ޖަލު ގައިދީންގެ ތެރެއިން މިހާތަނަށް އެންމެ ގިނަ ޚިދުމަތް ދެވިފައިވަނީ ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމް އަށް ކަމަށް ހޯމް މިނިސްޓަރު ޢިމްރާން އަބްދުالله ވިދާޅުވެއްޖެ އެވެ.
ޕްރޮގްރެސިވް ކޮންގްރެސް ކޯލިޝަނުން ރޭ ކުރިއަށް ގެންދިޔަ ނޫސްވެރިންގެ ބައްދަލުވުމުގައި އިދިކޮޅުން ވަނީ، ޖަލުގެ ކަންކަން ބަލަހައްޓާ ބޭފުޅަކަށް ޢިމްރާން ހުންނަވާތީ އެކަމާއިމެދު ކަންބޮޑުވުން ފާޅު ކުރައްވާފައެވެ.
އަދި އިމްރާން އަކީ ރައީސް ޔާމީން އާއި ޒާތީވެފައިވާ މީހެއް ކަމަށާ، ޖަލު ބަލަހައްޓާ މީހުން މެދުވެރިކޮށް ވެސް ޔާމީނަށް އެކި ގޮތްގޮތުން ދުއްތުރާ ކުރަން އޭނާ މަސައްކަތް ކުރައްވާ ކަމަށް އިދިކޮޅުން ވަނީ ތުހުމަތު ކުރައްވާފަ އެވެ.
"ފާހާނާއަށް ދަންދެން ކެމެރާ އަޅާއިގެން ގޭގަ އިނދެގެން ރައީސް ޔާމީނުގެ ހުރިހާ ހަރަކާތެއް ބެލޭގޮތަށް ހުރިހާ މޫމްމަންޓްސްއެއް ބެލޭގޮތަށް އިމްރާމް ރާވާފަ ހުރި ކަމަށް. މީ އަޅުގަނޑުމެންނަށް ލިބޭ މައުލޫމާތު. މިވަރުގެ ނުބައި ނުލަފާ މީހެއް އިމްރާނަކީ." ރޭގެ ނޫސްވެރިންގެ ބައްދަލުވުމުގައި އިދިކޮޅު ކޯލިޝަނާއި ހަވާލުވެވަޑައިގެން ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވިއެވެ.
އިދިކޮޅުން ކޮށްފައިވާ އެ ތުހުމަތު ތަކާއި ގުޅިވައި ޢިމްރާން މިއަދު ކުރެއްވި ޓުވީޓެއްގައި ވިދާޅުވީ، ރައީސް ޔާމީންގެ އިންސާނީ ކަރާމާތާއި، ހައްގުތަކަށް އުނިކަން އަންނާނެ އެއްވެސް ކަމެއް ކުރުމަކީ އޭނާގެ ޟަމީރު ތަންދޭ ކަމެއް ނޫން ކަމަށެވެ.
"ޖަލުގައި މިހާތަނަށް އެންމެ ގިނަ ޚިދުމަތް ދެވުނު ގައިދީ އަކަށް ވާނީ ރައީސް ޔާމީން ކަން މޯލްޑިވްސް ކަރެކްޝަނަލް ސަރވިސް ގެ އޮފިސަރުންނަށް އެނގިވަޑައިގަންނަވާނެ." ޢިމްރާން ވިދާޅުވި އެވެ.
ޢިމްރާން މިފަދައިން ވިދާޅުވި ނަމަވެސް، ކެމެރާ ހަރުކޮށް ރައީސް ޔާމީންގެ ހަރަކާތްތައް ބައްލަވާ ކަމަށް ކުރެއްވި ތުހުމަތު ތަކާއި ގުޅިގެން ވަކި އެއްޗެއް ވިދާޅުވެފައެއް ނުވެ އެވެ.
Advertisement
This content is created and paid for by advertisers and does not involve Voice Journalists
