މަޑުއްވަރީ ކައުންސިލް ފުޓްސަލް ޗެލެންޖު 2023 ގެ ފުރަތަަމަ ޑިވިޝަނުގައި މިރޭ ކުޅުނު ދެވަނަ މެޗުގައި  ނޮދަންސް ސްޕޯޓްސް ކްލަބް 2-0 ގެ ނަތީޖާއަކުން ބަލިކޮށް ޕެންތާސް ސްޕޯޓްސް ކްލަބް ގުރޫޕްގެ އެއްވަނައަށް ޖެހިލައިފި އެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި ހާފުގައި ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ކުރެވޭގޮތެއް ނުވިއެވެ.

ދެވަަނަ ހާފުގެ 15 ވަނަ މިނެޓުގައި ޕެންތާސް އިން ވަނީ ލަނޑެއް ކާމިޔާބުކޮށް މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ މިރޭގެ މެޗުގެ މޮޅު ކުޅުންތެރިޔަކަށް ހޮވުނު މުހައްމަދު ޖުމާން އަހުމަދު އެވެ. އަދި އޭގެ މިނެޓެއް ފަހުން ޖުމާން ތަނަވަސްކޮށްދިން ފުރުސަތެއްގައި އެޓީމުގެ ދެވަަނަ ލަނޑު ކާމިޔާބުކޮށްދިނީ މުހައްމަދު އައްޒާމް އެވެ. 

Advertisement

މާދަމާ ރޭ ވެސް މި މުބާރާތުގައި ފިރިހެން ޑިވިޝަންގެ ތިން މެޗު ކުޅުމަށް ވަނީ ހަމަޖެހިފައެވެ. އެގޮތުން 20:30 ގައި ކުޅެވޭ ފުރަތަމަ މެޗުގައި ބައްދަލުކުރާނީ ވާލު ސްޕޯޓްސް ކުލަބާއި ސްޕާޓަންސް ސްޕޯޓްސް ކްލަބެވެ. އަދި 21:30 ގައި ކުޅޭ މެޗުގައި ބައްދަލުކުރާނީ ބީބީ ނިއު ޖެނެރޭޝަން އާއި ނޮދަންސް ސްޕޯޓްސް ކްލަބެވެ. 22:30 ގައި ކުޅޭ ފަހު މެޗުގައި ބައްދަލުކުރާނީ ޕެންތާސް އާއި އެފްސީ ވަން ރައުންޑުން އެވެ.

1444 ވަނަ އަހަރުގެ ފިތުރު އީދު ބަންދުގައި މަޑުއްވަރީ ކައުންސިލްގެ ފަރާތުން އިންތިޒާމްކޮށްގެން ބާއްވާ ފުޓްސަލް ޗެލެންޖުގެ ޑިޖިޓަލް ޕާޓްނަރަކީ އުރުދޫ މޯލްޑިވްސް އެވެ. އަދި މި މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ވޮއިސް އެވެ. މިމުބާރާތުގެ ހުރިހާ މެޗެއް މަޑުއްވަރީ ކައުންސިލްގެ ފޭސްބުކް ޕޭޖުން ލައިވު ކުރުމަށް ހަމަޖެހިފައިވާއިރު، އެޕްރިލް 21-24 އަށް މުބާރާތުގެ ގްރޫޕް ސްޓޭޖުގެ މެޗުތައް ކުރިއަށް ގެންދިއުމަށް ވަނީ ހަމަޖެހިފައެވެ. އަދި އެއްދުވަހު ގެ ބްރޭކަކަށް ފަހު ސެމީ ފައިނަލް މެޗުތައް ކުޅުމަށް ހަމަޖެހިފައިވަނީ އެޕްރިލް 26 ވަނަ ދުވަހުގެ ރޭ އެވެ. އަދި މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ އެޕްރިލް 28 ވަނަ ދުވަހުގެ ރޭ އެވެ.