އަދުގެ ރައީސުލްޖުމްހޫރިއްޔާ އިބްރާޙީމް މުހައްމަދު ޞާލިހުގެ ސަރުކާރުން އަންނަނީ ސިލްސިލާކޮށް ޤާނޫނާއި ޚިލާފަށް ކަންކަން ކުރަމުން ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސަޢީދު ވިދާޅުވެއްޖެއެވެ.
ޚަރަދު ކުޑަކުރަން ތަންފީޒުކުރާނެކަމަށް ސަރުކާރުން ބަޖެޓުގައި ހިމެނި އެއްވެސް ސިޔާސަތެއް ތަންފީޒުނުވުމުގެ ސަބަބުން ބަޖެޓުގެ ދަރަނި ކުޑަނުވެ އިހުނަށްވުރެ ބޮޑުވަމުން އަންނަ ކަމަށް އޮންލައިން ނޫހަކުން ރިޕޯޓްކޮށް ލިޔެފައިވާ ޚަބަރަކާއި ގުޅިގެން ސައީދު ވަނީ ސަރުކާރުގެ ޖުމްލަ ދަރަނި 120 ބިލިއަން ހުރަަސްކޮށްފައިވާ ކަމަށް ވިދާޅުވެފައެވެ.
މިއާއެކު ސައީދު ވަނީ ސަރުކާރުގެ ޚަރަދުތައް ކުޑަ ނުކޮށް ޓެކްސް ބޮޑުކޮށް، ރައްޔިތުންނަށް ތަކުލީފް ޖައްސަމުން ދާތީ އެކަމާއި ގުޅިގެން ކަންބޮޑުވުން ފާޅުކުރައްވާފައެވެ.
"ރައްޔިތުންބުނީ ބޭކާރުޚަރަދު ނުކުރަން. މަޖިލީހުގައި ސަރުކާރުގެ ފުލްކޮންޓްރޯލް. ރައްޔިތުން އިތުރުޓެކްސްދޭން މަޖުބޫރު." ސަޢީދު ވީދާޅުވިއެވެ.
ސައީދު އިތުރަށް ވިދާޅުވީ ސަރުކާރާއި ރައްޔިތުންވެސް ބޯލަނބަން ޖެހެނީ ހަމަ އެއް ޤާނޫނަކަށް ކަމަށްވާއިރު، އަދުގެ ސަރުކާރުން އަންނަނީ ސިލްސިލާކޮށް ޤާނޫނާ ޚިލާފު ވަމުން ކަމަށެވެ.
އާމްދަނީއަށްވުރެ ދައުލަތުގެ ޚަރަދުތައް ބޮޑުވުމުގެ ސަބަބުން ދައުލަތުގެ ދަރަނި ކޮންޓުރޯލުނުވާ މިންވަރަށް މަތިވެ ރާއްޖޭގެ އިޤުތިޞާދަށް ނުރައްކާތަކެއް ކުރިމަތިވުމުގެ އިހުތިމާލު އޮތްކަން ވޯލްޑް ބޭންކާއި އެނޫންވެސް މާލީ އިދާރާތަކުން ފާހަގަކުރެއެވެ.
ބައިނަލްއަޤުވާމީ މާލީ އިދާރާތަކުން ކަންބޮޑުވުން ފާޅުކުރާ ކޮންމެ ފަހަރަކުވެސް ސަރުކާރުން ބުނަމުން އަންނަނީ އިޤުތިޞާދީ ހާލަތު އޮތީ ރަނގަޅަށް ކަމަށާއި، ކަންބޮޑުވާންޖެހޭ އެއްވެސް ކަމެއް ދިވެހި އިޤުތިޞާދުގައި ނެތް ކަމަށެވެ.
Advertisement
This content is created and paid for by advertisers and does not involve Voice Journalists
