ޔުއެފާ ޔޫރޮޕާ ލީގު ކުއާޓާ ފައިނަލުގެ ދެވަނަ ލެގުގައި މިރޭ އަމިއްލަ ދަނޑުގައި 3-0 ގެ ނަތީޖާއަކުން މެންޗެސްޓާ ޔުނައިޓެޑް ބަލިކޮށް ސެވިއްޔާއިން މުބާރާތުގެ ސެމީ ފައިނަލުގެ ޖާގައެއް ކަށަވަރުކޮށްފިއެވެ.

މެންޗެސްޓާ ޔުނައިޓެޑްގެ ދަނޑުގައި ކުޅުނު ފުރަތަަމަ ލެގު 2-2 ގެ ނަތީޖާއަކުން އެވަރުވެފައި، އޮތުމުން މިރޭގެ ނަތީޖާއާއެކު އެޓީމަށް ސެމީގެ ފުރުސަތު ލިބުނީ 5-2 ގެ އެގްރިގޭޓު ނަތީޖާއަކުން މެންޗެސްޓާ ޔުނައިޓެޑް މައްޗަށް ކުރި ހޯދައިގެންނެވެ.

އަނިޔާ އާއި ސަސްޕެންޝަންގެ ސަބަބުން މެންޗެސްޓާ ޔުނައިޓެޑުގެ މުހިންމު ބައެއް ކުޅުންތެރިންނާއި ނުލައި މިރޭގެ މެޗު އެޓީމުން ފެށިއިރު، މެޗުގެ ވަރަށް ކުރީކޮޅު ސެވިއްޔާ އިން ލަނޑެއް ކާމިޔާބުކޮށް މެޗުގެ ލީޑު ނެގި އެވެ. މި ލަނޑު އެޓީމަށް ކާމިޔާބުކޮށްދިނީ މޮރޮކޯގެ ފޯވާޑް ޔޫސެފް އެން ނެސީރީ އެވެ. އަދި ފުރަތަަމަ ހާފު ނިމުމުގެ ކުރިން އެޓީމުގެ އާޖެންޓީނާ ފޯވާޑް ލޫކަސް އޮކަމްޕޯސް އެޓީމަށް އިތުރު ލަނޑެއް ކާމިޔާބުކޮށްދިނެވެ. ނަމަވެސް ވީއޭއާރުން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

Advertisement

ދެވަަނަ ހާފު މެންޗެސްޓާ ޔުނައިޓެޑުން ދެ ބަދަލާއި އެކު ފެށިއިރު، ދެވަަނަ ހާފުގެ 47 ވަނަ މިނެޓުގައި ސެވިއްޔާގެ ފްރާންސް ޑިފެންޑަރު ލޮއިކް ބަޑޭ ވަނީ ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ. މިއީ އެޓީމުގެ ކްރޮއޭޝިޔާ މިޑްފީލްޑަރު އިވާން ރަކިޓިޗް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މިހާފުގައި މެންޗެސްޓާ ޔުނައިޓެޑުން އެންމެ ހުސް ފުރުސަތެއް ލިބުނީ އެޓީމުގެ ބްރެޒިލް މިޑްފީލްޑަރު ކަސަމީރޯ އަށެވެ. ނަމަވެސް ސެވިއްޔާގެ ޕެނަލްޓީ އޭރިއާ ތެެރެއިން ކަސަމީރޯ ފޮނުވާލި ބާރު ހަމަލާ ސެވިއްޔާގެ ގޯލްކީޕަރު ބޯނޯ ވަނީ ދިފާއުކޮށްފައެވެ.

މި މެޗުގައި ސެވިއްޔާގެ ތިންވަނަ ލަނޑު ދެވަނަ ހާފުގެ 82 ވަނަ މިނެޓުގައި ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިން މޮރޮކޯގެ ފޯވާޑް ޔޫސެފް އެން ނެސީރީ އެވެ.

ސެމީ ފައިނަލުގައި ސެވިއްޔާ ވާދަކުރަންޖެހެނީ ކުއާޓާ ފައިނަލުގައި ޕޯޗުގަލްގެ ސްޕޯޓިން ލިސްބަން ބަލިކޮށް ސެމީ ފައިނަލުގެ ޖާގައެއް ހޯދި އިޓަލީގެ ޔުވެންޓަސް އާއި ދެކޮޅަށެވެ.