ރ. ފުއްގިރި މައްސަލައާއި ގުޅިގެން އެކަށީގެންވާ ގޮތެއްގައި ގާނޫނީ ވަކީލުންނާއި ބައްދަލުކޮށް މަޝްވަރާ ކުރުމުގެ ފުރުސަތު ނުލިބޭ ކަމަށް ބުނެ އިފްތިތާހީ ބަޔާން ހުށަހަޅަން ކުރީގެ ރައީސް އަބްދުالله ޔާމީން ދެކޮޅު ހެއްދެވުމުން، އަނެއްކާވެސް އެމަނިކުފާނަށް އިފްތިތާޙީ ބަޔާން އިއްވަން އިތުރު ފުރުސަތެއް ދެއްވައިފިއެވެ. 

ރ. ފުއްގިރި ޚިޔާނާތުގެ މައްސަލައިގައި ރައީސް ޔާމީންގެ މައްޗަށް ހިންގާ ޝަރީއަތުގައި އެންމެ ފަހުން ބޭއްވި އަޑުއެހުމުގައި އޮތީ ޝަރީއަތް ފަށައި އިފްތިތާޙީ ބަޔާން އިއްވެވުމެވެ. އެ ދުވަހު ޔާމީނުގެ ފަރާތުން ވަނީ އިފްތިތާޙީ ބަޔާން އިއްވުމަށް ވަގުތު ބޭނުންވާކަމަށް ވިދާޅުވެފައެވެ. ވުމާއެކު، މައްސަލަ ބައްލަވާ ގާޒީ އަލީ ނަދީމް އެ ދުވަހު ވަނީ އެ ފުރުސަތު ދެއްވަވާފައެވެ.

މި މައްސަލާގައި މިއަދު ތާވަލް ކުރީ ޔާމީންގެ ފަރާތުން މައްސަލައިގެ އިފުތިތާހީ ބަޔާން އިއްވުމެވެ. 

Advertisement

އެގޮތުން ރައީސް ޔާމިންގެ ފަރާތްޕުޅުން އިފްތިތާހީ ބަޔާން އިއްވުމަށް ދެވުނު ފުރުސަތުގައިވެސް ވަކީލުން ވިދާޅުވީ، ޔާމީނާ މަޝްވަރާ ކުރުމެއް ނެތި އިފްތިތާޙީ ބަޔާން ހުށައެޅުމަށް ދަތި ކަމަށެވެ.

މިއަދުގެ އަޑުއެހުމުގައި ރައީސް ޔާމީނަށް ވާހަކަ ދައްކަވަން ދެއްވި ފުރުސަތުގައި އެމަނިކުފާނު ވެސްވަނީ އިފްތިތާޙީ ބަޔާން ހުށައެޅުމަށް އަދި ފުރުސަތެއް ދެއްވުމަށް ތަކުރާރުކޮށް އެދިލައްވާފައެވެ. 

ޔާމީންގެ އެދިލެއްވުމާއި ގުޅިގެން ދައުލަތުން ވަނީ އަންނަ އަންގާރަ ދުވަހު ބާއްވާ އަޑުއެހުމުގައި ހެކިބަސް ނަގަން ފެށުމުގެ ކުރިން އިފްތިތާހީ ބަޔާން ހުށަހެޅުމުގެ ފުރުސަތު ޔާމީނަށް ދެއްވުމަށް އެދިފައެވެ. ނަމަވެސް މާދަމާ އަކީ ބަންދު ދުވަހެއް ކަމުން ޔާމީނާ ބައްދަލު ކުރުމުގެ ފުރުސަތު ނުލިބޭނެ ކަމަށް ވަކީލުން ވަނީ ވިދާޅުވެފަ އެވެ.

އެއާއި ގުޅިގެން ދައުލަތުން ވަނީ ކަރެކްޝަންސްއާ ވާހަކަ ދައްކައިގެން މާދަމާ އެ ފުރުސަތު ލިބޭ ގޮތް ހަމަޖެއްސިދާނެ ކަމަށް ވިދާޅުވެފައެވެ. 

ދައުލަތުން އެފަދައިން ވިދާޅުވުމާއި ގުޅިގެން ރައީސް ޔާމިން އަށް ދެއްވުނު ފުރުސަތު އެމަނިކުފާނު ވަނީ ޝަރީއަތް އޮތީ ބަންދު ދުވަސް ދުވަހުގައި ވެސް ކުރިއަށް ގެންދަން ޖެހޭހާ އަވަސްމިނުގައިތޯ ސާފުކޮށްދޭން އެދިވަޑައިގަންނަވާފައެވެ.

"މިހެން ދާ ކަމަށް ވަންޏާ ކީއްވެގެންތޯ ޝަރީއަތުގެ މަޖިލިސް ހުކުރުދުވަހާއި ހޮނިހިރު ވެސް ނުބާއްވަނީ؟" ޔާމީން ވިދާޅުވި އެވެ.

މިއަދުގެ އަޑުއެހުން ގާޒީ ނިންމަވާލެއްވީ ބުދަ ދުވަހަށް އަޑުއެހުމެއް އޮންނާނެ ކަމަށް ވިދާޅުވެފައެވެ. އެ އަޑުއެހުމުގައި އޮންނާނީ ޔާމީނުގެ ފަރާތުން އިފްތިތާޙީ ބަޔާން އިއްވުމާއި ހެކިންގެ ހެކިބަސް ނަގަން ފެށުމެވެ.

ފުއްގިރީގެ މައްސަލައިގައި ދައުލަތުން ރައީސް ޔާމީންގެ މައްޗަށް އުފުއްލަވައިފައިވަނީ ރިޝްވަތު ޤަބޫލުކުރުމާއި މަނީ ލޯންޑަރިންގގެ ދަޢުވާއެވެ. އެގޮތުން ރިސޯޓެއްގެ ގޮތުގައި ރ. ފުއްގިރި ތަރައްޤީކުރަން ކުއްޔަށް ދޫކުރުމުގެ މުޢާމަލާތުގައި މަޤާމުގެ ނުފޫޒު ބޭނުންކުރައްވައި 1.1 މިލިއަން ޑޮލަރު ހޯއްދަވާފައިވާ ކަމަށް ދައުލަތުން ތުހުމަތުކުރެއެވެ.