މަޑުއްވަރީ ކައުންސިލް ފުޓްސަލް ޗެލެންޖު 2023 ގެ ފުރަތަަމަ ޑިވިޝަނުގައި މިރޭ ކުޅުނު ފުރަތަަމަ މެޗު ފަސޭހަކަމާއި އެކު 6-2 ގެ ނަތީޖާއަކުން އެފްސީ ވަން ރައުންޑް ބަލިކޮށް ބީބީ ނިއު ޖެނަރޭޝަން އިން މުބާރާތުގެ ފެށުން ރަނގަޅުކޮށްފި އެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ލީޑު ނެގީ ބީބީ ނިއު ޖެނެރޭޝަން އިންނެވެ. މި ލަނޑު ފުރަތަަމަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ އެޓީމުގެ އަހުމަދު މިގުދާދު އެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އެޓީމު ކުރީގައި އޮވެގެންނެވެ.

ދެވަނަ ހާފުގެ ފެށިގެން ދެވަނަ މިނެޓުގައި އެފްސީ ވަން ރައުންޑަށް މެޗުގެ ނަތީޖާ އެއްވަރުކޮށްދިނީ އެޓީމުގެ އަބްދުﷲ ރިމާހް އެވެ. ނަމަވެސް އޭގެ ދެ މިނެޓު ފަހުން ބީބީ ނިއު ޖެނެރޭޝަނަށް ދެވަަނަ ފަހަރަށް ލީޑު ހޯދައިދިނީ ވެސް އެޓީމުގެ ފުރަތަމަ ލަނޑު ކާމިޔާބުކޮށްދިން އަހުމަދު މިގުދާދު އެވެ. އަދި ޖެހިގެން އައި މިނެޓުގައި މުހައްމަދު ސަހާއު ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްދީފައެވެ.

ބީބީ ނިއު ޖެނެރޭޝަން އިން މިމެޗުގައި ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 35 ވަނަ މިނެޓުގައި ކާމިޔާބުކޮށްދިނީ ޔާމިން މުހައްމަދު އެވެ. އަދި އޭގެ މިނެޓެއް ފަހުން އެޓީމުގެ ފަސްވަނަ ލަނޑު އަހުމަދު ހަމްމާދު ކާމިޔާބުކޮށްދިން އިރު އެޓީމުގެ ހަވަނަ ލަނޑު 37 ވަނަ މިނެޓުގައި ކާމިޔާބުކޮށްދީ މިގުދާދު ވަނީ މި މެޗުގައި އޭނާގެ ހެޓްރިކް ފުރިހަމަކޮށްފައެވެ.

މިމެޗުގައި އެފްސީ ވަން ރައުންޑުން ކާމިޔާބުކުރި ދެވަނަ ލަނޑު ފަހު ހާފުގެ 39 ވަނަ މިނެޓުގައި ކާމިޔާބުކޮށްދިނީ އެޓީމުގެ ހަނޫން މޫސާ އެވެ. މި މެޗުގެ މޮޅު ކުޅުންތެރިޔަކަށް ހޮވުނީ ބީބީ ނިއު ޖެނެރޭޝަންގެ ޔާމީން މުހައްމަދު އެވެ.

1444 ވަނަ އަހަރުގެ ފިތުރު އީދު ބަންދުގައި މަޑުއްވަރީ ކައުންސިލްގެ ފަރާތުން އިންތިޒާމްކޮށްގެން ބާއްވާ ފުޓްސަލް ޗެލެންޖުގެ ޑިޖިޓަލް ޕާޓްނަރަކީ އުރުދޫ މޯލްޑިވްސް އެވެ. އަދި މި މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ވޮއިސް އެވެ. މިމުބާރާތުގެ ހުރިހާ މެޗެއް މަޑުއްވަރީ ކައުންސިލްގެ ފޭސްބުކް ޕޭޖުން ލައިވު ކުރުމަށް ހަމަޖެހިފައިވާއިރު، އެޕްރިލް 21-24 އަށް މުބާރާތުގެ ގްރޫޕް ސްޓޭޖުގެ މެޗުތައް ކުރިއަށް ގެންދިއުމަށް ވަނީ ހަމަޖެހިފައެވެ. އަދި އެއްދުވަހު ގެ ބްރޭކަކަށް ފަހު ސެމީ ފައިނަލް މެޗުތައް ކުޅުމަށް ހަމަޖެހިފައިވަނީ އެޕްރިލް 26 ވަނަ ދުވަހުގެ ރޭ އެވެ. އަދި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް 28 ވަނަ ދުވަހުގެ ރޭ އެވެ.