ނުކުޅެދުންތެރިކަން ހުންނަ ފަރާތްތަކަށް ސަރުކާރުން ދޭ އެލަވަންސު ބޮޑުކުރާނެ ވަކި ތާރީޚެއް ދަންނަވަން ދަތިފުޅުވާ ކަމަށް ޖެންޑާ މިނިސްޓަރު އައިޝަތު މުޙައްމަދު ދީދީ ވިދާޅުވެއްޖެ އެވެ. 

ޖެންޑާ މިނިސްޓަރު މިފަދައިން ވިދާޅުވެފައިވަނީ ސިއްޙީ ދާއިރާގެ މުސާރައަށް މި އައި ބަދަލުތަކާއި ގުޅޭ މައުލޫމާތުތައް ހިއްސާކުރުމަށް މިރޭ ކުރިއަށް ގެންދިޔަ ޕްރެސް ކޮންފަރެންސްގައި "ވޮއިސް" އިން ކުރި ސުވާލަށް ޖަވާބުދެއްވަމުން ނެވެ. 

ނުކުޅެދުންތެރިކަން ހުންނަ މީހުންނަށް މިހާރު ދެނީ މަހަކު 2،000 ރުފިޔާގެ އެލަވަންސެކެވެ. އެއީ މާ ކުޑަ މިންވަރެއް ކަމަށް ބުނެ، އެ އެލަވަންސް 5000 ރުފިޔާ އަށް ބޮޑުކޮށްދިނުމަށް، ލޯފަން މީހުންނާ އެކު ރައީސް ސޯލިހު 2021 ވަނަ އަހަރު ބޭއްވެވި ބައްދަލުވުމެއްގައި އެ މީހުންގެ ފަރާތުން ވެސް ވަނީ ރައީސް ސޯލިހަށް ދަންނަވާފަ އެވެ.

ސިއްޙީ ދާއިރާގައި މަސައްކަތްކުރާ ފަރާތްތަކުގެ މުސާރަ ބޮޑުކޮށްފައި އަދި ސިފައިންނާއި ފުލުހުންގެ މުސާރަވެސް ބޮޑުކުރަން ސަރުކާރުން ނިންމާފައިވާއިރު ނުކުޅެދުންތެރިކަން ހުންނަ ފަރާތްތަކަށް ދޭ އެލަވަންސް ބޮޑުވާނީ ކިހާ ހިސާބަކުތޯ "ވޮއިސް" އިން ވަނީ ސުވާލުކޮށްފަ އެވެ. 

އެ ސުވާލަށް ޖަވާބުދެއްވަމުން މިނިސްޓަރު އައިޝަތު މުޙައްމަދު ދީދީ ވިދާޅުވީ ނުކުޅެދުންތެރިކަން ހުންނަ ފަރާތްތަކަށް ސަރުކާރުން ދޭ އެލަވަންސް ބޮޑުކުރުމުގެ މަސައްކަތް ކުރެވެމުންދާ ކަމަށެވެ. 

އެހެން ނަމަވެސް އެ އެލަވަންސް ބޮޑުކުރާނެ ވަކި ތާރީޚެއް ދަންނަވަން ނޭނގޭކަމަށް މިނިސްޓަރު ވިދާޅުވި އެވެ. 

ނުކުޅެދުންތެރިކަން ހުންނަ ފަރާތްތަކުގެ އެލަވަންސް ބޮޑުކުރާނެ ވަކި ތަރީޚެއް މިނިސްޓަރު ވިދާޅުވެފައި ނުވި ނަމަވެސް ނުކުޅެދުންތެރިކަން ހުންނަ މީހުންނަށް ދޭ އެލަވަންސް އަންނަ ޖޫން މަހުން ފެށިގެން ބޮޑުކުރާނެ ކަމަށް ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ވަނީ ވިދާޅުވެފަ އެވެ. 

މިއަހަރަށް ރައްޔިތުންގެ މަޖިލިސް ހުޅުވުމަށް މިއަދު ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް ސޯލިހު ވިދާޅުވީ ނުކުޅެދުންތެރިކަން ހުންނަ މީހުންނާއި ބެހޭ ގާނޫނުގެ ދަށުން އެކުލަވާލަންޖެހިފައި އޮތް ނުކުޅެދުންތެރިކަން ހުންނަ މީހުންގެ ރަޖިސްޓްރީ އެކުލަވާލައި ނިންމާފައިވާ ކަމަށެވެ.

އަދި ޖޫން މަހުން ފެށިގެން އެމީހުންނަށް ސަރުކާރުން ދޭ އެލަވަންސް ބޮޑުކުރާނެކަމަށް ރައީސް ޞާލިހު ވަނީ ވިދާޅުވެފައެވެ.