ސަރުކާރުން ރައްޔިތުންނަށް ފޯރުކޮށްދޭ ޚިދުމަތްތަކާއި ދޭތެރޭ ސަރުކާރުގެ ވާދަވެރިން ސުވާލުތައް އުފެއްދި ނަމަވެސް ރައްޔިތުން ސުވާލު ނޫފައްދާކަމަށް ރައްޔިތުންގެ މަޖިލީހުގެ ވިލިނގިލި ދާއިރާގެ މެމްބަރު ސައުދު ހުސައިން ވިދާޅުވެއްޖެ އެވެ.
ސައުދު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ނެވެ.
އޭނާ ވިދާޅުވީ ރައްޔިތުންގެ މަޖިލީހަށް އެކު ކަންކަމުގައި އިދިކޮޅު ފަރާތްތަކުން (ސަރުކާރާއި ވާދަވެރި ފަރާތްތަކުން) ޤަރާރުތައް ހުށައަޅަމުންދަނީ މަޖިލީހުގެ ވަގުތުތައް ނަގާލަން ކަމަށެވެ. އަދި ސަރުކާރަށް ޚިދުމަތް ފޯރުކޮށް ނުދެވޭކަން ދެއްކުމަށް ކަމަށެވެ.
އެހެން ނަމަވެސް ސަރުކާރުގެ ސިޔާސަތުތައް ރައްޔިތުން ޤަބޫލުކުރާ ކަމަށާއި، އެކަން ގުރައިދޫ ދާއިރާގެ އިންތިޚާބުންވެސް ހާމެވެގެން ގޮސްފައިވާކަމަށް އޭނާ ވިދާޅުވި އެވެ.
ގުރައިދޫ ދާއިރާގެ އިންތިޚާބާއި ދިމާކޮށް އާސަންދައަށް އެކަނި 170 މިލިއަން ރުފިޔާ ހޭދަކޮށްފައިވާކަމަށް މަޖިލީހުގެ ބައެއް މެމްބަރުން ވިދާޅުވެފައިވާއިރު ސައުދި ވިދާޅުވީ އެއީ ކަންބޮޑުވާން ޖެހޭ ކަމެއް ނޫން ކަމަށެވެ. ބޭސްފަރުވާއަކީ އަސާސީ ހައްގަކަށް ވާއިރު، އެ ހައްގު އަދާކުރުމަށް އާސަންދައިން ޚަރަދުކުރުމަކީ މައްސަލައެއް ނޫންކަމަށް އޭނާ ވިދާޅުވި އެވެ.
އެއާއެކު ސައުދު ވިދާޅުވީ ސަރުކާރުން ޚިދުމަތް ފޯރުކޮށް ނުދޭކަމަށް ރައްޔިތުން ބުނަމުން ނުދާކަމަށެވެ. އަދި ސަރުކާރުގެ ޚިދުމަތާއި މެދު ރައްޔިތުން ސުވާލު ނުއުފައްދާ ކަމަށެވެ.
"މިއަދު ރައްޔިތުން ޤަބޫލު އެބަ ކުރޭ މި ސަރުކާރުގެ ސިޔާސަތު ކާމިޔާބުކަން. ރައްޔިތުންނަށް އަޅާލާ އޯގާތެރި ސަރުކާރެއް މި އޮތީ. މި ސަރުކާރުން ރައްޔިތުންނަށް ފޯރުކޮށްދެމުންދާ ޚިދުމަތްތަކާއި ބެހޭގޮތުން ރައްޔިތުން ސުވާލެއް ނުކުރޭ. މިތާ ތެރޭ ތިބެގެން (ރައްޔިތުންގެ މަޖިލިސްތެރޭ ތިބެގެން) ވަކި ބަޔަކު ހިތް ނުތަވަސް ވެގެން ސުވާލު ކުރަމުން ދަނީ"
މަޖިލީހުގެ ވިލިނގިލި ދާއިރާގެ މެމްބަރު ސައުދު ހުސައިން
ސައުދު ވިދާޅުވީ ސަރުކާރުގެ ޚިދުމަތްތަކާއި މެދު ސުވާލު އުފައްދަނީ ސަރުކާރުން ހޯދަމުންދާ ކާމިޔާބީތަކާއި ގުޅިގެން ހިތް ނުތަވަސްވާ މެމްބަރުންތަކެއް ކަމަށެވެ.
އިންތިޚާބުތައް ފަސޭހަކަމާއެކު ކާމިޔާބު ކުރެވެނީ ރައީސް ޞާލިހުގެ ލީޑަޝިޕް ވަރުގަދަ ވެގެންކަމަށް އޭނާ ވިދާޅުވި އެވެ. އަދި އިންތިޚާބާއި ދިމާކޮށް ސަރުކާރުން ޚަރަދު ކުރާ ވާހަކައާއި ނުފޫޒު ފޯރުވާ ވާހަކައާއި ފައިސާ ދައުލަތުގެ ވަސީލަތްތައް ބޭނުންކުރާ ވާހަކަ ދައްކަނީ ނާކާމިޔާބުވުމުން އެކަން ހަޖަމު ނުކުރެވޭތީ ކަމަށް ސައިދު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
