ދިވެހި ރާއްޖޭގެ އިސްލާމީ ފަތުވާ ދޭ އެންމެ މަތީ މަޖިލިހަށް 4 މެމްބަރަކު އައްޔަނު ކުރައްވައިފި ކަމަށް ރައީސް އޮފީހުގެ ތަރުޖަމާނު މުޙައްމަދު މިއުވާން ވިދާޅުވެއްޖެއެވެ.

މިއުވާން މިހެން ވިދާޅުވީ މިއަދު ބޭއްވެވި ނޫސްވެރިންގެ ބައްދަލުވުމެއް ނިންމަވައި ލެއްވުމަށް ފަހު މީޑިއާ ތަކަށް ހިއްސާ ކުރެއްވެވި މެސެޖެއްގައެވެ.

މިއުވާން ވިދާޅުވީ ފަތުވާ ކޮމެޓީއަށް މިހާރު 4 ބޭފުޅަކު އައްޔަނު ކޮށްފައިވާކަމަށެވެ. އަދި ކޮމެޓީ އިން މަސައްކަތް ކުރަމުން ދާ  ކަމަށްވެސް މިއުވާން ވިދާޅުވިއެވެ. ނަމަވެސް އިތުރު ތަފްސީލެއް ދެއްވަވާފައެއް ނުވެއެވެ.

މިކަމާއި ގުޅުން ހުރި އިތުރު ތަފްސީލު ހޯދާލުމަށް އިސްލާމިކް މިނިސްޓްރީގެ މީޑިއާ އޮފިޝަލް އިސްމާއިލް އަފްރާހް އަށް ގުޅައިލުމުން ވިދާޅުވީ ހަތަރު ބޭފުޅަކު އައްޔަން ކުރެވިފައިވާ ކަމަށެވެ.

އެ ހަތަރު ބޭފުޅުންނަކީ ޑރ މުހައްމަދު ރަޝީދު އިބްރާހިމް، ޑރ ޢަބްދުއްސައްތާރް ޢަބްދުއްރަޙްމާން، ޑރ އިބްރާހިމް ޒަކަރިއްޔާ މޫސާ އަދި ޝައިޙް އިލްޔާސް ހުސެއިން ކަމަށް އޭނާ ވިދާޅުވިއެވެ.

އިސްލާމީ ފަތުވާދޭ އެންމެ މަތީ މަޖިލިސް ވުޖޫދު ވެގެން އައީ ރައީސް ޔާމީން ޢަބްދުލް ޤައްޔޫމްގެ ސަރުކާރުގަ އެވެ. "އިސްލާމީ ފަތުވާ ދޭ އެންމެ މަތީ މަޖިލިސް" ގެ ނަމުގައި އެ މަޖިލިސް އުފައްދާފައި ވަނީ އޭޕްރިލް 25، 2016 ގައެވެ.