‏ކުރީގެ ރައީސް، އަދި އިދިކޮޅު ރިޔާސީ ކެންޑިޑޭޓް އަބްދުالله ޔާމީން އަބްދުލްގައްޔޫމްގެ ޝަރީއަތްތައް މީގެ ކުރިން ލައިވުކޮށް ކުރިޔަށް ގެންދިޔުމަށްފަހު، މިހާރު ކޯޓަށް ހާޟިރު ނުކޮށް އަދި ލައިވުނުކޮށް އޮންލައިންކޮށް ކުރިއަށް ގެންދަނީ އެމަނިކުފާނަށް ސިއްރުން އަނިޔާ ދިނުމަށް ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ. 

ފުއްގިރީގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުއްލަވައިފައިވަނީ ރިޝްވަތު ޤަބޫލުކުރުމާއި މަނީ ލޯންޑަރިންގގެ ދަޢުވާގެ އަޑުއެހުންތައް މިހާރު ކްރިމިނަލް ކޯޓުގައި އަންނަނީ ކުރިއަށް ގެންދަމުންނެވެ. މި ޝަރީޢަތުގެ އަޑުއެހުންތައް މީގެ ކުރިން ލައިވް ކޮށްގެން ގެންގޮސްފައިވާއިރު، މިހާރު ކުރިއަށް ގެންދަނީ ލައިވް ނުކޮށް އޮންލައިން ކޮށެވެ. 

އެހެންކަމުން، ޝަރީޢަތް ލައިވް ކޮށްދިނުމަށް އެންމެ ފަހުން އޮތް އަޑުއެހުމުގައިވެސް ރައީސް ޔާމީންގެ ފަރާތުން ވަނީ އެދިލައްވާފައެވެ.

Advertisement

އެހެންނަމަވެސް މައްސަލަ ބައްލަވާ ގާޒީ ނަދީމް ވިދާޅުވީ ހެކިބަސް ދިނުން ލައިވްކޮށްފިނަމަ ހެކިބަސް ތައްޔާރު ކުރުމާއި ހެކިންނަށް ނުފޫޒު ފޯރުވުމުގެ ފުރުސަތު ވެސް އޮވެދާނެ ކަމަށެވެ. އަދި ހެކިބަސް ނެގުމުގެ މަރުހަލާއަށް ފަހު އަޑުއެހުންތައް ލައިވްކުރާނެ ކަމަށްވެސް ގާޒީ ވިދާޅުވި އެވެ.

އެކަމާއި ގުޅިގެން ޝިޔާމް ކުރެއްވި ޓުވީޓެއްގައި ވިދާޅުވީ، ސަރުކާރުގެ ނުފޫޒުން ކުރިމިނަލް ކޯޓުގައި ކުރިޔަށްދާ ރައީސް ޔާމީންގެ މައްސަލަ އަވަސް އަރުވާލާ ފުލުފުލުގައި ޝަރީއަތްތައް ބާއްވާ އެމަނިކުފާނުގެ ޤާނޫނީ އެތައް ޙައްޤެއް ނިގުޅައިގަނެފައިވާ ކަމަށެވެ.

އެގޮތުން، ފުއްގިރި މައްސަލައާއި ގުޅިގެން ހައިކޯޓުން ޝަރީއަތުގެ ކުރީގެ ހުށައެޅުންތަކާ ގުޅޭގޮތުން ނިންމި ނިންމުން ތިން ނުކުތާއަކާއެކު ސުޕްރީމް ކޯޓުގައި އިސްތިއުނާފު ކޮށްފައިވަނިކޮށް، އިސްތިޢުނާފްކޮށްފައިވާ ދެ ނުކުތާއަކީވެސް ޝަރީޢަތަށް އަސަރުކުރާނެ ދެކަންތައް ނޫންކަމަށް ބުނެ ޝަރީއަތް މަޑުޖައްސާލަންޖެހޭ ފަދަ ސަބަބެއް ނެތް ކަމަށް ކްރިމިނަލް ކޯޓުން ބުނުމާއި ގުޅިގެން ޝިޔާމް ވަނީ ނުރުހުން ފާޅުކުރައްވައިފިއެވެ.

އަދި ސުޕުރީމްކޯޓުގެ ފައިސަލާއެއް ނެތި ކުރިމިނަލް ކޯޓުގައި މައްސަލަ ކުރިޔަށް ގެންދިއުމަކީ ޖިނާއީ އިޖުރާތު ޤާނޫނު އަދި ހެއްކާ ބެހޭ ޤާނޫނުން ރައީސް ޔާމީނަށް ލިބިގެންވާ ޙައްޤުތަކެއް ނިގުޅައިގަތުން ކަމަށްވެސް ޝިޔާމް ވިދާޅުވި އެވެ. 

"ޤާނޫން އަސާސީގެ 20 ވަނަ މާއްދާއިން ޤާނޫނުން ލިބިދޭ ރައްކާތެރިކަންް ހަމަހަމަ ކަމާއި އެކު ލިބުމަކީ ރައީސް ޔާމީނަށްވެސް ކަށަވަރުކޮށްދޭން ޖެހޭ ހައްޤެއްކަމާ އަދި ހަމަ ޤާނޫނު އަސާސީގެ 42 ވަނަ މާއްދާއިން ޢަދުލުވެރިކަމާއި ހާމަކަމާއެކު ޝަރީއަތްކުރުމުގެ ޙައްޤުންވެސް އެމަނިކުފާން މަޙުރޫމު ކުރުމަކީ އެމަނިކުފާނަށް ދެވޭ ވަރަށް ބޮޑު އަނިޔާއެއްކަން ފާހަގަކުރަން." ޝިޔާމް ވިދާޅުވި އެވެ. 

މިއާއެކު ޝިޔާމް ވިދާޅުވީ، މީގެ ކުރިން ލައިވުކޮށް ކުރިޔަށް ގެންދިޔަ ޝަރީއަތްތައް މިހާރު ގެންދަނީ ކޯޓަށް ހާޟިރު ނުކޮށް ލައިވުނުކޮށް އޮންލައިންކޮށް ކަމަށާ، އެފަދައިން ކަންކުރުމުގެ އެއްވެސް ސަބަބެއް ނުވިސްނޭ ކަމަށެވެ. އަދި އެއީ ރައްޔިތުންނަށް ސިއްރުން ރައީސް ޔާމީނަށް އަނިޔާ ދިނުމަށް ކުރާ ކަމެއް ކަމަށްްވެސް އޭނާ ވިދާޅުވި އެވެ.  

ޝިޔާމް އިތުރަށް ވިދާޅުވީ ރައީސް ޔާމީނަކީ ތަޙުޤީގުތަކާ ޝަރީޢަތްތަކަށް ފިއްލަވައިގެން އުޅުއްވާ ބޭފުޅެއްނޫން ކަމަށާ، އެމަނިކުފާނަށް ނިޒާމުން އަނިޔާދީ އަނިޔާވެރިވުމަކީ ދިވެހި އެއްވެސް ރައްޔިތަކު މަޢާފުކުރާނެ ކަމެއްނޫން ކަމަށެވެ.