ރާއްޖޭގެ ސަރަހައްދީ އިން ކަނޑައެޅުމާ ގުޅޭ ގޮތުން ޖަރުމަނުގައި ހުންނަ އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށަހަޅާފައިވާ މައްސަލައިގައި ގޮތެއް ކަނޑައެޅުމަށް ހުކުރު ދުވަހަށް ތާވަލުކޮށްފައި ވަނިކޮށް އެ މައްސަލައިގައި މި ސަރުކާރުން މޮރިޝަސްއާއެކު ހެދި ޑީލުގެ ވާހަކަ މޮރިޝަސްގެ ނޫސްތަކުގެ ފަލަ ސުރުހީއަށް އަރައިފި އެވެ.
ދިވެހިރާއްޖޭގެ ޚާއްސަ އިޤްތިޞާދީ ސަރަހައްދުން ބައެއް ގެއްލޭގޮތަށް ސަރުކާރުން މޮރިޝަސްއާއެކު ހަދާފައިވާ "ޑީލު" ތަހުގީގުކޮށް، މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ފޮނުއްވި ސިޓީ ހާމަކުރުމަށް ގޮވާލާ ރައްޔިތުންގެ މަޖިލީހަށް ވަނީ ކުއްލި މައްސަލައެއް ވެސް ހުށައަޅާފަ އެވެ.
މިކަން ވަނީ މޮރިޝަސްގެ ބައެއް ނޫސްތަކުގެ ސަމާލުކަމަށް އައިސްފަ އެވެ.
އެގޮތުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މޮރިޝަސްގެ ބޮޑުވަޒީރަށް ފޮނުވި ސިއްރު ސިޓީފުޅު ހާމަނުކުރާތީ ސަރުކާރާއި ވާދަވެރި ސިޔާސީ ޕާޓީ ޕީޕީއެމުންނާއި، ސަރުކާރު ހިންގާ މައި ޕާޓީގެ ބައެއް މެމްބަރުންވެސް ފާހަގަކުރަމުންދާކަމަށް މޮރިޝަސްގެ ބައެއް ނޫސްތަކުގައި ފާހަގަކޮށްފައި ވެއެވެ. އަދި ހަމަ އެހެންމެ އެ މައްސަލައިގައި ރާއްޖޭގެ ފޮރިން މިނިސްޓަރު އަބްދުالله ޝާހިދަށް ތުހުމަތުކުރެވޭ 500 މިލިއަން ޑޮލަރުގެ ޑީލުގެ ވާހަކަވެސް މޮރިޝަސްގެ ނޫސްތަކުގައި ވަނީ ބަޔާންކޮށްފަ އެވެ.
އެގޮތުން މި މައްސަލައާއި ގުޅިގެން ރައީސް ޞާލިހާއި ފޮރިން މިނިސްޓަރު ޝަހިދަށް ކޮރަޕްޝަންގެ ތުހުމަތުތަކެއް އަމާޒުކޮށްފައިވަނީ ޒަމާނުއްސުރެ ފޯޅަވަހި މައްސަލައިގައި ރާއްޖޭގެ ސަރުކާރުތަކުން ދަމަހައްޓަމުން އައި ސްޓޭންޑް ބަދަލުކޮށް، ޗާގޯސްގެ ސިޔާދަތީ ބާރު މޮރިޝަސް ލިބެން ޖެހޭކަމަށް ދިވެހިން ތައީދުކުރުމުންކަން ވެސް އެ ނޫސްތަކުގައި ބަޔާންކޮށްފައި ވެއެވެ.
މޮރިޝަސްގެ ނޫސްތަކުން އެކަން ހާމަކުރުމާއި ހަމަޔަށް އެ ގައުމުގެ ސަރުކާރުންވެސް އެ މައްސަލައިގައި ވަކި އެއްޗެއް ހާމަކޮށްފައެއް ނުވެއެވެ. އެހެން ނަމަވެސް، ޗާގޯސް މައްސަލައިގައި ދިވެހި ސަރުކާރާއެކު މޮރިޝަސްގެ މޮޑުވަޒީރު ސިއްރު ޑީލެއް ހަދާފައިވާކަމަށް ތުހުމަތުކޮށް އަޑުތައް ފެތުރިފައިވާކަން ރިޕޯޓު ކުރުމާއި ގުޅިގެން މޮރިޝަސްގެ ބޮޑު ވަޒީރު ވަނީ އެކަން ދޮގު ކުރައްވާފަ އެވެ. އަދި އެފަދަ ޑީލެއް ހަދާފައި ނުވާކަމަށް ބުނެ އެ މައްސަލައިގައި ވާހަކަ ދައްކަވާފަ އެވެ.
އެހެން ނަމަވެސް މިހާތަނަށް ރައީސް ޞާލިހު މޮރިޝަސްގެ ބޮޑުވަޒީރަށް ފޮނުއްވި ސިޓީފުޅު ދެ ގައުމުންކުރެ އެއް ގައުމަކުންވެސް ހާމަކޮށްފައެއް ނުވެއެވެ.
Advertisement
This content is created and paid for by advertisers and does not involve Voice Journalists
