ރާއްޖޭގެ އެތެރޭގެ އުދުހުން ތަކުގެ ފެންވަރު ރަނގަޅު ކޮަށް އަގު ހެޔޮކުރުމަށް މަސައްކަތް ތަކެއް ކުރެވެމުން ދާ ކަމަށް ރައީސް އޮފީހުގެ ތަރުޖަމާނު މުހައްމަދު މިއުވާން ވިދާޅުވެއްޖެއެވެ.

މިއުވާން މިހެން ވިދާޅުވީ ރައީސް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައެވެ.

މިއުވާން މިހެން ވިދާޅު ވިއިރު ދާދި ފަހަުންވެސް ޤައުމީ އެއަރލައިން ހިންގާ މޯލްޑިވިއަން އިން ވަނީ މިދިޔަ މާޗް މަހުގެ ފުރަތަމަ ދުވަހު ޓިކެޓްގެ އަގު ބޮޑު ކޮށްފައެވެ.

މޯލްޑިވިއަން އިން މީޑިޔާ ތަކަށް ބުނެފައިވަނީ ޓިކެޓުގެ އަގު ބޮޑުވެފައި ވަނީ އެއާޕޯޓް ހޭންޑްލިން ޗާޖުތައް ބޮޑުވުމުން ކަމަށެވެ. އޭގެ ފަހުންވެސް މިދިޔަ މަހުވެސް ޓިކެޓްގެ އަގު އިތުރަށް ބޮޑުވެގެން ދާނެ ކަމަށް މޯލްޑިވިއަން އިން ބުންޏެވެ.

އިއްޔެގެ ނޫސްވެރިންގެ ބައްދަލު ވުމުގައި ނޫސްވެރިޔަކު މިކަމާއި ގުޅިގެން ކުރި ސުވާލަކަށް ޖަވާބު ދެއްވަމުން މިއުވާން ވިދާޅުވީ ސަރުކާރު ޙިއްސާވާ ކުންފުނިތަކުން ރައްޔުތުންނަށްދޭ ޙިދްމަތް ތަކުގެ އަގު ހެޔޮ ކުރުމަށް މަސައްކަތް ތަކެއް ކުރެވެމުން ދާ ކަމަށެވެ.

މީގެ އިތުރުން މިއުވާން ވިދާޅުވީ ހާއްސަ ގޮތެއްގައި އެތެރޭގެ އުދުހުންތަކުގެ އަގު ހެޔޮ ކުރުމަށް ކުރެވޭ މަސައްކަތުގައި ކޮންމެވެސް ވަރެެއްގެ ދަތިތަކެއް، ތެޔޮ އަގުބޮޑުވުމުގެ ސަބަބުން ދިމާވާނެ ކަމަށެވެ.  އެހެން ނަމަވެސް އެތެރޭގެ އުދުހުންތަކުގެ ޚިިދުމަތް ރަނގަޅުކޮށް، ޚިދުމަތުގެ އަގު ހެޔޮ ކުރުމަށް ކުރަން ޖެހޭ މަސައްކަތްތައް ކުރަމުންދާނެ ކަމަށާއި، ސަރުކާރުގެ ކުންފުނިތަކާއި، އައިލެންޑް އޭވިއޭޝަން ގުޅިގެން މަސައްކަތް ކުރާނެ ކަމަށް މިއުވާން ވިދާޅުވިއެވެ.

އެތެރޭގެ އުދުހުން ތަކުގެ އަގު ބޮޑު ވަމުން ދާ ވާހަކަ އަކީ އަބަދުވެސް ދެކެވޭ ވާހަކައެކެވެ. އަދި ޚާއްސަ ކޮށް ސްކޫލް ޗުއްޓީ ތަކާއި ދިމާކޮށް  އެތެރޭގެ އުދުހުން ތަކުގެ އަގުތައް އުފުލިގެން ދާ ކަމީ ފާހަގަ ކޮށްލަން ޖެހޭ ކަމެކެވެ.