއާ ފޯވާޑް އޮޑިއަން އިގަލޯ އެވެ.

ފުރަތަަމަ ހާފުގެ 42 ވަނަ މިނެޓުގައި އަލް ނަސްރުގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ލިބުނު ޕެނަލްޓީ އެއްގައި އިގާލޯ އަލް ހިލާލަށް ލީޑު ނަގައިދިން އިރު، އެޓީމުގެ ދެވަަނަ ލަނޑަކީ ދެވަަނަ ހާފުގެ 62 ވަނަ މިނެޓުގައި އަލް ނަސްރުގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަލް ހިލާލުގެ ކުޅުންތެރިޔަކަށް ކުރި ފައުލަކާއި ގުޅިގެން އެޓީމަށް ލިބުނު ޕެނަލްޓީއެއްގައި އޭނާ ކާމިޔާބުކޮށްދިން ލަނޑެކެވެ. އަދި މިއީ މިސީޒަނުގައި ލީގުގައި އޭނާ ކާމިޔާބުކުރި 18 ވަނަ ލަނޑެވެ.

މިރޭގެ މެޗުން ލިބުނު ތިން ޕޮއިންޓާއެކު އެކު ލީގުގައި ކުޅުނު 25 މެޗުން ލިބުނު 49 ޕޮއިންޓާއެކު އަލް ހިލާލް މިވަގުތު އޮތީ ލީގު ތާވަލުގައި ހަތަރު ވަނައިގައެވެ. މިރޭގެ މެޗުން ބަލިވި އަލް ނަސްރު ލީގުގައި ކުޅުނު 24 މެޗުން އެޓީމަށް ލިބިފައިވަނީ 53 ޕޮއިންޓެވެ.މިވަގުތު ލީގު ތާވަލުގެ ދެވަނައިގައި އެޓީމު އޮތްއިރު އެވަނައިގައި އޮތް އަލް އިއްތިހާދަށް 23 މެޗު ކުޅެގެން 56 ޕޮއިންޓް ލިބިފައިވާއިރު މި މަހުގެ 27 ވަނަ ދުވަހު އަލް ޝަބާބްއާއި ދެކޮޅަށް ކުޅޭ މެޗުން މޮޅުވެ ލީގުގެ ތާވަލުގެ ކުރީގައި 6 ޕޮއިންޓުގެ ލީޑެއް ނެގުމުގެ ފުރުސަތު މިހާރު އެޓީމަށް އެބައޮތެވެ.